Kizito Mihigo na Fondation ye bataramiye muri gereza ya Remera

Yanditswe na
Kuya 20 Gashyantare 2012 saa 01:18
Yasuwe :
0 0

Kuri iki cyumweru tariki ya 19 Gashyantare 2012, ku bufatanye n’urwego rw’igihugu rushinzwe amagereza mu Rwanda (Rwanda Correctional Service) ndetse n’ibiro bya Minisitiri w’Intebe, umuhanzi Kizito Mihigo yatanze igitaramo cy’amasaha atatu muri gereza ya Remera. Iki gikorwa kiri muri gahunda Fondation KMP (Kizito Mihigo pour la Paix / Kizito Mihigo for Peace) yihaye yo kuzenguruka amagereza yose y’u Rwanda uko ari cumi n’ane, hatangwa ubutumwa bw’amahoro.
Iyi gahunda bayise “Inkunga y’ubuhanzi mu (...)

Kuri iki cyumweru tariki ya 19 Gashyantare 2012, ku bufatanye n’urwego rw’igihugu rushinzwe amagereza mu Rwanda (Rwanda Correctional Service) ndetse n’ibiro bya Minisitiri w’Intebe, umuhanzi Kizito Mihigo yatanze igitaramo cy’amasaha atatu muri gereza ya Remera. Iki gikorwa kiri muri gahunda Fondation KMP (Kizito Mihigo pour la Paix / Kizito Mihigo for Peace) yihaye yo kuzenguruka amagereza yose y’u Rwanda uko ari cumi n’ane, hatangwa ubutumwa bw’amahoro.

Iyi gahunda bayise “Inkunga y’ubuhanzi mu butabera no mu bwiyunge by’Abanyarwanda”. Iyi gahunda kandi, ije nyuma y’izindi ngendo KMP yakoreye mu mashuri yisumbuye. Iyo gahunda yo gukoresha ibitaramo by’ubuhanzi butanga ubutumwa bw’amahoro mu mashuri yisumbuye, yo yitwaga “Inkunga y’ubuhanzi mu burezi no mu burere mboneragihugu”.

Uko igitaramo cyagenze

Igitaramo cya Kizito Mihigo muri Gereza ya Remera cyatangiye saa munani n’igice z’amanywa (14h30). Nyuma yo kwakira abanyamuryango ba Fondation n’amashyi menshi, abagororwa baririmbye indirimbo yahimbwe n’umwe muri bo yitwa: “Uri umuntu nanjye ndi umuntu” . Nyuma y’indirimbo umuyobozi wa Gereza wungirije yavuze ijambo ryo kwakira abashyitsi, nyuma y’ikaze umuhanzi Kizito Mihigo afat a mikoro, apfundurira abagororwa agaseke Fondation ye yari yabapfunyikiye.

Kizito Mihigo aririmba

Umuhanzi yatangiye abwira abagororwa impamvu Fondation ye yabayeho, n’umwihariko w’ubutumwa bwayo bw’amahoro. Aha Kizito Mihigo yavuze ko umwihariko wabo uri ukubiri: Kuba ubutumwa butangwa mu buhanzi, kandi bukaba ari ubutumwa bukomoka mu idini rya Gikristu n’ubwo bugenewe bose. Kizito Mihigo ati: “Ndi umuhanzi w’Umukristu uharanira amahoro, ukomoka mu Kiriziya ariko nkagana muri sosiyete.” Mu magambo y’icyongereza, yagize ati: “I m a christian artist, from church to society”

Kizito yakomeje agira ati: “Ubutumwa bw’Amahoro, Ubwiyunge n’Ubumwe, Imbabazi zisabwa kandi zigatangwa, nyuma ya jenoside yakorewe Abatutsi, tugomba kubutangana ukwicisha bugufi kwinshi, kuko ari ubutumwa bufite ireme rikomeye, kandi busumba imbaraga n’ububasha bya muntu.” Kizito ati: “Imana niyo ibabarira, iyo twe tubikoze iba yabidushoboje”

Abagororwa bari buzuye akanyamuneza, bakicyiriza Kizito bakoma amashyi

Kuri iyo ngingo y’imbabazi, Kizito Mihigo yaririmbye indirimbo ze ebyiri, ITEME (Iyi ifite iminota makumyabiri) ndetse na ARC EN CIEL (y’iminota icumi). Hagati y’izi ndirimbo uko ari ebyiri, Kizito Mihigo yahaye abagororwa ubuhamya bw’ubuzima yabayeho muri Jenoside yakorewe Abatutsi, aho yagerageje guhura n’abo yifuzaga kwihoreraho, maze ababwira ko Imana imuhamagarira kudakora ikibi n’ubwo we yagikorewe. Kizito Mihigo mu buhamya bwe, avuga ko nyuma yo kwiyumvamo ubushake n’umuhamagaro byo kubabarira no kwiyunga, yabonanye na benshi babanaga i Kibeho mbere ya Jenoside yakorewe abatutsi, ngo nyamara iyo hataza kubamo ubushake bwe bwo kwiyunga no kubabarira, ayo mateka aba yarabatanije burundu” Muri iki gitaramo, yavuze kenshi interuro igira iti: “Kubabarira ni inema y’Imana, ariko isaba ubushake bwa muntu”.

Ntibashakaga gukura amaso ku muhanzi

Nyuma yo kuvuga uruhare rw’uwahemukiwe mu gutanga imbabazi no kwiyunga, Kizito Mihigo yavuze uruhare rw’uwahemutse. Aha yifashishije urugero rw’umugabo witwaga Sawuli, wicaga abakristu ndetse yanga Yezu urunuka, maze akaza guhinduka akaba intumwa iruta izindi, kandi ifite ubutumwa bw’urukundo kurusha n’izabanye na Yezu. Kizito yabwiye abagororwa ko umuntu wahemutse, iyo ahindutse aba afite ubushobozi bwo kugira akamaro kurusha abandi, kuko ijoro ribara uwariraye. Yabibukije ko Sawuli uwo ariwe waje guhinduka Mutagatifu Pawulo. Kizito yavuzekandi ko akunda gutanga ubutumwa bw’ubwiyunge, mu murongo w’ivanjiri, ngo kuko nawe bimufasha kubwumva.

Izindi ndirimbo zaririmbwe muri iki gitaramo, ni “Twanze Gutoberwa Amateka” (Abagororwa bayiririmbaga ubona batwawe), “Turi abana b’u Rwanda”, Inuma (yanasabwaga n’abagororwa bose), ndetse n’imwe mu ndirimbo nshya za Kizito Mihigo yitwa Yohani yarabyanditse”

Abagororwa basabye Kizito CD ze n’iradiyo yo kuzumviraho

Mu ijambo umwe mu bagororwa yafashe, yavuze ko uyu muhanzi yabafashije cyane, asaba Kizito Mihigo ko yazajya abaha CD ze zose, ndetse akanabaha n’iradiyo bazajya bazicurangiramo. Kizito Mihigo yabasubije ko azavugana n’abayobozi ba gereza, akabagezaho ibishoboka byose. Yavuze ko Fondation KMP izakomeza kubaba hafi.

Ibyishimo byaramurenze arahaguruka ajya gushimira Kizito, ashimira n'Imana ateze amaboko

Abagororwa bafashe ijambo bose bagarutse ku gushima iki gikorwa, basaba ko ibitaramo nk’ibi byabaho kenshi, bagaragaza kandi ko bifuza ko n’abandi bahanzi bakangukira gutanga ubutumwa bwubaka n’ubw’isanamitima nk’ubwo bagejejweho na Kizito Mihigo.

Igitaramo cyarangiye I saa kumi n’imwe n’igice (17h30), gisozwa n’ijambo ry’umuyobozi wa gereza wungirije, wasabye Kizito Mihigo ko yazagaruka mu cyunamo, kubafasha kwibuka. Ibi nabyo Kizito Mihigo yabyemeye.

Umwe mu bagize Fondation KMP yadutangarije ko iyi gahunda izakomereza mu magereza yose, kandi ngo batahwema kubimenyesha abakunzi babo basoma IGIHE.COM.

Gereza ya Kimironko yasuwe n’Umuhanzi Kizito Mihigo na Fondation ye KMP ni imwe mu zicumbikiye abagororwa benshi mu Rwanda, ubu ibarirwamo abagera ku bihumbi bine na magana arindwi (4700).

Toni Valens Mutuyimana, Umuyobozi wa Gereza ya Remera Wungirije
Abanyamuryango ba Fondation KMP nyuma y'igitaramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza