Kwamamaza

Alpha Rwirangira yafashe icyerekezo gishya nyuma yo kurangiza kaminuza

Yanditswe kuya 16-09-2016 saa 11:20' na Munyengabe Murungi Sabin


Alpha Rwirangira umuhanzi mpuzamahanga w’Umunyarwanda usigaye atuye muri Leta Zunze Ubumwe za Amerika yihaye imigambi mishya nyuma y’igihe kigera ku mwaka arangije Kaminuza.

Rwirangira w’imyaka 30 yize ibijyanye na Music and Business muri kaminuza ya Campbellsville muri Leta Zunze Ubumwe z’Amerika. Yabwiye IGIHE ko mu gihe amaze arangije yabonye akazi kajyanye n’ibyo yize ndetse ko atangiye kubona umwanya uhagije wo guhimba indirimbo ku muvuduko urusha uko yabikoraga mbere.

Ati “Nari maze imyaka igera kuri ibiri nsa n’ucecetse ariko ibikorwa byarakomeje. Iyo uri mu mwaka wa nyuma ntabwo ibintu biba byoroshye iyo ubihuza n’umuziki. No kuva mu ishuri nkinjira mu buzima busanzwe bw’akazi mvuye mu masomo nabyo byansabye umwanya cyane.”

Yongeraho ati “Ubu ndi gushaka gusubira mu muziki neza, narisuzumye ndeba neza ibyagiye byangirika mu muziki wanjye ubu urwego ndiho n’ibyo ndi kwitaho cyane ni ugukosora byose no kubiha umurongo mushya.”

Mu myaka igera kuri ibiri Alpha Rwirangira yari amaze atagaragara cyane mu muziki nka mbere ngo yakosoraga byinshi bitagendaga neza bityo ko nyuma yo kurangiza Kaminuza agiye kuririmba nk’umunyamwuga.

Ati “Ndi gukosora no kongera kwigaragaza neza nk’umuhanzi uburimo nk’akazi, niyo mpamvu nihaye akazina gashya ka Alpha The Brand, ndacyari wa wundi ariko ubu ndi mushya, n’ibikorwa ngiye kubazanira ni bishya, bitandukanye n’ibyo nagiye nkora mbere ndashaka kwerekana itandukaniro mu buhanzi bwanjye.”

Muri iki gihe afatanya akazi no kongera ubumenyi mu by’ikoranabuhanga gusa aya masomo yo ngo ntazabangamira ubuhanzi bwe. Ati “Ni amahirwe nagize mbona ahantu babyigisha neza kandi murabizi nabyo bitanga akazi keza, nanze kwitesha ayo mahirwe nabyiga kugira ngo nongere ku bumenyi mfite.”

Yavuze ko ateganya kuzagaruka i Kigali mu mwaka wa 2017 narangiza amasomo mashya ari kwiga ndetse agafata umurongo mu kazi akora.

Ati “Imana ninshoboza ngasoza amasomo ndi kwiga ya ICT ndateganya kuzaza i Kigali, ibyo ndi kwiga ndakeka bizantwara umwaka umwe gusa, nimbirangiza nkabona no mu kazi ibintu bimeze neza nazagaruka mu mwaka utaha. Nkumbuye mu rugo cyane, nkumbuye kubonana n’abafana banjye.”

Uyu muhanzi yegukanye Tusker Project Fame ya 3 (2009), PAM Awards imyaka ibiri ikurikiranye 2010 na 2011, nk’umuhanzi w’umwaka witwaye neza mu bagabo mu Rwanda n’ibindi bihembo bitandukanye.

Alpha agiye gusohora indirimbo nshya yise 'Yamungu'

Yakunzwe cyane mu ndirimbo zirimo ‘African Swagger’, ‘Birakaze yaririmbanye na Kidum’, ‘She doesn’t know’, ‘Heaven ft LaMyia Good’, ‘Amashimwe’ n’izindi.

Alpha Rwirangira agiye gusohora indirimbo nshya yise ‘Yamungu’ ahamya ko izaba iri ku rwego rukomeye kurusha izindi yakoze mu myaka yatambutse.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved