Umunya-Zimbabwe Mtukudzi yerekanye ubuhanga budasanzwe mu gitaramo cya Jazz Junction (Amafoto)

Yanditswe na Uwiduhaye Theos
Kuya 27 Ukwakira 2018 saa 08:36
Yasuwe :
0 0

Umuhanzi w’igihangange Oliver Mtukudzi ukomoka muri Zimbabwe, yagaragaje ubuhanga budasanzwe mu kuririmba mu gitaramo cya Kigali Jazz Junction yahuriyemo na Bruce Melody, mu ijoro ryo kuri uyu wa Gatanu.

Iki gitaramo cya ‘Kigali Jazz Junction’, kiba buri kwezi, kuri iyi nshuro umuhanzi Oliver Mtukudzi, yataramiye abakunzi b’umuziki mu buryo bw’umwimerere.

Ku isaha ya saa mbili n’igice nibwo ku rubyiniro habanje itsinda rya Neptunz Band risanzwe rimenyerewe mu gususurutsa ababa bitabiriye iki gitaramo.

Iri tsinda ryakomeje gushyira abantu mu mwuka wo kumva umuziki w’umwimerere rinabateguza ko hari umuhanzi ukomeye ugiye kuza ku rubyiniro, saa tatu na mirongo ine n’itanu Bruce Melody yahise ahasesekara.

Uyu muhanzi usanzwe uzwiho ubuhanga mu kuririmba mu buryo bw’umwimerere, yatangiriye ku ndirimbo ye yise Deep in love yahuriyemo na Knowless, yahise yanzika n’izindi ndirimbo yashyize mu mujyo wa Zouk zanyuze benshi zirimo; Ndakwanga, Indorerwamo na Uzandabure.

Uyu muhanzi wanyuzagamo akagaragaza ko yishimiye gutaramira abakunzi ba Kigali Jazz Junction, yahise akomereza ku ndirimbo ze zirimo Ikinyarwanda yafatanyije na Riderman, Ikinya, Nta kibazo yakoranye na Urban Boyz.

Iyi ndirimbo yagaragaje ko ikunzwe cyane kuko yahagurukije benshi bagatangira gucinya akadiho, asoreza kuri Ndumiwe yazamukiye mu mwuka wa Nta kibazo.

Saa yine na mirongo ine n’itanu Oliver Mtukudzi wari utegerejwe na benshi yinjiye ku rubyiniro benshi biterera mu birere.

Uyu muhanzi w’imyaka 66 yinjiye aririmba indirimbo ziganjemo izo mu rurimi rwo muri Zimbabwe ariko ntibyabujije benshi kwizihirwa.

Uyu musaza w’umunyabigwi mu muziki yinjiranye ku rubyiniro n’itsinda ry’abantu batanu bamufashaga mu buryo bw’imiririmbire ndetse no mu gucuranga, nubwo na we yari afite gitari ku buryo yakirigitaga imirya benshi bakanyurwa.

Agitangira, bamwe bari basanzwe batamuzi ntabwo bumvaga uburyo bw’imiririmbire ye, bigezemo hagati batangiye guhaguruka gake gake kugeza aho igitaramo cyarangiye amaze kwigarurira imitima ya bensi.

Ari ku rubyiniro yanyuzagamo akaganira n’abakunzi b’umuziki, hari nk’aho yagize ati “Mu Rwanda hanshimishije meze nk’uri mu rugo. Nishimye pe. Tugomba guterwa ishema no kuba Abanyafurika kandi ntabwo dukwiriye kuririmba mu gihe ntacyo kuvuga dufite.”

Yakomeje agira inama urubyiruko rwari ruri mu bitabiriye ko nta buzima bworoshye. Ati “ Nta buzima bworoshye icyo buri muntu asabwa ni ugukora cyane.”

Mtukudzi yasoreje ku ndirimbo ye yise ‘Todii’ yakunzwe cyane, abatari bamuzi bakunze gukururwa n’umuziki we bagahaguruka mu gihe yaririmbaga, ku buryo yasoje igitaramo ubona hari abagishaka ko akomeza gutaramana nabo.

Umuziki w’umwimerere, ijwi ryiza, ubuhanga mu gukirigita gitari n’uburyo bw’imiririmbire bwuje ubuhanga bya Mtukudzi, byanyuze benshi bemeza ko ari umuhanzi w’umunyabigwi udasanzwe.

Saa yine na mirongo ine n’itanu Oliver Mtukudzi wari utegerejwe na benshi yinjiye ku rubyiniro benshi biterera mu birere
Mtukudzi yagaragaje ubuhanga mu gucuranga gitari
Ni igitaramo kitazibagirana mu mitwe ya benshi
Ambasaderi w'u Buholandi mu Rwanda, Frédérique de Man (iburyo) yitabiriye Kigali Jazz Junction
Byari ibyishimo bidasanzwe
Ambasaderi w'u Buholandi mu Rwanda, Frédérique de Man afata agafoto k'urwibutso
Bruce Melody yaririmbiye abitabiriye Kigali Jazz Junction
Itsinda rya Neptunz Band ryabanje gususurutsa abitabiriye iki gitaramo

Kureba andi mafoto, kanda hano

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza