Minisitiri w’intebe ati “Igitaramo cya Kizito Mihigo kiratanga amasomo ane”

Yanditswe na
Kuya 17 Mata 2012 saa 10:31
Yasuwe :
0 0

Mu gitaramo cyo kwibuka kigenewe abayobozi cyakozwe n’umuhanzi Kizito Mihigo akaboneraho no gukurira ubwatsi "Ibuka", Minisitiri w’Intebe Dr Habumuremyi Pierre Damien yavuze ko akuyemo amasomo ane y’ingenzi.
Kizito Mihigo na Fondation KMP (Kizito Mihigo pour la Paix / Kizito Mihigo for Peace) yatumiye abayobozi batandukanye muri Hoteli Serena i Kigali, mu gitaramo cyiswe “Ijoro Ribara Uwariraye”. Iki gitaramo cyitabiriwe na Minisitiri w’intebe Dr. Pierre Damien Habumuremyi, Minisitiri (...)

Mu gitaramo cyo kwibuka kigenewe abayobozi cyakozwe n’umuhanzi Kizito Mihigo akaboneraho no gukurira ubwatsi "Ibuka", Minisitiri w’Intebe Dr Habumuremyi Pierre Damien yavuze ko akuyemo amasomo ane y’ingenzi.

Kizito Mihigo na Fondation KMP (Kizito Mihigo pour la Paix / Kizito Mihigo for Peace) yatumiye abayobozi batandukanye muri Hoteli Serena i Kigali, mu gitaramo cyiswe “Ijoro Ribara Uwariraye”. Iki gitaramo cyitabiriwe na Minisitiri w’intebe Dr. Pierre Damien Habumuremyi, Minisitiri w’Urubyiruko n’Ikoranabuhanga Jean Philibert Nsengimana, Minisitiri w’Umuco na Siporo Protais Mitali, Minisitiri wo kurwanya Ibiza no Gucyura Impunzi, Jenerali Marcel Gatsinzi, Minisitiri w’Umutungo Kamere Stanislas Kamanzi, Minisitiri w’Ubuzima Dr Agnes Binagwaho, Abayobozi b’Amadini nka Mufti w’u Rwanda Sheikh Abdoul Karim Gahutu; Musenyeri Servilien Nzakamwita, umushumba wa Diyosezi Gatolika ya Byumba akaba ari nawe uyobora Komisiyo y’Amahoro n’Ubutabera ya Kiliziya Gatolika, Perezida wa Ibuka, n’abandi bayobozi mu nzego zitandukanye z’Igihugu.

Bimwe mu byaranze igitaramo

Muri icyo gitaramo cyatangiye i saa kumi n’ebyiri z’umugoroba (18h) kikarangira ahasaga i saa tatu n’igice z’ijoro (21h30), umuhanzi Kizito Mihigo yaririmbiye abari baje muri icyo gitaramo indirimbo nshya yahimbiye ibi bihe byo kwibuka ku nshuro ya 18, ndetse yongeraho n’izindi asanganywe nka Turi abana b’u Rwanda, Inuma, Urugamba rwo kwibohora n’izindi.

Muri iki gitaramo, indirimbo yishimiwe kurusha izindi ndetse Minisitiri w’Intebe akaza gusaba ko yasubirwamo, ni ’Urugamba rwo Kwibohora’. Iyi ndirimbo Kizito Mihigo yayihimbye umwaka ushize ubwo Abanyarwanda bizihizaga ku nshuro ya 17 umunsi mukuru wo kwibohora. Benshi mu bayobozi bitabiriye iki gitaramo, bagaragaje ko bakunda iyi ndirimbo.

Muri iki gitaramo kandi, herekanwe filime imara isaha, irimo ibikorwa Fondation KMP yakoze kuva yatangira kubaho, maze nyuma y’iyi filime abifuza gutera inkunga iyi Fondation bahabwa umwanya. Bamwe mu bari mu gitaramo bafashe ijambo bashimira Kizito Mihigo, banavuga inkunga bageneye Fondation. Abandi bagiye bandika inkunga yabo ku dupapuro twari twateganijwe.

Twabamenyesha ko iyo filime yerekana ibikorwa bya Fondation KMP ndetse n’indirimbo zose nshya za Kizito Mihigo. Muri iki gitaramo kandi, hashyizwe ahagaragara kuri CD na DVD (amajwi n’amashusho), indirimbo za Kizito Mihigo, ubu zikaba zigiye gutangira kuboneka muri ‘Librairies’ zo mu mujyi wa Kigali.

Minisitiri w’intebe ati” Nkuye amasomo ane muri iki gitaramo”

Mu ijambo rye, Minisitiri w’Intebe yavuze ko muri iki gitaramo cya Kizito Mihigo hari ibintu bine umuntu yasigarana nk’amasomo y’ingenzi. Yagize ati: “ Isomo rya mbere nakuye muri iki gitaramo, ni uko umuntu ashobora kwiyibagirwa akitangira igihugu. Isomo rya Kabiri, ni uko u Rwanda rushobora kugira ibyiringiro by’u Rwanda rw’ejo hazaza rwiza kubera urubyiruko. Isomo rya gatatu, ni imbaraga z’abahanzi”. Aha Minisitiri w’Intebe yagarutse ku buryo habayeho abahanzi basenye igihugu bagashishikariza Abanyarwanda kwicana, maze ubu akaba ashimishijwe no kuba hariho abahanzi baje gufasha u Rwanda kongera kubaho nyuma ya Jenoside.

Isomo rya kane, Minisitiri w’intebe yagize ati: “Uyu munsi nemeye ko icyari umwijima nabonye ko gishobora guhinduka urumuri, … Ndashimira abacitse ku icumu bose mu bikorwa byinshi byiza bakorera u Rwanda, bagerageza kurenga akababaro batewe n’ibyo bakorewe muri Jenoside yakorewe Abatutsi” ; Minisitiri w’intebe yashimye Fondation KMP avuga ko ikwiye gushyigikirwa kuko ibikorwa byayo bifitiye akamaro igihugu cyose.

Kizito Mihigo yakuriye ubwatsi IBUKA ku bw’inka yamugabiye

Umwaka ushize wa 2011, kubera indirimbo “Twanze Gutoberwa Amateka” yahimbwe na Kizito Mihigo maze akayiha Ibuka nk’impano idasaza, umuryango Ibuka wamuhaye inka. Muri iki gitaramo Kizito Mihigo na Fondation ye bakoze umuhango wo gukura ubwatsi, maze baha Perezida wa IBUKA, impano y’ingoma y’Ishakwe.

Kizito Mihigo yavuze ko bahisemo gutanga impano y’ingoma y’ishakwe kubera impamvu eshatu. Yagize ati :

-  "Impamvu ya mbere ni uko ari igikoresho cya Muzika gakondo y’Abanyarwanda, bityo ikajya yibutsa IBUKA ko Muzika y’u Rwanda nayo itasigaye inyuma mu bikorwa byo kwibuka no kuvuga amateka uko yabaye.

-  Impamvu ya kabiri ni uko ingoma y’ishakwe ariyo ngoma iterera izindi, ndetse nticeceke na rimwe mu mirishyo. Natwe rero abacitse ku icumu, mu buzima bw’igihugu ntituzigere turekera aho kuvuga ibyatubayeho.

-  Impamvu ya gatatu, mu magambo ye Kizito yagize ati: “Ingoma ni ikimenyetso cyo kuyobora, kandi nkaba nemera ko ubuhamya bw’abacitse ku icumu bushobora kuyobora isi mu rugendo rw’amahoro abantu bose bifuza”. Aya magambo Kizito Mihigo yayavuze mbere yo guhereza impano y’ingoma Professeur Dusingizemungu Jean Pierre.

Mbere yo kuririmba indirimbo zari zasabwe gusubirwamo na mbere y’uko asoza, umuhanzi Kizito Mihigo yashimiye abafatanyabikorwa ba Fondation ye, by’umwihariko Minisiteri y’Urubyiruko n’Ikoranabuhanga, Minisiteri y’Umuco na Siporo, mu rwego rw’itangazamakuru yashimiye ORINFOR, IGIHE.com, Inyarwanda.com, Ian Boutique ibambika na Alpha Entertainement ibakorera ibijyanye na Sound Systeme.

Iki gitaramo cyakozwe kuwa 15 Mata 2012, mu rwego rw’ibitaramo bibiri kwibuka byo yiyemeje kujya akora mu kwezi kwa kane, kimwe kigenerwa abayobozi, ikindi kigakorerwa abandi bose babyifuza. Uretse ibitaramo binyuranye akorera hirya no hino mu gihugu no hanze yacyo, Kizito Mihigo anyuza ubutumwa bwe bw’amahoro n’ubwiyunge mu kiganiro cya Televiziyo yise “Umusanzu w’Umuhanzi”, akora kabiri mu kwezi.

Kizito Mihigo aririmba "Ijoro Ribara Uwariraye"
Dr. Agnes Binagwaho na Lt Col. Rose Kabuye
Abayobozi b'amadini
Professor Shyaka Anastase na Madamu
Minisitiri w'Intebe avuga ijambo
Bamwe mu bayobozi bakuru
Aba badepite bacinye akadiho babyina "Inuma" biratinda
Bamwe mu bitabiriye igitaramo bafashe amafoto kirangiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza