Tom Close na Bulldogg basohoye amashusho y’indirimbo bakoreye mu bisiza bya Gashora

Yanditswe na Dusabimana Aimable
Kuya 7 Kanama 2017 saa 09:14
Yasuwe :
0 0

Umuririmbyi Tom Close uri mu bahanzi bamaze kubaka izina mu bakorera umuziki mu Rwanda, yashyize ahagaragara amashusho y’indirimbo yise ’Igikomere’ yakoranye n’umuraperi Bulldogg.

Tom Close amaze imyaka irenga icumi aririmba, yakoze indirimbo zakunzwe mu myaka yatambutse ndetse yubatse amateka mu Rwanda atwara igikombe cya Primus Guma Guma Super Star ku nshuro ya mbere mu 2011, ahabwa n’amahirwe yo gukorana indirimbo na Sean Kingston.

Uyu muhanzi witegura kumurika album nshya yabwiye IGIHE ko bimwe mu bice bigize amashusho y’indirimbo nshya yakoranye na Bulldogg bakayita ’Igikomere’, byafatiwe ahantu nyaburanga abona ko nk’iyo umuhanzi akoze igikorwa nk’icyo bishobora gufasha mu kumenyekanisha urwego rw’ubukerarugendo.

Yavuze ko iyo ndirimbo ari imbanzirizamushinga wa album ya karindwi yitegura kumurika mu minsi iri imbere ariko akaba agitegereje ko impande zitandukanye bazafatanya muri icyo gikorwa zibiha umugisha.

Yagize ati "Twayikoreye Gashora mu Bugesera. Ni ho hantu hajyanaga neza n’uburyo nashakaga ko amashusho akorwamo. Nta bushakashatsi ndabikoraho ariko uko byagenda kose [iyo umuhanzi akoreye amashusho ahantu nyaburanga mu gihugu] bituma abantu bahagirira amatsiko bakaba bahasura. Ku bwanjye numva ari ikintu kiza ariko sinakubarira ngo ingaruka bigira zingana gutya. Ariko iyo ikintu kitagaragajwe ntawe ukimenya, iyo cyagaragajwe kiramenyekana abantu bakacyitabira."

Indirimbo "Igikomere" yumvikanamo n’umuraperi Bulldogg bafatanyije, yiyongereye ku zindi amaze iminsi akora zanogeye benshi mu bafana n’abakunda umuziki wa Tom Close.

Uyu muhanzi yavuze ko amashusho y’iyi ndirimbo yakozwe na Ma-Riva azakurikirwa n’ibindi bikorwa bya muzika birimo indirimbo nshya ateganya gushyira ahagaragara, zose zizasohoka kuri album ye ya karindwi inariho izakunzwe mu minsi ishize nka "Uramutse Wemeye", "Malayika Murinzi", "Ferrari" n’izindi.

Indirimbo Tom Close yasohoye yayikoranye na Bulldogg
Amashusho y'iyi ndirimbo yakorewe mu bisiza bya Gashora i Bugesera

Amashusho y’indirimbo "Igikomere" ya Tom Close na Bulldogg yafatiwe mu bisiza bya Gashora


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza