Umunya-Ecosse wihebeye u Rwanda ari gukorana indirimbo na Bruce Melodie

Yanditswe na Mukaneza M.Ange
Kuya 5 Ukwakira 2018 saa 07:43
Yasuwe :
0 0

Iain Stewart, Umunya-Ecosse wakunze u Rwanda, akaruririmba ndetse akarubera umukwe, aratangaza ko ari gukorana indirimbo na Bruce Melodie isazohoka bitarenze uyu mwaka.

Iain aherutse gushyira hanze indirimbo yise ‘Ndagukunda’, aho yumvikana aririmba mu Kinyarwanda, ururimi avuga ko ataramenya neza ariko ari kwiga.

Mu kiganiro yagiranye na IGIHE ubwo yamusuraga, Stawart yavuze ko yamenye byinshi ku Rwanda abibwiwe n’umuhanzi Jean Paul Samputu, wanamutumiye kuhaza mu 2013.

Ati “ Nk’abandi bose, numvaga amateka mabi yaranze u Rwanda ariko mu 2013 Samputu yanyumvishije ko ngomba kuza mu Rwanda kuko yari yakunze indirimbo nanditse ku bumwe n’ubwiyungu. Navuga ko nkihageza inkuru y’urukundo rwanjye n’u Rwanda yatangiye ubwo.”

Yaje mu Rwanda gukora album yitwa ‘Rwandan Dream’ yafatanyijemo na Jean Paul Samputu. Yagiye ahagaruka kenshi, muri uyu mwaka akaba yarazanye n’umugore we Umutesi Marie Jeanne bashyingiranywe mu 2014, baje kwerekana umwana mu muryango.

Stewart wanakoranye na Mani Martin indirimbo ‘Love Again’, avuga ko yishimira kuba Abanyarwanda bakunda indirimbo ze, nubwo benshi baba batamuzi.

ati “ Mperutse kujya mu kabyiniro ndi kumwe n’inshuti yanjye bashyiramo indirimbo yanjye, ariko amashusho atari ayanjye. inshuti yanjye yahise ibwira ugenzura akabyiniro ko indirimbo bashyizemo atari umwimerere, nawe umusaba ko najya kuririmba.”

Arifuza gukora album y’Ikinyarwanda gusa

Iain avuga ko mu mishinga ya vuba afite harimo indirimbo ari gukorana na Bruce Melodie, izasohoka bitarenze uyu mwaka wa 2018, kandi yatangiye gutekereza uburyo yakora album iri mu Kinyarwanda gusa.

Ati “ Abantu benshi bagiye babinsaba, hari bamwe bavuga ko batishimira uburyo mvuga Ikinyarwanda, ariko hari n’abandi benshi babikunze. Ndatekereza kuzakora izindi ndirimbo nyinshi ziri mu Kinyarwanda.”

Akomeza avuga ko mu gihe akiri kwiga Ikinyarwanda, ururimi avuga ko rukomeye aramutse abonye umuntu umwandikira indirimbo atazuyaza kuziririmba.

Umwaka ushize Stewart abifashijwemo na Pastor P, yasubiyemo indirimbo "I’ve Been Thinking About You" yakozwe n’itsinda ry’Abongereza Londonbeat, yasohotse mu 1990 irakundwa by’indengakamere ndetse iri mu zayoboye umuziki w’Isi mu 1991.

Iain Stewart, ni umuhanzi wo muri Ecosse uvuga ko yihebeye u Rwanda
Kuba ngo uyu mugore ari Umunyarwandakazi biri mu byatumye Stewart amubenguka
Avuga ko uretse imishinga irebana n'umuziki we n'umugore baje kwerekana umwana baherutse kwibaruka
Stewart ari kumwe n'umugore ndetse n'umwana wabo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza