00:00:00 IGIHE NETWORK KN KINYARWANDA EN ENGLISH FR FRANCAIS

Ibyihariye kuri Somi ufite intumbero yo guteza imbere ubuhanzi mu Rwanda (Video)

Yanditswe na Uwiduhaye Theos
Kuya 30 Kamena 2021 saa 11:08
Yasuwe :
0 0

Laura Kabasomi Kakoma [Somi] ufite inkomoko mu Rwanda ni umwe mu bahanzi bafite izina rikomeye mu muziki wa jazz ku Isi ndetse biherutse gushimangirwa n’uko ku wa 24 Ugushyingo 2020 album ye yitwa ‘‘Holy Room’ yatumye ashyirwa ku rutonde rw’abahatanira ibihembo bya Grammy Awards 2021, byatanzwe mu ntangiro z’uyu mwaka.

Uyu muhanzikazi yari ahatanye mu cyiciro cya cya Best Jazz Vocal Album yari ihatanye n’izindi enye zirimo; ‘Ona’ ya Thana Alexa, ‘What’s the Hurry’ ya Kenny Washington, ‘Modern Ancestors’ ya Carmen Lundy mu gihe iya ‘Secrets Are the Best Stories’ ya Kurt Elling ari yo yegukanye igihembo.

Somi ni umwe mu banyarwanda bakora umuziki ku rwego mpuzamahanga babashije guhatana muri ibi bihembo bijyamo umugabo bigasiba undi ndetse kuba ataregukanye igihembo avuga ko ntacyo bitwaye kuko no kuba yarahatanye byonyine kuri we ari intsinzi ikomeye.

Grammy Awards yahatanagamo ni ibihembo ngarukamwaka bitangwa hagamijwe gushimira abantu bo mu ruganda rw’imyidagaduro bitwaye neza.

Mu 2018 yegukanye NAACP Award mu cyiciro cya album nziza y’umwaka abikesheje iyo yise ‘Petite Afrique’.

Uyu muririmbyi ukomeye w’imyaka 40 ni mwene Dr. Ibulaimu Kakoma ukomoka muri Uganda na Elizabeth Nyarubona Kakoma wo mu Rwanda. Mu by’amashuri, Somi afite icyiciro cya gatatu cya kaminuza mu bijyanye n’ubuhanzi, yavanye muri New York University’s Tisch School of the Arts.

Somi yakuriye muri Leta Zunze Ubumwe za Amerika. Yamamaye cyane mu njyana ya Jazz ndetse afitanye amasezerano n’inzu itunganya umuziki ya Sony Music basinyanye muri Kanama 2013, i New York, aho asanzwe akorera ibikorwa bye bya muzika.

Aheruka gukora album yise ‘Zenzile: The Reimagination of Miriam Makeba’ yatuye Miriam Makeba kubera umusanzu yatanze mu muziki ndetse n’uko yahirimbaniye uburenganzira bwa muntu.

Uyu muhanzikazi mu kiganiro yagiranye na IGIHE yahishuye byinshi kuri we no ku muziki.

IGIHE: Gushyirwa mu bahatanira ibihembo bya Grammy Awards 2021, wabyakiriye gute ?

Somi: Niyumvagamo ko ari byiza cyane[…] byari ahantu heza ho kungaragaza no kwishimira nyuma y’umwaka twahuriyemo n’icyorezo. Kugira icyo wishimira muri iki gihe ni umugisha mu by’ukuri. Ni ibyishimo byankoze ku mutima.

Wadusangiza ku rugendo rwawe mu muziki ?

Navuga ko nari umuririmbyi w’umwuga n’umwanditsi w’indirimbo. Ntabwo nzi imyaka yaba ishize ariko navuga ko indirimbo yanjye ya mbere yagiye hanze mu 2003. Nari nkiri gushakisha ijwi ryanjye, nshaka icyo kuvuga. Hashize imyaka 18, ndi mu rugendo rwo guhinduka umuhanzi mpuzamahanga no kuba umuhanzi w’umunyamwuga.

Ni iki wavuga kuri album yaguhesheje amahirwe yo guhatana muri Grammy Awards ?

Album ‘Holly Room’ nayikoze mu buryo bwa live, nayifashe muri Gicurasi 2019. Yari imeze nk’igitaramo ariko na none atari cyo. Ntabwo nari mfite igitekerezo cyo kuzayisohora gutyo nta n’ubwo nari nziko izampesha amahirwe nk’ayo nabonye kubera yo. Ariko uyu mwaka byari ibitangaza kandi birakomeje ndashima cyane.

Nandikiye e-mail band yamfashije nyishimira kubera ko buri gihe icyo mbonye andi mahirwe aturutse kuri uwo muziki cyangwa iryo joro ndashima.

Wahisemo gute kuririmba Jazz ?

Jazz ni icyumba ninjiyemo ku mpanuka. Ntabwo natekerezaga kuba umuririmbyi wa Jazz. Mu nzira nyinshi ntabwo ndi umuhanzi gakondo wa jazz ntabwo ndi umuntu uririmba ibyo bamwe bita ‘jazz standards’. Ndi umwanditsi w’indirimbo, rero jazz ni igice kigize umuziki nandika gusa nganzwa cyane na jazz.

Ntekereza ko impamvu ninjiye cyane muri Jazz ari uko impuza cyane n’uwo muryango w’abayikunda. Muri Amerika nzwi nk’umuririmbyi wa jazz n’ahandi hose ni uko nzwi. Ntekereza ko icyo jazz ivuze kuri njye ni uburyo bumwe bwo kwisanzura, ni ubwoko bw’umuziki bugusaba kuririmba bitunguranye ibyo utateguye. Izindi njyana ntabwo zisaba umuntu kuririmba mu buryo butunguranye ibintu atari yateguye nta n’ubwo zibamo ubwisanzure nka yo.

Amateka cyangwa ibigwi bya jazz ni uko yo ahubwo yaturutse ku kuririmba ibintu bitunguranye bitewe n’uko wiyumva kandi ntekereza ko nk’umugore w’Umunyafurika wakuriye cyane muri Amerika uri muri byinshi ku isi yose hagati y’ibyo yabonye muri sosiyete ndetse no ku muco uba ugomba kuririmba muri ubwo buryo.

Ni iyihe album yawe ifite umwihariko ujyanye na Afurika ?

Nasohoye album mu 2018 yitwa ‘Petite Afrique’. Ni iyo guha icyubahiro sosiyete y’abimukira b’abanyafurika barimo abo muri Afurika mu Burengerazuba bwayo, abavuga Igifaransa ndetse n’abo muri Islam bo muri Harlem mu Mujyi wa New York.

Mba muri Harlem ndetse ni na ho nahoze mba kuva kera imyaka myinshi. Navuga ko hanze ya Afurika Harlem iri mu duce two kwishimirwa cyangwa se imijyi ariko na none si mu mijyi ahubwo iri mu baturanyi b’umuco nyafurika.

Abantu benshi bari kuhimurwa cyane abanyafurika b’abimukira bahamaze igihe kirenga ibinyacumi bine. Njye nk’umunyafurika w’umwimukira navuga ko ntazigera mfata uko niboneye ukwitanga kw’abirabura b’abimukira.

Ntabwo nzigera ntesha agaciro ukwitanga abo bantu bakoze muri serivisi zitandukanye akenshi ku miryango yabo. Buri kintu basize, icyo bashakaga kubaka ariko bagaterwa hejuru byakomeje kuba ibibazo.

Rero mu by’ukuri ‘Petite Afrique’ nafashe igice cy’abanyafurika baba muri Harlem mbagereranya n’agace gato ka Afurika kari muri uwo Mujyi. Byari uguha icyubahiro abimukira ba Afurika.

Uretse umuziki hari ibindi bijyanye n’ubuhanzi uteganya gukora ?

Reka mvuge ko ninjiye muri ‘théâtre’. Mperuka gushoramo imari ndetse buri gihe nakundaga ibijyanye na ‘théâtre’. Ntekereza ko impamvu mbikunda ari uko ho haba harimo uburyo bwinshi bwo kureba inkuru.

Mperuka kwandika ku Munyafurika y’Epfo Mirriam Makeba wubatse amateka mu muziki akaba n’impirimbanyi mu burenganzira bwa muntu. Ndamwishimira cyane ndetse nagiye mureberaho mu buryo butandukanye nari maze igihe kirenga imyaka itanu ntegura ‘theatre’ ya Mirriam Makeba. Ubuzima nibugaruka uyu mwaka dushobora gukora ibitaramo ahantu hatandukanye tuyikina kuko ndi gupanga uko byazakorwa.

Ni iyihe nama wagira abakobwa bashaka kugera ku nzozi zabo ?

Icyo nabwira abakobwa b’abiraburakazi bakiri bato ukumvira imitima yabo. Bakamenya ko buri kintu cyose gishoboka. Icyo navuga ni uko inzozi za buri wese zifite agaciro kandi hari umwanya. Niba ubona uwo mwanya nta nzira irimo, wowe wayica ubwawe.

Hari abahanzi mujya muvugana bo mu Rwanda ?

Mfite umuryango w’abahanzi batandukanye hano muri Kigali mpora ngerageza kuganiriza. Mbabaza ibikenewe, ibintu bishobora kuryohera abantu mbese hari abantu benshi bakora umurimo uhambaye mu buhanzi ubwo ari bwo bwose.

Nanjye nshaka gutanga umusanzu, ndi gukoresha iki gihe nita cyane ku hantu hari ibyuho, ahari amahirwe ndetse n’aho nafasha abantu cyane kurushaho.

Bishobora kuba kuganira cyane n’abahanzi bakiri bato no kubereka ko mpari ngo mbagire inama mu buryo ubwo aribwo bwose. Mfite inzozi zo kugira ikintu ndema hano cyane nko kuba nakora Jazz Festival. Kuba umwe mu batanga umusanzu mu kuzamura uburezi mu buhanzi atari ukugira ngo buri wese abe umuhanzi ahubwo ari ukugira ngo abantu bagire ibitekerezo byagutse bakiri bato.

Muri buri kintu umuntu ahisemo agatekereza mu buryo bwagutse cyane nibwo bwiza bw’ubuhanzi. Butuma dufunguka mu mutwe no mu mitima mu buryo bwiza cyane.

Somi ari mu bahanzi bafite umuziki ukundwa n'abihebeye Jazz
Somi avuga ko atatekerezaga ko azaba umuririmbyi wa Jazz
Somi ni umwe mu baririmbye bakomoka mu Rwanda bamaze guhatana mu bihembo bikomeye birimo na Grammy

Amafoto: Chris Schwagga


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .