Kwamamaza

Perezida Museveni yahaye isambu Theo Bosebabireba?

Yanditswe kuya 31-10-2016 saa 10:20' na Munyengabe Murungi Sabin


Umuririmbyi Théogène Uwiringiyimana wamamaye mu ndirimbo zihimbaza Imana ku izina rya Bosebabireba amaze igihe yibanda cyane muri Uganda aho bivugwa ko afite isambu n’ibindi bikorwa bibyara inyungu.

Theo Bosebabireba yubatse izina cyane mu ndirimbo nka ‘Icyifuzo’, ‘Bugacya’ ,‘Bosebabireba’ n’izindi. Yatangiye gukora cyane ingendo z’urukurikirane muri Uganda mu mpera za 2015 kugeza ubwo mu ntangiriro za 2016 yashyizwe mu bakoreshwaga mu bikorwa byo kwamamaza Perezida Museveni.

Uyu muhanzi yari mu bakangurambaga b’ishyaka NRM bamamazaga Perezida Museveni mu matora y’Umukuru w’Igihugu. Yakoreshejwe mu duce tw’icyaro, bamwifashishije nyuma yo kumubona aririmba mu rusengero ahitwa i Mubende.

Nyuma yo kugaruka mu Rwanda yabwiye IGIHE ko yishimiye bidasanzwe kuririmbira imbere ya Perezida Yoweri Museveni n’umugore we Janet Museveni ubwo yari mu gace kitwa Bukuya yimamaza. Ni amateka akomeye avuga ko yanditse mu muziki we ndetse yatunguwe n’uburyo indirimbo ye “Ibigeragezo si karande” izwi muri aka gace.

Ati “Ntibyari bisanzwe kuririmbira imbere y’Umukuru w’ikindi gihugu, nabiherukaga i Burundi nko mu myaka ine ishize. Aho hantu naririmbiye Perezida Museveni yari ahari, n’umugore we naramubonye, naririmbye bandeba.”

Mu byavuzwe cyane ku ngendo za The Bosebabireba muri Uganda hari ibyahwihwishwe ko impamvu nyamukuru asigaye yibanda muri iki gihugu ngo ni uko ahafite ibikorwa bibyara inyungu yatangiye ndetse ko hari n’isambu nini Perezida Museveni yamukatiye.

Mu Kiganiro na IGIHE, Theo Bosebabireba yavuze ko ibivugwa bitandukanye n’ukuri ndetse ko igituma akunda kujya muri iki gihugu ari umuziki no gusura inshuti amaze kuhagira.

Yagize ati “Maze kugira abafana benshi muri Uganda, indirimbo zanjye barazikunda, niba ari uko hari abantu benshi bavuga Ikinyarwanda sinzi ariko barazikunda. Kuba njyayo kenshi ntabwo ari ukuhakunda, hariya mpafite inshuti, ni naho nkorera umuziki kenshi, abantu ba hariya bakora neza. Ikindi kandi mbafite abantu benshi bantumira mu bitaramo bakishyura amafaranga menshi nanjye ngahembwa neza ngataha.”

Yahakanye yivuye inyuma ibivugwa ko Perezida Museveni yamuhaye isambu mu gace kitwa Mubende gusa yemera ko hari abantu bamugabiye inka eshatu zimwe bazivunja mu mafaranga izindi bazimusangisha mu Rwanda.

Theo Bosebabireba asigaye akorera ingendo nyinshi muri Uganda

Yagize ati “Ntabwo ari ukuri, ibyo muzumva bavuga byose burya ntabwo biba ari ukuri, abantu bavuga ibyo bashatse […] Oya nta sambu yampaye, ibyo ntabwo ari byo. Nta kintu yampaye, ariko hari abantu bampaye inka, bamwe bazimpereye inaha abandi bazivunjamo amafaranga.”

Theo Bosebabireba yavuze ko afite imishinga mishya y’umuziki azashyira hanze vuba ndetse no yihaye intego ikomeye yo kongera ireme ry’umuziki we aho ashaka ko guhera mu mwaka utaha wa 2017 azatangira kwiga gucuranga gitari na piano agahinduka umuhanzi w’umunyamwuga.

Umuririmbyi Theo Bosebabireba

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved