Paccy yararuwe n’ifaranga ry’umusaza w’umutekamutwe

Yanditswe na Munyengabe Murungi Sabin
Kuya 28 Ukwakira 2014 saa 11:08
Yasuwe :
0 0

Uzamberumwana Pacifique (Oda Paccy) yakiriye telefone y’umusaza w’umuherwe amubwira ko yamuboneye akazi azasaruramo miliyoni 10. Akirita mu gutwi Paccy yavuye mu bye, atangira kurota yicaranye n’abanyamafaranga bakomeye i Kigali.
Umunyarwanda yaravuze ngo:
Ntuzabone ishya itamba ngo ute n’urwo wari wambaye
Ibishashagirana byose si zahabu
Urwishigishije ararusoma
Ubonye inkuba yanyagiwe agira ngo yitoreye isake
Umushonji arota arya
Kirazira gusimbuka uruzi utarugeraho……
Ku gicamunsi cyo (...)

Uzamberumwana Pacifique (Oda Paccy) yakiriye telefone y’umusaza w’umuherwe amubwira ko yamuboneye akazi azasaruramo miliyoni 10. Akirita mu gutwi Paccy yavuye mu bye, atangira kurota yicaranye n’abanyamafaranga bakomeye i Kigali.

Umunyarwanda yaravuze ngo:

-Ntuzabone ishya itamba ngo ute n’urwo wari wambaye
- Ibishashagirana byose si zahabu
- Urwishigishije ararusoma
- Ubonye inkuba yanyagiwe agira ngo yitoreye isake
- Umushonji arota arya
- Kirazira gusimbuka uruzi utarugeraho……

Ku gicamunsi cyo kuwa Mbere tariki ya 27 Ukwakira 2014 nibwo Paccy yavuye i Nyamirambo aho asigaye acumbitse ahata inzira ibirenge ajya kureba umuherwe bari bafitanye umushinga uzamuhesha miliyoni 10 z’amafaranga y’u Rwanda. Uyu musaza wari wijeje Paccy ko ari umuherwe wasagutswe n’amafaranga ariko wifuza kumuvunguriraho , byaje kurangira amwibye utwe twose ntiyamusigira n’urwara rwo kwishima.

Uko Paccy yahuye n’umuherwe w’umunyabibazo…..

Mu kiganiro na IGIHE, Paccy yasobanuye ko yari amaze iminsi mike avuganye n’uyu musaza wamubwiraga ko hari umushinga ukorana na Ambasade ya Canada mu Rwanda wifuza kugirana amasezerano n’abahanzi. Paccy n’uyu musaza basezeranye ko bagomba guhurira ku Kimihurura bugufi y’ahakorera FPR bagashyira umukono ku masezerano y’imbonekarimwe kuri uyu mukobwa.

Paccy ati “Yarambwiye ngo akora muri ONG ikorana na Ambasade ya Canada.Yahise ambwira ko bashaka umuhanzi wo gukora n’iyo ONG yabo ariko ambwira ko icyiza ari uko twabonana akampa ibisobanuro birambuye. Byarandenze ibyishimo biransaguka kuko numvaga ari ikintu gifatika, yambwiye ko nimugoroba afitanye inama na Minisitiri ko nkora uko nshoboye nkamugeraho byihuse.”

Paccy yarwishigishiye….

Uyu musaza wiyitaga umuherwe yasabye Paccy gukora uko ashoboye akazana indirimbo ze yumva zamamaye cyane cyane izifite amashusho kugira ngo abaherwe bagenzi be banyurwe n’ubuhanga bw’uyu mukobwa.

Paccy ati “Nahise mfata mudasobwa yanjye , External na Flash disk ntega byihuse musanga Kimihurura hafi ya FPR. Kubera ko nashakaga guhita njya ku ishuri kwishyura amafaranga y’ishuri 280,000 , narayitwaje kugira ngo ndangizanye na we mpite njya kwishyura.”

Paccy yabonye inkuba yanyagiwe agira ngo yitoreye isake

Paccy agikubita amaso uyu musaza, yahise yemeza ijana ku ijana ko Imana igiye kumwicazanya n’ibikomangoma. Yasanze umuntu bagiye gukorana umushinga ari umusaza w’umuherwe, bigaragara ko azi uburyohe bw’ifaranga dore ko imodoka yari atwaye nayo yabwivugiraga.

Uyu muhanzi yahise yumva inzozi yahoze arota zibaye impamo gusa mu minota mike yaje yakubiswe n’inkuba.

Ati “Mugezeho nasanze ari umugabo ushaje wambaye neza wiyubashye, ufite imodoka nziza pe. Nasanze aparitse iruhande rw’inzu nziza , nabonaga koko asa n’ukorana na ONG ikomeye. Yahise ambwira ko umuhanzi bashaka ari ubakorera album y’amajwi n’amashusho bakazaguha miliyoni 10. Nubwo bavuga ko abatekamutwe badakoresha miti njye ndabyemeza ijana ku ijana kuko uwo nahuye na we akorana n’indi myuka. Numvaga nyine ayo mafaranga ngiye kuyafata kuko umuntu twari kumwe yari akomeye ubona ko ari umusaza wihaye.”

Yararukiye amafaranga ataha yimyiza imoso….

Paccy n’uyu musaza bakimara kunoza umugambi, bahise bamusaba gutanga fotokopi y’indangamuntu. Ntiyari yitwaje iyi fotokopi bashakaga bityo uyu musaza amwereka akazu gato kari aho hafi ngo ajyemo afotoze.

Ati “Yambajije niba nazanye indangamuntu kugira ngo nyifotoze mbasigire fotokopi mubwira ko nyifite. Aho bugufi hari akazu gato kari gahari yarambwiye ngo ninjiremo bankorere fotokopi. Igikapu, computer n’amafaranga nabisize mu modoka njya gufotoza indangamuntu.”

Paccy akigera muri ako kazu yasanze nta cyuma gifotora bagira ahita agaruka byihuse ngo abwire uwo musaza uko bimugendekeye gusa yaje gukubitwa n’inkuba kuko yasanzwe umusaza w’inyaryenge yashwekuye.

Ati “Igitangaje ni uko nageze muri aka kazu nsanga nta kintu na kimwe bakora kijyanye no gufotora mpita nsohoka. Nkigera hanze umutima wamvuyemo mpindukiye nsanga ya modoka ntayo. Nahise nkubitwa n’inkuba ndashakisha ndamubura ntaha amara amasa”

Paccy wari ugiye kubonana n’umuherwe wagombaga kuzamuhesha miliyoni 10 yatashye n’amaguru kuva Kimihurura kugera i Nyamirambo, yageze mu rugo amarira yamushizemo ku bwo kubura amafaranga 280,000 yagombaga kwishyura ishuri, mudasobwa, telefone, igikapu n’ibindi byatwaye n’uyu musaza w’umunyamujyi.

Kugeza ubu aracyashakisha uburyo yabona uyu musaza yitabaje izindi nzego dore ko telefone ye bavuganagaho mbere ifunze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza