Kuva Nairobi kugera i Kigali! Urugendo rwa DJ Infinity watangiye kuvanga imiziki mu tubyiniro yishyurwa 5 000 Frw

Yanditswe na Muhumuza Simeon, Uwiduhaye Theos
Kuya 27 Kanama 2019 saa 05:09
Yasuwe :
0 0

DJ Infinity uri mu bavanga imiziki bagezweho mu Rwanda yatangaje byinshi ku buzima bwe birimo ukuntu yaje mu Rwanda agatangira gukora mu kabari avanga imiziki ku 5 000 Frw.

Bitandukanye n’indi myaka muri iki gihe ubaze urutonde rw’abavanga imiziki mu Rwanda bwakwira bugacya.

Ni bamwe mu bantu bafasha abanyabirori kwizihirwa mu bitaramo bitandukanye no mu tubyiniro byahura n’umuntu wagasomye cyangwa se ukunda kwizihirwa by’ikirenga.

Uramutse ugiye mu kirori ukabura umuntu ugufasha ngo akuryohereza mu mvange y’imiziki itandukanye nta kabuza wataha ukubita agatoki, akaba aricyo gituma abakora aka kazi bafatwa nk’abongerera ibyishimo benshi.

Ntabwo bakora mu tubari no mu bitaramo gusa kuko usanga ku maradiyo na za televiziyo muri iki gihe bifashishwa cyane.

Umwe muri aba ni DJ Infinity uri mu bakundwa na benshi mu Rwanda.

DJ Infinity ubusanzwe witwa Alex Maina Njoroge amaze gucuranga mu bitaramo bikomeye birimo icya ‘New Year Countdown’ cyitabiriwe na Sauti Sol na Yemi Alade, icya Tekno i Kigali ndetse n’icya Meddy i Nyamata.

Usibye kuvanga umuziki mu tubyiniro dukomeye no mu bitaramo byitabirwa n’ibyamamare, DJ Infinity ni n’umwe mu bajya bacurangira abakunda Basketball mu mikino ibera kuri Petit Stade.

Uyu musore ubusanzwe ukomoka muri Kenya ni bucura mu muryango w’abakobwa batatu bavukana, bakorera muri Kenya aho avuka ndetse n’ababyeyi be niho baba.

Mushiki we wabaye Umuyobozi wa RwandAir ni umwe mu bamuzanye mu Rwanda anamufasha kumenyera byinshi atari azi.

Amaze imyaka itanu ageze mu Rwanda ndetse yagiye akora ahantu hatandukanye avanga imiziki. Yanyuze kuri Flash FM, TV 10, RBA na Envy Club yatangiriyeho kuvanga imiziki mu tubari, akajya ahembwa 5 000 Frw.

Yabwiye IGIHE ko yatangiye gukorera aya mafaranga ubwo yamaraga kuva kuri radiyo yakoragaho ati “Nyuma yo kuva kuri izo Radiyo nahise njya gukora muri Envy Club aho nishyurwaga 5 000 Frw yitwaga ay’urugendo. Ariko ntibyanciye intege kuko nzi icyo nashakaga.”

Avuga ko mu gihe cy’imyaka itanu amaze mu Rwanda avanga imiziki byari ibintu bikomeye kuri we.

Ati “Natangiye gukora ibyo kuvanga imiziki mu myaka itanu ishize, byari urugendo rwiza, rukomeye runasaba kwihangana gusa ikiba gikenewe ni ukuba ufite aho ushaka kugera.”

“Buri gihe habaho ibintu bishyira umuntu hasi n’ibimuzamura, ariko akazi ni akazi, hari igihe kigera ibintu bikagenda uko utabiteguye ukavuga uti kuki nkikora ibi bintu. Ni ibintu bibaho mu buzima ariko icya mbere ni ukuvuga uti ngomba kwiga ibi nkagira aho ngera.”

Ikitazwi na benshi kuri we ni uko yatangiye gukora akazi ko kuvanga imiziki yiyita DJ Bush arikuye ku wayoboraga Perezida wa Leta Zunze Ubumwe za Amerika, nyuma inshuti ye iza kumubwira ko iryo ritazagurisha ku isoko ry’umuziki aza kurihindura.

Dj Infinity yavuze ko umwihariko afite mu kazi akora ari ukuba agerageza kwihugura mu njyana zitandukanye ku buryo akora ku byiyumviro bya buri wese uri aho yataramiye.

Ati “Ngerageza kwiga buri kantu gato gashoboka mu kazi kanjye. Muri Kenya ubwo nari ndi mu ishuri ryo gukora umwuga wo kuvanga imiziki nari umwana ntwaza abandi ibikoresho. Nabigiyeho kuba bari bafite umwihariko wo kugira ubumenyi mu njyana zitandukanye niba udashobora kugera ku byifuzo by’amarangamutima ya buri muntu ntabwo byaba ari byiza.”

“Ukaba wamenya Country, Reggae, Pop … indirimbo utiyumvamo; kuko ntiwamenya umuntu ejo ashobora kuguhamagara akakubwira ati ndashaka ko uncurangira Bunjabi, indirimbo zo mu Buhinde ariko wajya kuri internet ukazishaka ukamenya ibijyanye n’izo ndirimbo.”

Agira inama abakizamuka bashaka kugera kure kwitonda bagatwara ibintu gake kandi bagasenga kuko ari kimwe mu bifasha umuntu ushaka kugera kure mu rugendo rwe.

Ati “Ntimwirukankishe ibintu. Ntuzabyuke ngo ujye kwiga kuvanga imiziki ngo nubimenya uhite uca igikuba ngo ni wowe wa mbere. Icya mbere ni ugutegereza. Ikindi iga ibintu byinshi bijyanye mu muziki. Ikindi senga Imana igufashe.”

DJ Infinity ni umwe mu bavanga imiziki bafite umwihariko kandi bakundwa na benshi mu Rwanda
DJ Infinity akunze kugaragara mu birori bitandukanye bikomeye

Video: Muhumuza Simeon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza