00:00:00 IGIHE NETWORK KN KINYARWANDA EN ENGLISH FR FRANCAIS

Mercedes-Benz Fashion Week Kigali yatumiye abahanga imideli 15 barimo uwambitse Beyoncé

Yanditswe na Uwiduhaye Theos
Kuya 27 Kamena 2021 saa 09:12
Yasuwe :
0 0

Abahanga imideli bo mu bihugu bitandukanye bya Afurika no hanze yayo barimo Abanyarwanda babiri batumiwe mu birori bya Mercedes-Benz Fashion Week Kigali.

Ni ibirori biteganyijwe ku wa 10 Nyakaga 2021, bizanyuzwa kuri shene ya kabiri ya RBA inyuraho ibiganiro byiganjemo ibyahariwe urubyiruko izwi nka KC2.

Mu bahanga imideli bategerejwe kuzigaragazamo harimo abafite inzu zihanga imideli nka Clavon Leonard na Luqman Haskett bo muri Amerika, Zulera Couture, Grooms Gh na Bushai Weave bo muri Ghana, Jana Roos wo mu Bubiligi, Mathias Deon wo muri Namibia na Elimes Outfit wo muri Nigeria.

Hari kandi Delphinez na Sissi Ngamije washinze Boldy Bonza, bombi bo mu Rwanda, Lord Gilles wo muri Canada, Elomelo na Mary Martin London bo mu Bwongereza ndetse na Likhoele Jermina na Georges Malelu bo muri Afurika y’Epfo.

By’umwihariko, Georges Malelu yanditse amateka yo kwambika umuhanzikazi Beyoncé Giselle Knowles-Carter ubwo yaririmbaga mu birori bya Global Citizen Festival mu 2018.

Imyenda ye kandi yambawe n’ibindi byamamare birimo Terri Vaughn na Katie Logan bamenyekanye muri filime y’uruhererekane ya “The Bold and the Beautiful”, abahataniye ikamba rya Miss wa Afurika y’Epfo n’abandi benshi.

Mu 2019 ubwo habaga Mercedes-Benz Fashion Week Kigali ku nshuro yayo ya mbere, na bwo Malelu ari mu bitabiriye ibi birori.

Abandi barimo bafite umwihariko ni Elomelo wagiye yambika ibyamamare bitandukanye ubwo yakoranaga na Vogue na Mary Martin London uyobora igice cy’ubugeni n’imideli mu Biro by’u Bwongereza bishinzwe Iterambere mu muryango wa Commonwealth [UK Foreign Commonwealth and Development Office].

Mary Martin London wasimbuye Victoria Beckham, umugore wa David Beckham kuri uyu mwanya, yakoze amateka yo kuba umwirabura wa mbere wahawe uyu mwanya ndetse ni ku nshuro ya mbere azaba ageze mu Rwanda.

Muri Mercedes-Benz Fashion Week Kigali 2021 hazifashishwa abanyamideli b’inzu ya We Best Models Management (WBM) ifasha abanyamideli 25 bazaba bari muri 30 bazifashishwa muri iki gikorwa. Abanyamideli bazaturuka hanze barimo abazava muri Ghana, Ethiopia na Amerika.

Ndayishimiye Danny uhagarariye FCC Productions Ltd itegura Mercedes-Benz Fashion Week Kigali n’ibera i Accra muri Ghana, yabwiye IGIHE ko nta kidasanzwe cyatumye bahitamo kwifashisha abahanga imideli bake bo mu Rwanda byagera ku bamurika imideli bakaba benshi.

Ati “Nta mpamvu idasanzwe kuko kwiyandikisha byari bifunguye kuri buri wese harimo no ku Banyarwanda n’abanyamahanga ahubwo wenda abo mu Rwanda benshi ntabwo babashije kuzuza ibisabwa tugenderaho dufata abo tuzakorana.”

Guhera ku wa 31 Gicurasi 2019 kugeza ku wa 1 Kamena 2019 ni bwo ibirori bya Mercedes-Benz Fashion Week byabereye mu Rwanda ku nshuro yabyo ya mbere gusa umwaka ushize ntibyabaye kubera icyorezo cya COVID-19.

Ibirori bya Mercedes-Fashion Week Kigali bigiye kuba ku nshuro ya kabiri
Georges Malelu wakoze ikanzu yambawe na Beyoncé ubwo aheruka muri Afurika y'Epfo mu 2018, agiye kongera kugenderera u Rwanda
Georges Malelu yanditse amateka yo kwambika umuhanzikazi Beyoncé Giselle Knowles-Carter ubwo yaririmbaga mu birori bya Global Citizen Festival mu 2018
Mary Martin London ni umwe mu bahanga imideli bakomeye mu Bwongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .