Mani Martin yerekeje muri Kenya kumenyekanisha album ye nshya

Yanditswe na Dusabimana Aimable
Kuya 17 Gicurasi 2017 saa 10:09
Yasuwe :
0 0

Umuririmbyi Mani Martin yafashe indege yerekeza i Nairobi aho agiye mu bikorwa byo kumenyekanisha indirimbo yasohoye kuri album ye nshya yiganjemo ubutumwa bucyeza ibyiza by’umugabane wa Afurika.

Mani Martin ari mu bahanzi bo mu Rwanda bamaze igihe bari mu rugamba rwo kwagura umuziki uhakorerwa, yakunzwe mu ndirimbo zitandukanye zirimo iyitwa ’Baby Gorilla’, ’Same Room’ n’izo yahereyeho akiririmba izo kuramya no guhimbaza Imana.

Muri iki gihe Mani Martin akora umuziki awusanisha na gakondo mu gusigasira no kogeza umuco nyarwanda mu bihangano ndetse akanifashisha imiririmbire yo mu bindi bihugu bya Afurika nk’uko aherutse kubigenza kuri album nshya yise ’Afro’.

’Afro’ ni album ye ya gatanu kuko asanzwe afite izindi enye ziriho indirimbo ziganjemo izakunzwe imbere mu gihugu. Yahereye kuri album yise Isaha ya 9 yasohotse muri 2007, Intero y’Amahoro (2011) n’iyitwa My Destiny yaherukaga gusohora muri 2012.

Uyu muhanzi yatangarije IGIHE ko yatangiye ibikorwa byo kumenyekanisha hanze y’u Rwanda album ye nshya igizwe n’indirimbo zifite umudiho nyafurika.

Mani Martin yafashe indege yerekeza i Nairobi ku wa Kabiri tariki 16 Gicurasi 2017. Yavuze ko yiteguye kubyaza umusaruro uhagije urugendo rwe muri Kenya ndetse akazahahurira n’abantu batandukanye bazamufasha kumenyekanisha album ye nshya muri icyo gihugu.

Ati "Nerekeje i Nairobi mu rugendo rwo guhura n’itangazamakuru ryaho mu rwego rwo kumenyekanisha album yanjye ’Afro’. Nzakora ibiganiro bitandukanye kuri za radio, televiziyo, mpure na bamwe mu bahanzi baho."

Yongeyeho ko narangiza urugendo agiye kugirira i Nairobi, ateganya no kuzageza iyo album ye mu bihugu bitandukanye bituranye n’u Rwanda birimo Uganda, Tanzania n’igice kimwe cya Congo Kinshasa.

’Afro’ ni album igizwe n’indirimbo nka ‘Afro’ ikunzwe muri iyi minsi; iyitwa ’Ndaraye’; ‘Kalibagiza’, ‘Afrika Ndota’, ‘Kinyaga’, ‘Iyizire Chalala’ n’izindi zitandukanye, ifite umwihariko w’uko igizwe n’indirimbo ziri mu ndimi enye, Igifaransa, Ikinyarwanda, Icyongereza n’Igiswahili. Yabikoze agamije kugeza ubutumwa ku mubare wagutse.

Mani Martin yatangaje ko yatangiye ibikorwa byo kumenyekanisha hanze y’u Rwanda album ye nshya igizwe n’indirimbo zifite umudiho nyafurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza