Chorale de Kigali igiye gukora igitaramo gikomeye cyo gufasha abantu kwinjira muri Noheli

Yanditswe na Dusabimana Aimable
Kuya 8 Ukuboza 2017 saa 07:08
Yasuwe :
0 0

Chorale de Kigali imaze imyaka irenga 50 yogeza ubutumwa bwiza binyuze mu ndirimbo, yateguye igitaramo gikomeye gitegerejwe mbere ya Noheli mu gufasha abantu kwinjira mu minsi mikuru bayobowe n’Imana.

Ni igitaramo kizwi nka "Christmas Carols Concert" kiba mu mpera za buri mwaka kuva mu 2013, kigamije kwinjiza abantu neza muri Noheli no kubafasha kwizihiza iminsi mikuru isoza umwaka no gutangira umushya.

Umuyobozi wungirije wa Chorale de Kigali, Rukundo Charles Lwanga, yabwiye IGIHE ko muri icyo gitaramo bazibanda ku ndirimbo nziza za Noheli zifite amateka ariko bakanaririmba n’izindi zakozwe n’abahanzi bakomeye ku Isi zibwiriza ubutumwa bwiza.

Yagize ati "Imyiteguro imeze neza, kugeza ubu abaririmbyi baritabiriye indirimbo barazifashe ndetse ubu barimo kunoza gusa, kugira ngo bazashimishe abazitabira igitaramo. Igitaramo nk’iki tugitegura nk’amezi atandatu, guhera muri Kamena twari turimo kugitegura, hari byinshi twagezeho mu myiteguro."

Yongeyeho ati "Buri mwaka tugerageza gushaka umwihariko, icyo navuga muri uyu abakunzi bacu batari barabonye ni uko harimo indirimbo bazabona ihujwe n’umukino, yakuwe muri Opera, baririmba banakina nk’ikinamico. Ikindi tuzaha umwanya abana bacu bazi kuririmba, twabahaye umwanya wo kwitoza ku buryo bazaririmba abantu bakanyurwa."

Yavuze ko Chorale de Kigali itegura iki gitaramo ngarukamwaka cya "Christmas Carols Concert" hagamijwe gufasha abantu kwinjira neza muri Noheli ariko banabafasha gusoza umwaka neza no gutangira undi mushya neza. Yavuze ko ari gitaramo kiba cyaratewe inkunga n’abantu batandukanye bazirikana kandi bifuza gukomeza imikoranire na bo mu kurushaho guteza imbere umuziki ukoranywe ubuhanga.

Iki gitaramo kigiye kuba ku nshuro ya gatanu giteganyijwe kubera mu ihema rya Kivu Hall muri Kigali Conference and Exhibiton Village [hahoze hitwa Camp Kigali], ku itariki 17 Ukuboza 2017 guhera saa kumi n’ebyiri zuzuye ku mugoroba. Kwinjira ni 5000 Frw mu myanya isanzwe, mu myanya y’imbere bikaba 10000 Frw.

Mu 1966 nibwo iyi Korali yashinzwe n’abakirisitu Gatolika b’abagabo barimo Saulve Iyamuremye, Muswayire Paulin wari umwarimu muri Kaminuza Nkuru y’u Rwanda, Mbarushimana Leon, Gabriel Gatera, Karangwa Claver wakoraga kuri Radio Rwanda n’abandi bari bavuye mu mashuri ya Kiliziya Gatolika cyane cyane Iseminari. Ibarizwa kuri Katederali yitiriwe Mutagatifu Mikayile (Saint Michel).

Muri Kamena umwaka ushize, Chorale de Kigali iri mu zizwiho ubuhanga buhebuje no kuba igicumbi cya muzika yanditse mu buryo bw’amanota, yakoze ibirori bikomeye byo kwizihiza Yubile y’imyaka 50, byahuriranye n’umunsi mukuru Kiliziya yizihizaho ijyanwa mu ijuru rya Bikira Mariya ‘Assomption’, uba buri wa 15 Kanama.

Chorale de Kigali iri mu zizwiho ubuhanga buhebuje no kuba igicumbi cya muzika yanditse mu buryo bw’amanota

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza