Nirere Shanel n’Abafaransa bazataramira muri Afurika y’Uburasirazuba

Yanditswe na Munyengabe Murungi Sabin
Kuya 24 Werurwe 2015 saa 05:27
Yasuwe :
0 0

Nirere Shanel ukorera umuziki we mu Bufaransa ari kunoza umushinga w’ibitaramo azakorana n’abahanzi b’Abafaransa mu bihugu byo muri Afurika y’Uburasirazuba mu mwaka wa 2015.

Mu kiganiro yagiranye na IGIHE, Nirere Shanel usanzwe yigisha umuziki mu Bufaransa ngo ageze kure uyu mwuga wo gutoza abaririmbyi gukoresha ijwi ryabo mu muziki ndetse ngo ari gukarishya ubwenge mu bijyanye na kinésiologie (amasomo wigamo ubushobozi n’imbaraga z’umubiri w’umuntu mu mitekerereze , ingufu n’ibyiyumvo).

Yagize ati “Ubu nk’ibisanzwe ndakora umuziki, ndacyaririmba ndetse nigisha muzika mu Bufaransa. Ikindi ni uko ndi kwihugura mu bijyanye na kinesiology”

Mu yindi mishinga ikomeye afite ni ibitaramo bikomeye ari gutegura bigomba kuzabera mu Rwanda no mu bihugu bihana imbibe. Azaba afatanyije n’abahanzi bakomeye mu Bufaransa ndetse bamaze kumwemerera kuzamuherekeza muri ibi bitaramo ari gutegura ku bufatanye na Positive Production.

Ati “ Ndigukora ku mushinga wo kuza gukora ibitaramo mu Rwanda umwaka utaha. Hano namaze kubona abanyamuzika dukorana ndi no gushakisha abandi bafatanyabikorwa mu Rwanda kugirango nzashobore gukora concert ariko hamwe n’abo tuzaba twazanye dukore ama ateliers(kungurana ibitekerezo mu bya muzika) n’abandi bahanzi.”

Intego nyamukuru y’uru rugendo Nirere Shanel azafatanyamo n’abahanzi bo mu Bufaransa ngo ni ugutaramira Abanyarwanda ndetse bakaba bafite gahunda yo kuzitabira amaserukiramuco abera mu Karere.

Yagize ati “Intego ni ugokora ibitaramo mu Rwanda ndetse no mu bihugu duturanye mbifashijwemo na Positive Production kuko mu kwezi kwa kabiri haba festival mu Rwanda yitwa Isaano, i Goma hakabera iyitwa Amani naho muri Zanzibar hakaba Sauti za Busara. Ni icyo cyifuzo nyamukuru ariko byose biterwa n’amikoro . Hamwe na Positive Production tubirimo tuzagenda tubagezaho uko umushinga ugenda waguka.”

Nyuma yo kurushinga, Nirere Shanel yakomeje muzika ndetse ngo imishinga ni myinshi azakomeza kuyigeza ku Banyarwanda.

Ati “Nyuma yo kurushinga ubuzima bukomeje kuryoha kandi byose biragenda neza, ndacyaririmba rwose nkiga ndetse n’imishinga myinshi”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza