Kwamamaza

Akenyereye ku gahinda yavanye muri nyakatsi, yabaye icyamamare “Bosebabireba”

Yanditswe kuya 24-10-2016 saa 09:35' na Munyengabe Murungi Sabin


Inkuru y’ubuzima bwa Uwiringiyimana Théogène [Theo Bosebabireba] ni umwihariko mu bahanzi baririmba izihimbaza Imana, iyo akubwira ibye n’umuryango we ndetse n’icyerekezo afite azibiranywa n’ikiniga amarira agatemba ajya mu nda.

- Yakuriye muri nyakatsi akora ibiraka byo gucukura imisarane
- Yanyoye ibiyobyabwenge by’amoko anyuranye
- Yagotomeye ku nkongoro irura cyane kuva mu 2003
- Ntarashira umunaniro yakuye mu mishike yahinze
- Iyo avuga amateka ye, ikiniga kimurusha ingufu akihagararaho nk’umugabo
- Ibaze gushyingura umubyeyi mu isanduku irangaye?
- “Ikiza urubwa” kandi koko “nta kure Imana itakura umuntu”

Theo Bosebabireba amaze imyaka icumi aririmba, umuziki we wasakaye henshi mu Rwanda. Ni umuhanzi uri mu b’imbere bakunzwe bikomeye kubera ubutumwa bwomora imitima y’abumva ibihangano bye. Yakunzwe bikomeye mu ndirimbo zakanyujijeho zirimo ‘Ikiza urubwa’, ‘Ibigeragezo si karande’, ‘Bosebabireba’, ‘Ingoma’ n’izindi.

Ni umuhanzi uri mu ba mbere bakunzwe bidasanzwe ariko afite amateka yihariye ndetse mu muziki we yibanda ku bibazo yanyuzemo kuva akibana na nyina muri nyakatsi n’urundi rukurikirane rw’ibibazo yanyuzemo kugeza amenyekanye.

Mu kiganiro cyihariye na IGIHE, yavuze birambuye ku mizi y’umuziki we n’uruhurirane rw’ibibazo yakuriyemo. Mu kuvuga ku by’ubuzima yanyuzemo mu cyaro bimuremerera, akoresha imvugo yumvikanamo agahinda ndetse hari n’ubwo ananirwa kwihangana amarira akazenga mu maso gusa akiyumanganya.

Theo Bosebabireba yavutse ku itariki 3 Nyakanga 1977, yavukiye ahahoze hitwa i Kibungo ubu ni mu Karere ka Kayonza mu Cyinzovu. Ubu atuye i Kigali ku Gisozi mu Karere ka Gasabo.

Yatangiye gusogongera ku nkongoro y’uruhuri rw’ibibazo byiganjemo ubuzima bubi yabanagamo na nyina mu nzu ya muviringo y’ibyatsi agakorwa mu bisebe na se wihakanye nyina.

“Nakuriye mu buzima bw’agahinda gusa, nababaye bihagije nkiri muto, iwacu twabaga muri nyakatsi mu buzima bubi cyane. Nacukuraga imisarane, nikoreye imizigo, nahingiye abantu, nabaye umukozi wo mu rugo….”

Umukozi wo mu rugo i Kigali…

Theo Bosebabireba yaje i Kigali bwa mbere mu 1997 aje gukora akazi ko mu rugo gusa ntikamuhiriye kuko yirukanwe rugikubita. Yatonzwe bikomeye n’ubuzima bwo mu mujyi kuko yari amaze imyaka igera kuri 20 aba mu cyaro, aho yari amenyereye cyane guhinga, gucukura imisarane no kwikorera imizigo gusa.

Ati “I Kigali nahaje mu bihe bitandukanye nje gushaka ubuzima. Bwa mbere naje nzanwe n’umuntu wanshakiye akazi ko mu rugo, akazi karananiye kuko ubuzima bwo mu cyaro butandukanye n’ubwo mu mujyi. Iwacu nakuze turyama ku musambi ugeretse hejuru y’ibyatsi, twabaga mu nzu y’ibitaka ariko i Kigali nahasanze sima, habaga abasirimu […] Akazi karananiye burundu baranyirukana.”

Ubwo wahise usubira gucukura imisarane mu cyaro?

T.B: Nasubiyeyo, nagiriyeyo ibibazo, ariko nyuma naje kugaruka mara imyaka itatu i Kigali. Nari umuzunguzayi, nacuruzaga imiti y’imbeba, sentoni, imbuma, inshinje, inzembe, ibikwasi…Kugira ngo ugurishe byasabaga gusakuza cyane uvuga urutonde rw’ibyo ufite. Narasakuzaga cyane nkabira ibyuya, bamwe baranyumvaga bagaseka bakansubirishamo kugira ngo baseke gusa.

Ndumva warahise utangira kubona icyashara?

T.B: Umva na we ra! Ubuzima bwari bubi cyane nta n’inyungu y’amafaranga magana atanu nabonaga ku munsi. Ibyo byarananiye nsubira mu cyaro guhingira abantu, nakomeje ibyo gucukura WC. Ibaze ko hari abo nahingiraga bakanyambura, ubuzima bwakomeje kugenda nabi.

Inkongoro irura cyane yayisogongeye muri 2003

Ubuzima bw’i Kigali bumaze kwanga yasubiye mu cyaro nyuma y’igihe gito ahagana muri 2003 nyina arapfa asigara arera mushiki we umugwa mu ntege. Icyo gihe ibibazo byarushijeho kwiyongera biturutse ahanini kuri se wabihakanye.

Ati “Urumva n’ubuzima twabagamo mbere tukibana na mama bwari bubi, amaze gupfa twasigaye twenyine njye na mushiki wanjye muto na we yavukanye ubumuga bwo kutagira amaboko, ibibazo byarushijeho kwiyongera. Uwo Papa na we yakomeje kutwihakana, ibibazo biba byinshi…”

Mu mihango yo gushyingura nyina wa Theo Bosebabireba byabaye ingorabahizi kubona imbaho zifashishijwe mu gukora isanduku bamushyinguyemo kubera ubukene.

Ati “Umunsi wo kumushyingura abantu bateranyije amafaranga yo kugura imbaho amafaranga arashira isanduku ntiyuzura, ndibuka ko hari agatebe k’urubaho karekare bunze ku isanduku kugirango umurambo utagaragara, byari ibibazo.”

Yongeraho ati “Ibaze ko mama yapfuye iwacu tutaragira ubushobozi bwo kugura matola yo kuryamaho, twaryamaga ku misambi n’ibirere[by’insina]. Ubuzima bwari bubi bikabije […] Nanjye nta mashuri nagiraga ngo mbe nashaka akazi kazima, nakoraga ibyo byo guca incuro gusa.”

Koko se ntiwakandagiye mu ishuri?

T.B: Ni nk’aho ntageze mu ishuri, njye nize kera mbere ya Jenoside. Nagarukiye mu wa Gatatu naho sinaharangije, ubwo nize amashuri atatu abanza.”

Isomo wararyumvaga se ukiri mu ishuri?

T.B: Nari mfite impano itari ukwiga gusa, hari igihe navaga mu ishuri ngataha nkaba namara igihembwe ntagarutse kwiga. Kera nari umuhanga mu gukina umupira, igihe cyarageraga abarimu bakangarura ku ishuri iyo babonaga hagiye kuba imikino ubwo ngasubira kwiga[aseka bitari ibyo kwishima].

Ubwo wagumye mu cyaro nyine?

T.B: Naje gushaka umugore, icyo gihe nabwo nari muto, kwari ugushaka uwo dufatanya ibibazo, wumve ko nakoze ubukwe nta n’ibihumbi 20 mfite. Njya mvuga ibibazo byanjye bamwe nkumva ntibabyumva neza ariko ni gutyo.

Nyuma nagarutse i Kigali bwa gatatu, naje noneho nje gucuruza ikarito. Nacuruzaga za bombo n’utundi nk’utwo, nakoreraga hariya ku Kicukiro. Kugira ngo uzunguke byasabaga kwitanga, icyo nibuka ni uko nigeze kumara imyaka ibiri ndya ubugari saa sita na nimugoroba ku buryo ubu nabuhuzwe, sinabutamira. Ubwo nashakaga uko nunguka.

Icyo gihe ni nabwo watangiye gukora umuziki se?

T.B: Oya, ni ibibazo gusa nabagamo. Ntabwo nakoraga umuziki, naracuruzaga gusa ahubwo ibyo nari maze kugeraho abajura bahise babyiba ndongera nsigarana ubusa. Icyo gihe nibwo natangiye kujya mu byumba by’amasengesho, nashaka kumva ijambo rimpumuriza, nirirwaga nsenga, nkajya mu materaniro kenshi, mbese nahindutse umukirisitu ukomeye.

Hanyuma iby’umuziki biza bite?

T.B: Abajura banyibye muri Gicurasi 2006, iby’umuziki byo nabitangiye neza muri Nzeri icyo gihe. Najyaga ahantu basenga ngasaba gushima mu ndirimbo abantu bakishima byarangira tugataha. Abantu barambwiraga ngo nzi kuririmba, bamwe bangiraga inama ko najya muri studio nkaririmba, ntangira kubitekerezaho.

Ikigeragezo si karande

Theo Bosebabireba yishatsemo ubushobozi yinjira muri studio yari iya ADEPR icyo gihe yaririmbye indirimbo ya mbere yitwa ‘Bosebabireba’ n’urundi rukurikirane rw’indirimbo zari zigize album yahereyeho yise ‘Ibigeragezo si karande’.

Iyi album amaze kuyisohora abakirisitu mu nsengero zitandukanye batangiye kumutumira akabaririmba bakamuhemba ari naho yakuye ubushobozi bwo kwishyura studio yamukoreye indirimbo.

Ati “Icyo gihe sinongeye kuryama, nafatiyeho ndakora cyane, album ya kabiri isohotse nahise nzana madamu n’umwana umwe twari dufite icyo gihe. Ndakomeza kugeza ubu nagiriyemo umugisha ubuzima butangira kuba bwiza.”

Ngo mbere yo kuririmba wanywaga ibiyobyabwenge?

T.B: Ibiyobyabwenge narabinyoye kandi ibikomeye byose, nageze ku rwego rwo kunywa lisansi ngotomera nk’amazi, nabikoze rimwe rizima mpita nsara mbona n’ibimenyetso. Ibyo biyobyabwenge byose nabirekeye icya rimwe, ubu n’inzoga sinayisomaho.

Ntabwo wasoma ku nzoga? Kandi narabonye inkuru ko wambuye umucuruzi w’akabari?

T.B: Ibyo ni ukunsebya, ni satani ukoresha abo bantu ngo bansebye hanyuma nanjye nte umutwe njye kuburana na bo. Imana yambujije kujya mpangana na bene abo bantu, ni inzira satani akoresha kugira ngo nsubire gucukura imisarane.

Njya mbona banagushinja guca inyuma umugore wawe?

T.B: Iteka ryose nubakira ku kwihangana. Niba naracukuriye umuntu umusarane nkawuzuza akanyambura nkihangana, kuki bamvuga ibyo nkababara? Uko bimeze kose bizashira, sinarwana n’umuntu ngo yamvuze. Ibyo nabonye bimpa kwihanganira byose.

Kandi umugore wawe yarigeze kwemera ko yagufashe usambana?

T.B: Izo nkuru zivugwa bwa mbere ni madamu byaturutseho, umuntu yaramushutse amubeshya ko ahantu ndi ndi kumwe n’umukobwa ahita avuza induru. Yaje kuhagera asanga bamubeshye kandi yamaze kubivuga, kuva ubwo yahise amenya ko bambeshyera.

Abarokore ko bagushinja kwishushanya se?

T.B: Ntabwo nishushanya, ibyo banshinja ntabyo nkora. Gutsinda satani ni gukora ibitandukanye n’iby’abakoreshwa na satani bavuga. Izo nzoga banta n’ubwo nzi uko zisa, sindayinywaho.

Theo yakuriye mu buzima bushaririye ariko ubu amaze kwinjira mu cyiciro cy'abatunze za miliyoni i Kigali

Ubu nkweretse Mutzig na Skol ntiwamenya kuzitandukanya?

T.B: Inzoga nzifata nk’ibiyobyabwenge, nkiri akana gato bigeze kuyinyweshaho numva irasharira, ubu mba numva ko zose zisharira ahubwo sinzi impamvu abantu bazinywa kandi ari mbi. Ibyo kumenya kuzitandukanya ntabyo nzi, keretse nsomye amagambo yanditseho…

Kugeza ubu umuziki waguhaye iki?

T.B: Ni byinshi, umuziki naboneyemo umugisha. Muri 2010 umuntu Kigali yaramunaniye ansaba kumugurira akazu yabagamo, nagurishije imodoka ebyiri nari ntunze ngura iyo nzu. Nyuma nashatse udufaranga ndayivugurura ubu nyituyemo.

Ni byinshi nabonye, umuziki urantunze n’umuryango kandi tubayeho neza. Mfite abana batandatu, abakuru bariga mu mashuri yigenga kandi ahenze. Nungutse byinshi rwose.

Iyo nzu wayiguze angahe ko numva ari nini?

T.B: Nyigura bwa mbere namuhaye miliyoni zirindwi, ariko narayivuguruye, ubu sinamenya agaciro ifite. Naje no kongeraho izindi annex esheshatu, ubu ni igipangu kinini cyane.

Icyo gipangu cyose ugiye nko kukigurisha waca angahe?

T.B: Ntabwo namenya ayo naca kuko sindatekereza kuhagurisha ariko ni hanini cyane. Na we umva ahantu nkubwira ko ari hanini cyane! Izo nzu esheshatu zirakodeshwa kandi imwe bampa ibihumbi 70, ni hanini pe. Inyuma hari indi sambu nini.

Mu mafaranga yavanye mu muziki, Theo Bosebabireba yubakiye imiryango inzu nziza imiryango itatu itaragiraga aho kwikinga ndetse afite n’abandi bantu benshi afasha ariko ntabishyire mu itangazamakuru.

Imiryango myinshi y’iwabo mu cyaro ahitwa Cyinzovu ayifasha kwikura mu bukene, bamwe abaha igishoro bagatangira ubucuruzi buciriritse abandi akabafasha gukemura ibibazo bitandukanye by’ubuzima.

Kuki usigaye uba cyane muri Uganda?

T.B: Ntabwo ari ukuhakunda, hariya mpafite inshuti, ni naho nkorera umuziki kenshi, abantu ba hariya bakora neza. Ikindi kandi mbafite abantu benshi bantumira mu bitaramo bakishyura amafaranga menshi nanjye ngahembwa neza ngataha.

Numvise bavuga ko Museveni yaguhaye isambu?

T.B: Oya nta sambu yampaye, ibyo ntabwo ari byo. Nta kintu yampaye, ariko hari abantu bampaye inka, bamwe bazimpereye inaha abandi bazivunjamo amafaranga.

Nsigaye mbona uririmba no kuri politiki, urayikunda?

T.B: Ibyo bintu ndabikunda cyane, n’iyo ngira amahirwe yo kwiga ni byo nari kwiga. Iyo nza kuba narize ubu nagakwiye kuba nicaye mu Nteko Ishinga amategeko, numva ari nayo mpamvu nsigaye ncishamo nkaririmba nko ku banyapolitiki ariko mu buryo bwiza.

Akabazo k’amatsiko, kuva wavuka wari wajya mu kabyiniro?

T.B: Ntabwo nigeze nkajyamo, nta n’ubwo nigeze mbona umwanya wabyo. Iby’akabyiniro ntabyo nzi.

Ukeka ko ari nk’ibiki biberayo?

T.B: Iyo mba naragiyeyo mba mfite amakuru ahagije, ariko mba numva bavuga ko ari ahantu habi, ntabwo ari byiza ko nkanjye najyayo.

Theo Bosebabireba wanyuze mu nzira y’inzitane kuva agituye mu cyaro kugeza amaze kwamamara mu Rwanda hose ubu amaze kuririmba indirimbo zirenga ijana ze bwite, yanakoze album zigera ku icumi zanacurujwe bikomeye.

Theo Bosebabireba amaze gukora indirimbo zirenga ijana zizwi mu gihugu no hanze

Yihaye intego ikomeye yo kongera ireme ry’umuziki we aho ashaka ko guhera mu mwaka utaha wa 2017 azatangira kwiga gucuranga gitari na piano agahinduka umuhanzi w’umunyamwuga.

Theo Bosebabireba ati "Sinywa inzoga, sinzi n'amoko yazo"

Nta kure Imana itakura umuntu!


Kwamamaza

Kwamamaza
IZINDI NKURU WASOMA
TANGA IGITEKEREZO

Preview
    • Akenyereye ku gahinda yavanye muri nyakatsi, yabaye icyamamare “Bosebabireba” by ?

      Just whzt I wwas searching for, appreciate it forr
      posting.

      Feel free to vvisit my wehpage ... visit


ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved