00:00:00 IGIHE NETWORK KN KINYARWANDA EN ENGLISH FR FRANCAIS

Taramana na Mike Kayihura mu buryo bw’umuziki uryoheye amatwi (Video)

Yanditswe na Uwiduhaye Theos
Kuya 17 Kanama 2021 saa 09:58
Yasuwe :
0 0

Mu gihe ibitaramo bihuza imbaga y’abantu byahagaze bikaba bitemewe ko bahurira hamwe bari kunyurwa n’umuziki w’abahanzi batandukanye bakunda, IGIHE yatangije uburyo bwo gufasha abakunzi b’umuziki gukomeza kwizihirwa no kunyurwa n’abahanzi batandukanye bafite ubuhanga buhambaye yaba abazwi cyangwa abakizamuka.

Ni mu mujyo w’ibitaramo byiswe ‘Last Night’s Sessions’. Ni ibitaramo ngarukakwezi bizajya bitumirwamo abahanzi n’abahanga mu njyana zitandukanye bagataramira abantu mu muziki w’umwimerere.

Uwabimburiye abandi ni umunyempano Mike Kayihura ufite ubuhanga budasanzwe mu kuririmba no gucuranga piano.

Mu mashusho yafashwe y’iminota 21, Mike Kayihura agaragara ari gucuranga piano aniririmbira ndetse hari n’aho afashwa n’umusore witwa Akayezu J.Patient wacurangaga inanga. Mike Kayihura aririmba indirimbo ze zitandukanye mu ndimi zirimo Icyongereza n’Ikinyarwanda cyane ko ari zo asanzwe akoresha cyane mu bihangano bye.

Mike Kayihura wumvikanye muri ‘Last Night’s Sessions’ ari we muhanzi wa mbere aheruka gushyira hanze Extended Play (EP) y’indirimbo umunani. Iyi Ep yise "Zuba" avuga ko yatekereje kuyita gutya kuko hari umuntu ufite iryo zina z’ingenzi kuri we.

Ati “Nahisemo kuyita ‘Zuba’ kuri uwo ari umuntu udasanzwe kuri njye. Ntabwo igihe cyo kumuvuga kiragera kuko byaba ari ukwinjira mu buzima bwanjye bwite gusa arahari kandi abantu bazamumenya nibiba ngombwa. Iyi EP nibikunda neza izajya hanze muri uku kwezi kwa Kanama, gusa igihe ntabwo ndakimenya neza.”
Iyi EP ni iya kabiri ya Mike Kayihura nyuma yo gusohora indi yitwa “Barely Mixed” yasohotse mu 2019. Yari iriho indirimbo zakunzwe cyane nka “Kante”. Iyi nshya yakozwe na Madebeats.

Amashuri abanza Kayihura yayize muri La Colombière, aza gukomereza ayisumbuye muri Green Hills nyuma aza kujya kuba muri Kenya.

Yigeze kubwira IGIHE ko guhanga kwe yagiye agukura ku bahanzi batandukanye bakomeye hanze y’u Rwanda barimo Michael Jackson, Bob Marley n’abandi.

Uyu musore w’imyaka 29 yavuze ko yatangiye kuririmbira mu rusengero yibanda ku muziki wo kuramya no guhimbaza Imana, kuva ubwo ntiyigeze asubira inyuma mu muziki ndetse benshi mu bo basenganaga bagiye bamutera imbaraga aza kugera aho ajya mu muziki w’indirimbo zisanzwe.

Ni umwanditsi w’indirimbo, umuririmbyi akaba n’umucuranzi. Yavutse mu bana batatu ari uwa mbere mu bo bavukana ndetse akaba ari na we muhungu wenyine.

Mike Kayihura ni umwe mu bahanzi bafite ubuhanga buhambaye
Mike Kayihura aheruka gushyira hanze EP yitiriye umuntu udasanzwe

Reba indirimbo ziri kuri ‘Zuba’, EP nshya ya Mike Kayihura
https://open.spotify.com/album/7mRf3QiXlP5YL9HwHVQVE3?si=92StzmlbTuyo2efR2UcL8Q&utm_source=copy-link&dl_branch=1&nd=1


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .