Kwamamaza

Umwihariko udasanzwe mu birori by’imideli y’ibwami mu Rwanda rwo hambere (Amafoto)

Yanditswe kuya 2-09-2016 saa 18:09' na Munyengabe Murungi Sabin


Abanyamideli 90 biganjemo abagore n’inkumi bo mu cyaro mu Karere ka Musanze baserutse mu birori by’imideli igaragaza ishusho nyakuri y’ubuzima bw’Abanyarwanda hambere igihugu kigitwarwa n’abami.

Igikorwa cya Rwanda Cultural Fashion Show cyabereye bwa mbere mu gice cy’icyaro i Nyakinama, cyahuriranye n’ibirori bikomeye byo gusoza icyumweru cyahariwe ubukerarugendo bushingiye ku muco ‘Cultural Tourism Week’ kuri uyu wa 1 Nzeri 2016.

Igikorwa cyo kwerekana imideli n’ubuzima gakondo Abanyarwanda babagamo ku ngoma ya cyami, cyateguwe na Rwanda Cultural Fashion Show[isanzwe itegura ibirori by’imideli gakondo] ifatanyije na ‘Red Rocks’.

Muri uyu mwaka, ibirori byo kurimba bya ‘Rwanda Cultural Fashion Show’ byabaye mu bice bibiri, icya mbere cyabereye ahitwa i Nyakinama mu Karere ka Musanze mu gihe igice cya kabiri kizabera mu Mujyi wa Kigali kuwa 24 Nzeri 2016.

Byari ibirori binogeye ijisho kandi bitanga ishusho nyakuri y’ubuzima umwami yabanagamo n’abaturage be umunsi ku wundi. Akarusho gakomeye muri ibi birori [byari byitabiriwe n’abiganjemo abanyamahanga n’abaturage bo muri aka gace] ni umukino wigishije benshi uko ibwami bishimiraga umusaruro w’igihugu bagasangira n’indi migenzo yabiherekezaga.

Umushengero wanyuze benshi…

Ni ibirori byari byihariye ugereranyije n’ibindi by’imideli bisanzwe bibera mu Rwanda. By’umwihariko ababiteguye berekanye ubudasa ‘mu mukino w’umushengero abanyamideli bashushanya uko Abanyarwanda bo hambere biyerekaga umwami ko bafite amaboko mahire’.

Urebye ishusho mbumbe y’umukino wabonaga ko byasabye imbaraga mu guhuza imyambarire gakondo n’ubutumwa bwatanzwe. Carlos Gerolf, Umudage witabiriye ibi birori yabwiye IGIHE ati “…ni umwihariko, nabikunze, nakunze kuriya abasore basokoje n’indirimbo zabo wumvaga zihariye.”

Abanyamideli 90 bahuje imbaraga muri ibi birori berekanya uko imihango yo kuraguza, guterekera, gutera icyuhagiro n’ubuvuzi bwa Kinyarwanda bwakorwaga hambere. Muri ibi birori kandi hasobanuwe akamaro k’ingoma mu gihe cyo hambere, amagambo akwiye yakoreshwaga ibwami n’ibindi.

Muri Red Rocks ahabereye ibi birori hanatangiwemo amasomo [ku babishaka] ku buryo kwenga inzoga ya Kinyarwanda byakorwaga, gusya, kubumba, kwivuga, kuraguza [n’ibikoresho byabaga mu ndaro], kumasha n’ibindi byihariwe n’u Rwanda.

Umuyobozi wa Rwanda Cultural Fashion Show, Ntawirema Celestin yavuze ko bateguye iki gikorwa mu gace k’icyaro mu rwego rwo kugaragaza byeruye ubuzima gakondo bw’Abanyarwanda mu myaka yo hambere bitandukanye n’igikorwa gisanzwe kibera i Kigali.

Ati “Iki gikorwa twashatse ko kiba umwihariko, i Kigali byari bigoye cyane kubona ibikoresho birimo nk’uruho, umuheto, umuvure, urusyo n’ingasire, urutara n’ibindi byerekana akarango k’umuco nyarwanda.”

Yongeraho ati “Ntabwo byadukundiraga ko mu gikorwa dutegura i Kigali twerekana uko gukama ibitoki bikorwa, uko urwagwa rutegurwa, imibereho y’umwami, kwigisha abantu gusya n’ibindi […] Urebye ibyo twakoze urabonamo umwihariko n’itandukaniro.”

Abanyamideli biyerekanye bambaye impu

Imideli yose biyerekanyemo yari yiganjemo iyambarwaga hambere by’umwihariko impu n’ishabure ndetse no kogosha amasunzu ari nabyo bishushanya imimerere y’umunyarwanda wo hambere.

Umwami yarambagizwaga mu ngobyi abagore bakagenda bamubyinira

Mu gukina uko umwami yabagaho hambere, abanyamideli berekanye ko yari umuyobozi mukuru wabaga wubashywe n’abaturage be, ibi babigaragaje mu kumuheka berekana imihango yose yamukorerwaga mu kumuha ikuzo.

Ibi birori byahujwe no gusoza icyumweru cyahariwe ubukerarugendo bushingiye ku muco cyabaye kuva kuwa 26 Kanama kugeza kuwa 1 Nzeri 2016. Yavuze ko mu myaka itaha we n’itsinda rimufasha bazashyiramo ingufu kugira ngo bijye byitabirwa n’abandi bo mu bice by’igihugu.

Ati “Nk’icyanshimishije cyane ni uko twakoresheje abanyamideli ba hano muri Musanze, hari abana biga mu mashuri yisumbuye twahuje n’abagore bo mu cyaro n’bagabo ba hano kugira babigishe ibyo batazi, murabona nko kwerekana uko umwami yabagaho abenshi mu biyerekanye bari bataranavuka ku buryo kugira ngo babikore neza byadusabye abakecuru babizi, babahaye amasomo, natwe ntabwo twari tubizi byose.”

Ibindi bikorwa byerekanwe harimo kwigisha abantu kuraguza, kwenga urwagwa, uko umusaruro watunganywaga mbere yo guhunikwa, gucunda amata, guhamiriza, guhiga mu ishyamba, ubusabane ku ntango, ubuvuzi gakondo, kubumba inkono n’ibibindi.

Ntawirema ati “Abanyamideli babitojwe igihe kinini, uriya mukino wadutwaye imbaraga, ntibyari byoroshye kwigisha abana bakiri bato uko umwami yabagaho mu rugo rwe, uko yasabanaga n’abaturage, uko abaja bakoraga akazi, uko abakobwa bakuburaga ndetse ukabasaba ko babikora kandi bakabikina neza.”

By’umwihariko abanyamideli benshi biyerekanye muri ibi birori ni abavuka muri Musanze hakiyongeramo bake baturutse i Kigali. Ntawirema yijeje abazitabira Rwanda Cultural Fashion Show izabera i Kigali kuwa 24 Nzeri 2016 ko bazabona ibirori birusha iby’imyaka yatambutse.

Iri torero ryo cyaro i Nkotsi ni ryo ryataramye mu muhango ugaragaza uko ibirori by'ibwami
Abakobwa berekanye uko kera abangavu bakuburaga....bakarangwa no kubaha
Abakobwa b'amasugi ni bo bakoraga isuku ibwami
Abanyamahanga baje muri ibi birori bambaye imikenyero
Yerekanye uko hambere bogoshaga amasunzu
Abagore n'inkumi baboha imisambi
Mu rubohero abakobwa bigishirizanyagamo byinshi
Berekanye uko guhinga byakorwaga
Ibwami habaga harinzwe cyane
Abanyamideli barimo abo muri Nkotsi biyerekanye muri ibi birori
Aba bakobwa berekanaga uko gucunga amata byakorwaga
Abanyenzoga b'ibwami...
Abahigi...
Mbere y'uko umwami ahagera umupfumu akabanza gutera icyuhagiro
Araca intege imbaraga zashoboraga kwitambika umwami
Yerekanaga amahembe, impinga, inzuzi n'uducuma abapfumu bifashishaga
Umwami arambagizwa mu baturage be
Abaturage bazanaga umusaruro umwami akawuha umugisha
Uyu musaza n'impinga ye, yigishaga abantu uko gutera inzuzi byakorwaga mu kuraguza
Uyu mukecuru yari yaje kwigisha uko kubumba bikorwa
Bigishijwe uko urwagwa rwengwa kuva ibitoki bisaruwe, bikaba imineke kugeza bivuyemo umutobe utarwa ukabyara urwagwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved