Meddy yatumiwe mu gitaramo kizahuza Abanyarwanda muri Arizona

Yanditswe na Munyengabe Murungi Sabin
Kuya 17 Nyakanga 2017 saa 10:38
Yasuwe :
0 0

Meddy umaze imyaka irindwi mu mahanga yatumiwe mu gitaramo kizahuriza hamwe Abanyarwanda n’inshuti zabo batuye muri Leta ya Arizona.

Iki gitaramo cyiswe ‘Get Together’ kizaba kuwa Gatandatu tariki ya 22 Nyakanga 2017, kizahuriza hamwe Abanyarwanda n’inshuti zabo haba abatuye muri Arizona no mu zindi leta zihana imbibi muri New Mexico, Utah, Nevada, California, Colorado n’abatuye mu Majyaruguru ya Mexico.

Iyi Leta ituwe n’abaturage 6,828,065, akaba ari iya 14 ukurikije uko Leta zigize USA zituwe cyane ndetse ikaba imwe muri leta zituwe n’Abanyarwanda batari bake muri USA.

Iki gitaramo cyateguwe n’umuryango w’Abanyarwanda batuye muri Arizona [RCA/Arizona] mu rwego rwo kwishimira ibyagezweho no kwiha intego yo kutazatatira igihango mu kwimakaza agaciro u Rwanda rwihaye mu myaka ishize.

Umuyobozi w’uyu muryango, Habineza Jean Claude avuga ko ibi birori bizaba ari umwanya mwiza wo guhuriza hamwe ibitekerezo by’Abanyarwanda batuye muri Arizona ku cyabateza imbere mu gihe u Rwanda rwitegura kwinjira mu matora y’Umukuru w’Igihugu azaba kuwa 3 no kuwa 4 Kanama 2017.

Yagize ati “Ubu busabane ni imwe mu nzira yo kwidagadura no kwegerana kw’Abanyarwanda batuye muri Arizona, duharanira kwiteza imbere ndetse no kutibagirwa igihugu cyatwibarutse. Kuhagera kwa buri wese ni umunezero n’ibyishimo kuko bamwe tuba tudaherutse gutarama mu muco w’iwacu”.

Igitaramo kizabera kuri Peoria Community Center muri Phoenix kuri 8335 W Jerfferson St Peoria AZ 85345, kizatangira saa cyenda n’igice z’igicamunsi ku isaha ya Arizona. Uretse Meddy uzaririmba muri ibi birori, hanatumiwemo MC Ally Soudy ari na we uzaba ayoboye igitaramo.

Meddy yiteguye gutaramana n'Abanyarwanda batuye muri Arizona

Meddy witegura gusohora indirimbo nshya yise ‘Slowly’ yavuze ko yiteguye kuzishimana n’Abanyarwanda bazitabira iki gitaramo cy’ubusabane agasaba abahaturiye ‘bose kwitabira kuko yiteguye kubasangiza ibyo amazemo iminsi’.

Ibi birori byateguwe ku bufatanye bukomeye hagati ya komite iyobora RCA/Arizona ku nkunga ya Arizona Bank&Trust, One Nation Radio [Radio ya diaspora nyarwanda] ndetse na Universal Driving School.

Umuyobozi w’umuryango w'Abanyarwanda batuye muri Arizona, Habineza Jean Claude
MC Ally Soudy azayobora ibi birori

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza