Tom Close yatuye umugore we indirimbo y’urukundo yafatiwe amashusho ku nyanja (Video)

Yanditswe na Dusabimana Aimable
Kuya 17 Gicurasi 2018 saa 01:05
Yasuwe :
0 0

Umuhanzi Tom Close ufite ishimwe rikomeye ku mugore we Niyonshuti Ange-Tricia, yamutuye indirimbo nshya yakoze ikubiyemo imitoma n’amagambo y’urukundo rwishimirwa na babiri.

Iyi ndirimbo nshya Tom Close yise ‘My Love’ ifite amashusho yafashwe na Hanskana Brand, umuhanga mu gutunganya amashusho muri Tanzania. Yafatiwe ku nkombe y’Inyanja y’u Buhinde.

Mu gutangaza iyi ndirimbo, Tom Close yashyize ifoto y’umugore we kuri Instagram, ayiherekeza amagambo y’urukundo agize iyi ndirimbo. Yabwiye IGIHE ko yayituye abantu bose baryohewe mu rukundo ariko by’umwihariko umugore we Niyonshuti Ange-Tricia.

Yagize ati “Ni indirimbo y’urukundo. Ni ubutumwa umuntu yagenera mugenzi we bakundana. ‘My Love’ bivuga rukundo rwanjye, ni indirimbo itajimije irasa ku ntego y’urukundo.”

Yongeyeho ati “Ni indirimbo natuye abakunzi banjye ariko by’umwihariko we [Niyonshuti Ange-Tricia]. By’umwihariko ni umuntu umbanira neza. Yambaniye neza kuva twamenyana byanaje kuvamo ko tubana nk’umugore n’umugabo ariko nyuma yaho ntiyigeze ahararukwa, byakomeje uko byatangiye. Ni iyo mpamvu nayimukoreye.”

Hashize imyaka ine Muyombo Thomas [Tom Close] arushinganye na Niyonshuti Ange-Tricia, basezeranye imbere y’Imana ku itariki 30 Ugushyingo 2013. Ubu bafitanye abana babiri imfura y’umukobwa yitwa Ella n’uwo baherutse kubyara w’umuhungu witwa Elan.

Yavuze ko nyuma y’iyi ndirimbo afite indi mishiga myinshi arimo gutegura irimo na album ikurikira zirindwi amaze gusohora mu gihe amaze mu muziki ariko by’umwihariko yemeza ko afite undi mushinga w’indirimbo yateguye uri hafi gusohoka.

Tom Close ni umwe mu bahanzi bakomeye mu Rwanda bashyize itafari ku muziki ugezweho muri iki gihe, ni we wabimburiye abandi yegukana igihembo gikuru cya Primus Guma Guma Superstar.

Hanskana umaze iminsi akorana na Tom Close ku mashusho y’indirimbo ze azwi mu mishinga n’abandi bahanzi bakomeye mu Karere barimo Diamond mu ndirimbo "Nasema Nawe", Ali Kiba mu yitwa "Single", Vanessa Mdee na Roberto mu yitwa "Vitamin U", Joh Makini, Christian Bella, Khaligraph Jones, Eddy Kenzo, yaherukaga gukorana na Knowless mu yitwa "Uzagaruke".

Tom Close na Tricia bamaze imyaka ine barushinze, bafitanye abana babiri
Tom Close yatuye umugore we indirimbo y'urukundo yasohoye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza