Nyuma y’imyenda avugwaho Young Grace yarigitiye ahatazwi

Yanditswe na

Munyengabe Murungi Sabin

Kuya 14 Mata 2015 saa 03:32
Yasuwe :
0 0

Abayizera Marie Grace uzwi nka Young Grace mu muziki ntakiba mu Mujyi wa Kigali ndetse biragoye cyane kumenya amakuru y’ahantu aherereye, kumufatisha ku murongo wa telefone cyangwa irindi tumanaho iryo ari ryo ryose akoresha na byo ni ingorabahizi.

- Biragoye kumuca iryera mu Mujyi wa Kigali
- Yasize amaganya kuri WhatsApp ajya ahatazwi n’uwo ari wese
- Yaba yarahunze amadeni yariye akabura ubwishyu
- Yagiye mu mwiherero wo kwishakamo ibisubizo
- Yaba yaruriye rutema ikirere ikamwerekeza…..

Hashize ibyumweru bikabakaba bibiri isura ya Young Grace itagaragara mu Mujyi wa Kigali ndetse na telefone ye igendanwa yayiriye urwara. Intandaro ya byose, ni ideni riremereye bivugwa ko uyu mukobwa afitiye umwe mu bacuruzi b’i Kigali wamwizeye akamuguriza miliyoni ebyiri z’amafaranga y’u Rwanda ariko kuryishyura bikamubera ingume.

Intandaro ya byose ngo ni umwenda wa miliyoni ebyiri

Amakuru yizewe IGIHE ikesha bamwe mu bazi ibya Young Grace, yemeza ko hari umucuruzi wahaye Young Grace miliyoni ebyiri z’amafaranga y’u Rwanda bemeranywa itariki n’ukwezi uyu mukobwa yagombaga kwishyuriraho aya mafaranga ariko ubukene buramwitambika ntiyabasha gusubiza ibyo yahawe uko babisezeranye.

Nyiri guha Young Grace aya mafaranga yakomeje kumushyiraho igitutu ngo amwishyure undi abuze uko abigenza amusinyira sheki ya miliyoni ebyiri. Undi agihabwa iyi sheki, feri ya mbere yayifatiye kuri banki yizeye neza ko agiye kubikuza umutungo we nyamara ntibyakunze kuko akigerayo bamubwiye ko nta faranga na rimwe uyu mukobwa afite kuri konti.

Uyu mugabo ngo amaze kubona ko Young Grace yamupfunyikiye amazi yahise ajyana ikirego muri Polisi kugira ngo ikurikirane uyu mukobwa. Amakuru agera kuri IGIHE yemeza ko Young Grace yaba yarafashe umwanzuro wo kuva i Kigali nyuma yo kumenya ko ari gushakishwa n’inzego z’umutekano.

Yarigitiye ahatazwi atinya kuryozwa ibyo yariye

Umwe mu batangabuhamya bazi ibya Young Grace waganiriye na IGIHE yasobanuye ko uyu mukobwa amaze kubona ko ibintu bitameze neza kuri we mu Mujyi wa Kigali ngo yahise ajya iwabo mu Mujyi wa Rubavu gusa ngo agezeyo naho yasanze hari ibindi birego by’abandi bantu na bo bivugwa ko yambuye.

Mu kiganiro twagiranye na CSP Emmanuel Hitayezu, Umuvugizi wa Polisi mu Burengerazuba, yavuze ko nta kirego azi uyu mukobwa akurikiranyweho. Abajijwe niba koko imodoka ya Young Grace yaba ifungiwe muri Polisi y’Uburengerazuba na byo yavuze ko nta makuru abifiteho.

Musaza we babanaga mu nzu nta gisubizo afite

Twagerageje gushaka Young Grace ku murongo wa telefone ntiyaboneka mu bihe bitandukanye yahamagawe mu minsi ibiri yabanjirije isaha iyi nkuru yasohokeye. Nyina umubyara na we ujya umuvugira rimwe na rimwe mu itangazamakuru na we telefone ye ntiboneka ku murongo.

Umusore ukurikira Young Grace na we ntazi aho mushiki we aherereye

Mu kiganiro twagiranye na King Philosophe, musaza wa Young Grace banabana mu nzu imwe i Nyamirambo, yavuze ko aheruka guca iryera mushiki we mu byumweru bikabakaba bibiri bishize. Ngo baherukana i Kigali Young Grace amubwira ko agiye kujya ahantu muri gahunda atamumenyesheje.

Yagize ati “ntabwo nzi ahantu ari pe, ubwo mperukana na we yambwiye ko ngo agiye muri deals(gahunda) ze ariko ntabwo mbizi. Nanjye numva telefone ye ifunze, sinzi ahantu ari”

Abajijwe amakuru ya nyuma afite kuri mushiki we cyangwa niba yaba azi amerekezo aherereyemo, yasubije agira ati “Naba nkubeshye. Ntabyo nzi”. Musaza wa Young Grace kandi ngo ntabwo azi niba mushiki we hari imyenda akurikiranyweho ndetse ngo nta makuru ahagije na we amufiteho nubwo bavukana.

Producer Bagenzi Bernard, Umuyobozi wa Incredible Label ari na we ukurikirana ibikorwa bya Young Grace mu muziki, yavuze ko na we amuheruka mu byumweru bibiri bishize. Ngo umunsi baherukana yamubwiye ko ashaka kujya iwabo mu Mujyi wa Rubavu ariko nta ’nta byinshi yamubwiye ku rugendo rwe cyangwa izindi gahunda zari zimujyanye’.

Muri iyi minsi asa n'uremerewe n'ibibazo

Iby’uyu mwenda wa miliyoni ebyiri ngo Bernard Bagenzi na we ntabyo azi.

Yaba aherereye muri Congo

Musaza wa Young Grace na we yashimangiye ko uyu mukobwa ashobora kuba yaragiye hanze ariko ngo ntazi neza icyerekezo yafashe. Ati “Wasanga yaruriye indege, sinzi tu”

Uyu mukobwa ngo yaba asigaye yibera muri Congo

Hari amakuru avuga ko Young Grace yaba asigaye yibera muri Repubulika Iharanira Demokarasi ya Congo ndetse na we ubwe mu magambo aheruka kwandika kuri Instagram na WhatsApp, harimo ubutumwa busigura ko inzira yaciyemo agenda ari iy’ikirere gusa ntiyavuze ahantu agiye.

Yasize imvugo zisigura agahinda…

Mu magambo ya nyuma Young Grace yanditse kuri WhatApp ku itariki ya 29 Werurwe 2015 yagaragazaga ko agiye kujya kuba ahantu ha wenyine kandi bimugoye kubyakira. Yagize ati “Ntabwo nzashobora kuba njyenyine, nzabakumbura murabeho kandi ndabakunda cyane”

Kuri Instagram ni amaganya gusa

Kuri Instagram na ho ni yo magambo yagiye yandikaho kenshi akagaragaza ko afite ibintu bimubereye umutwaro ukomeye mu buzima kandi bigoranye kuba yabibonera igisubizo.

Kuri WhatsApp naho ni amaganya gusa
Yari amaze iminsi mike aguze imodoka gusa ubu ibibazo ni urudubi

Twitter: @murungisabin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza