Byumvuhore agiye gutaramira mu Rwanda nyuma y’imyaka ine

Yanditswe na Muvunyi Arsène
Kuya 6 Nyakanga 2019 saa 12:17
Yasuwe :
0 0

Umuhanzi wakanyujijeho mu bihe byahise Byumvuhore Jean Baptiste ategerejwe mu Rwanda aho azaririmba mu bitaramo byo kwizihiza yubile y’imyaka 100 ya Padiri Fraipont Ndagijimana washinze ikigo cy’abafite ubumuga cya HVP Gatagara.

Tariki 11 Ukwakira 2019 hazaba huzuye imyaka 100 padiri Fraipont Ndagijimana washinze ikigo cya HVP Gatagara abonye izuba nubwo yataburutse afite imyaka 63.

Uyu mupadiri wakomokaga mu Bubiligi yageze mu Rwanda mu 1957, nyuma y’imyaka itatu atangiza ikigo cyahinduye ubuzima bwa benshi mu bafite ubumuga giherereye mu karere ka Nyanza.

Iki kigo cyarerewemo abantu benshi bafite ubumuga, bagarurirwa icyizere bariga bavamo abantu b’ingirakamaro mu gihugu. Kuri bo padiri Fraipont Ndagijimana bamufata nk’intwari y’ikirenga ku byo yabakoreye.

Muri uyu mwaka bazaba bizihiza yubile y’imyaka 100 yari kuzaba yujuje iyo aba akiriho.

Uwitwa Nyirangabe Sawiya uri mu barerewe i Gatagara yabwiye IGIHE ko mbere y’ibi birori hateguwe ibitaramo bibiri byo gukusanya inkunga yo gufasha iki kigo n’ubundi gikomeje kwita ku buzima bw’abafite ubumuga.

Ati “ Ni nk’igikorwa cy’urukundo. Twifuza ko ababishoboye bose batera inkunga Gatagara.”

Igitaramo kimwe kizabera muri Camp Kigali tariki 30 Kanama 2019, ikindi kibera muri Stade ya Muhanga bukeye bwaho.

Ibi bitaramo bizasusurutswa n’abahanzi bakanyujijeho mu bihe byatambutse nka Orchestre Impala, Mavenge Soudi na Byumvuhore Jean Baptiste uba mu Bubiligi.

Iki gitaramo gifite umwihariko kuri Byumvuhore Jean Baptiste kuko nawe ari umwe mu barerewe i Gatagara akanahigira umuziki nyuma akanahakora.
Nyirangabe yagize ati “azaza nk’umwana waharerewe, we ntabwo ashaka kuza nk’icyamamare , icyamamare uyu mwaka ni padiri Fraipont.”

Byumvuhore Jean Baptiste yahanze indirimbo nyinshi cyane zakunzwe n’abanyarwanda cyane cyane bitewe n’ubutumwa bukomeye burimo. Izo zirimo “Fagitire”, “Urwiririza”, “Usize nkuru ki” n’izindi.

Byumvuhore yaherukaga gutaramira mu Rwanda ubwo habaga igitaramo cyo kwibuka Padiri Fraipont Ndagijimana mu 2015.

Byumvuhore yaherukaga gutaramira mu Rwanda mu 2015
Byumvuhore ni umwe mu bahanzi b'abanyarwanda bamaze igihe bafite indirimbo zakunzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza