Knowless yahishuye icyatumye ahisha umwana aherutse kubyara

Yanditswe na Munyengabe Murungi Sabin
Kuya 20 Gashyantare 2017 saa 09:38
Yasuwe :
1 1

Umuhanzi Ingabire Jeanne d’Arc [Butera Knowless] agiye kumara amezi atatu yibarutse umwana w’umukobwa yabyaranye n’umugabo we Ishimwe Clement.

Umwana wa Knowless na Clement bamwise ‘Ishimwe Or Butera’, kuva yavuka abamuciye iryera babarirwa ku ntoki ku mpamvu bwite z’ababyeyi be bahamya ko batekerejeho neza basanga ‘byaba ari ukuvogera uburenganzira bwe’.

Knowless yibarutse mu gitondo cyo kuwa 22 Ugushyingo 2016, hari hashize amezi atatu akoranye ubukwe na Ishimwe Clement wari usanzwe amutunganyiriza indirimbo akanamubera umujyanama mukuru mu muziki.

Uyu mugore yabwiye TNT ko mbere yo gusama ngo yahozaga mu masengesho ye icyifuzo cy’uko Imana yazamuha umwana w’umukobwa ndetse ku bw’amahirwe imfura ye ihuza n’ibyifuzo bye.

Yagize ati “Nahoze nifuza umwana w’umukobwa kandi ni byo Imana yampaye. Ntabwo nasobanura ibyishimo nagize nkimara kumenya ko nzabyara umukobwa. Ni inzozi zari zibaye impamo.”

Yongeyeho ko mu byo akora byose azirikana neza ko agomba kuzaba ‘igisubizo mu rugendo rw’icyerekezo umwana we azifuza gufata mu gihe bizaba bimufitiye inyungu. Ngo ni nako byagenze ku bamureze kuva mu bwana kugeza abaye inkumi yifatira imyanzuro’.

Nyuma y’amezi hafi atatu umwana wa Knowless avutse nta foto ye n’imwe yigeze ishyirwa ku mbuga nkoranyambaga. Uyu mugore yavuze ko yafashe uyu mwanzuro ku bwo kubaha ubuzima bwite bw’umwana gusa ngo naba mukuru bazamuha uburenzira bwo kwigaragaza uko ashaka mu buryo bwiza.

Yagize ati “Ntabwo nzi icyo umukobwa wanjye azaba. Ashobora kuba yifuza kuzabaho mu buzima bwe bwite ku buryo gushyira amafoto ye hanze byaba bisobanuye ko nsuzuguye umwanzuro we. Nakenera kumenyekana nk’ababyeyi be nizeye neza ko azabona abamukurikira benshi uko azaba abyifuza.”

Knowless uherutse guhabwa impamyabumenyi y’icyiciro cya kabiri cya kaminuza muri Kaminuza Yigenga ya Kigali [ULK] yavuze ko mu migambi afite yifuza gukomeza amasomo y’ibindi byiciro bisigaye.

Kuva uyu mwana yavuka nta foto ye n'imwe yigeze ijya ahagaragara

Amashuri abanza yayize ku Kacyiru mu kigo cya ESCAF, ayisumbuye ayakomereza mu Ruhango mu kigo cya APARUDE nuko aza kuyarangiriza i Nyamirambo mu ishuri rya APACE ari naho yamenyaniye na Ishimwe Clement. Icyo gihe bombi ngo baririmbanaga muri korali, Knowless yigaga mu mwaka wa kabiri naho umugabo we akiga mu wa gatanu.

Mu mashuri yisumbuye yize ishami rya Computer Sciences and Management, aherutse kurangiza Kaminuza mu ishami rya Finance muri Kaminuza yigenga ya Kigali.

Knowless na Clement baherutse kujya mu Bwongereza mu kiruhuko
Knowless ngo arifuza gukomeza amasomo y'icyiciro cya gatatu cya kaminuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza