King James yasohoye amashusho y’indirimbo yakoreye muri Amerika agaragaramo Lamborghini

Yanditswe na Dusabimana Aimable
Kuya 8 Ukuboza 2017 saa 12:51
Yasuwe :
4 0

King James yasohoye amashusho y’imwe mu ndirimbo yakoreye muri Leta Zunze Ubumwe za Amerika, agaragaramo imodoka yo mu bwoko bwa Lamborghini iri mu zubashywe ku Isi ndetse itaboneka mu Rwanda.

Ruhumuriza James [King James] yerekeje muri Amerika kuwa 10 Nzeri 2017, amarayo amezi akabakaba abiri agaruka ku Cyumweru, tariki 3 Ukuboza 2017.

Uyu muhanzi avuga ko yari yarajyanywe no gukorerayo amashusho ya zimwe mu ndirimbo azasohora kuri album ya gatandatu yise "Meze Neza".

King James wari umaze igihe atari mu Rwanda yashyize ahagaragara amashusho y’indirimbo yise "Hari Ukuntu" ikubiyemo inkuru y’uburyohe ku musore wihebeye umukobwa, agerageza kumutera imitoma no kumubwira icyo amutekerezaho.

Amajwi y’iyo ndirimbo yatunganyirijwe mu Rwanda na Made Beat, amashusho akorwaho na Cedru na Shax.

Mu kiganiro na IGIHE, King James yavuze ko "Hari Ukuntu" ari yo asohoye mbere ariko hakaba hari n’izindi ndirimbo zigera kuri esheshatu yakoreyeyo azagenda asohora, zose zivuga ku rukundo n’ibyiyumviro by’abakundana.

Yagize ati "Igitekerezo cyo gukora iyi ndirimbo aho cyaturutse ni mu kugenda mpuza n’izindi ndirimbo ziri kuri album. Ubutumwa buyiriho muri rusange ni indirimbo z’urukundo zikubiyemo uburyo umuntu ashobora kuba mu rukundo ariko hari ibyo yibaza ku mukunzi we. Urebye indirimbo ziriho nyinshi ni ibibazo umuntu ashobora kwibaza aramutse akunda umuntu. Ushobora kwibaza uti ’Ese aracyakunda umuntu bakundanaga mbere? Hariho ibintu nk’ibyo, iyo urebye ni ryo zingiro."

King James yavuze ko yahisemo kujya muri Amerika gukorerayo amashusho y’iyi ndirimbo n’izindi zigize album ye nshya kubera ko yifuzaga gukora ibintu bitandukanye n’ibyo yari amaze iminsi akora. Anavuga ko yanifuje kongera gukorana na Cedru nk’umuntu wamukoreye amashusho ya mbere akinjira mu muziki.

King James avuga ku modoka ya Lamborghini igaragara mu mashusho yashyize hanze, yagize ati "Byaraduhenze cyane ariko ibijyanye n’amafaranga byo ntabwo mbiva imuzi ariko icyari ngombwa ni uko nagombaga kugenda nkakora ikintu mbona gishya kandi cyazashimisha abafana banjye, kikanatuma bishimira ibyo nakoreye hariya. Nagerageje gukora ibintu nkurikije uko numvaga abantu bazabyakira."

King James avuga ko album ye ya gatandatu, "Meze Neza", itaruzura neza ariko akizeza ko izasohoka vuba iriho indirimbo zirimo "Hari Ukuntu" yabimburiye izindi, iyitwa "Uri Mwiza", "Ese Uracyamukunda" n’izindi, zose hamwe ni umunani.

King James watangiye kumenyekana mu 2006, ni umwe mu bahanzi bakomeye mu Rwanda babashije kwegukana igihembo cya Primus Guma Guma Super Star gihabwa ukunzwe mu gihugu buri mwaka.

King James yasohoye amashusho y’indirimbo yise "Hari Ukuntu"
King James yasohoye amashusho y’imwe mu ndirimbo yakoreye muri Amerika, agaragaramo imodoka yo mu bwoko bwa Lamborghini iri mu zubashywe ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza