Kigali Fashion Week yatumiwemo umuhanzi w’imideli n’umukinnyi wa filime bakomeye mu Buyapani

Yanditswe na Uwiduhaye Theos
Kuya 5 Nyakanga 2019 saa 03:08
Yasuwe :
0 0

Umukinnyi wa Filime Sayaka Akimoto na Leo Sugo uhanga imideli batumiwe mu birori bya Kigali Fashion Week bigiye kuba ku nshuro yabyo ya cumi.

Mu kiganiro n’abanyamakuru cyabaye kuri uyu wa Gatatu, John Bunyeshuri watangije Kigali Fashion Week yavuze ko yishimira umusanzu w’iki gikorwa mu ruganda rw’abamurika imideli mu Rwanda kuko hari abo byamaze gucira inzira bakajya muri Amerika abandi bakaba bakorera mu mujyi wa Paris mu Bufaransa.

Ati “Ubwo twatangiraga twari dufite abagera ku munani ariko ubu dufite abarenga 50 bamaze kugera ku rwego ruhambaye ndetse bahagararira u Rwanda ku rwego rw’Isi. Twazamuye abamurika imideli ubu dufite abakorera i New York na Paris, ubu turi kugerageza kujyana abandi mu Buyapani. Turateganya kuzana ibindi bikorwa bizakomeza kuzamura uruganda rw’imideli.”

Umuyapanikazi Sayaka Akimoto wabaye umunyamideli unayobora Tokyo Africa Collection 2019 ubu akaba ari umukinnyi wa filime ni umwe mu bategerejwe muri iki gikorwa.

Hazitabira abandi bahanga imideli baturutse imihanda yose barimo Drew wo mu Bwongereza , Ucoco na The 5 Mith bo mu Burundi, By The Way Clothes bo mu Bubiligi na Gissa Fashion Design bo muri Suède.

Hazitabira n’abahanga imideli bo mu Rwanda nka Aqua, Dokmai, Ihogoza Design, Dk Textiles, Ibyiwacu Summer Collection, Awn Creation, Mundi Design na Karen Karsh; n’abandi bazaturuka mu bihugu nka RDC, Togo, Kenya, Uganda n’u Bufaransa.

Perezida wa Tokyo Fashion Week 2019, Leo Sugo wo mu Buyapani na we yitezwe mu bahanga imideli baziyerekana muri iki gikorwa cya Kigali Fashion Week.

Mu kiganiro n’itangazamakuru we yavuze ari iby’agaciro kuza muri Kigali Fashion Weeek, anatangaza ko abahanga imideli bo mu Rwanda ibyo bakora bigiye kujya bigurisha mu Buyapani.

Kigali Fashion Week yatangiye mu 2012, itangirana n’ibindi birori birimo icya Kampala, Bujumbura na Nairobi Fashion week.

Inategura ibindi bitaramo muri Ghana n’ibindi bihugu bikomeye ndetse yanatangiye ibindi birori birimo Kigali International Fashion Week ibera mu Buholandi, Ububiligi, Ubudage n’Ubwongereza.

Uyu mwaka bazatangira ibindi birori birimo ibizabera i New York, Tokyo, Thailanda ndetse na Singapore.

Iki gikorwa cya Kigali Fashion Week kizabera muri Kigali Serena Hotel ku wa 6 Nyakanga 2019, kwinjira bizaba ari 15, 000 Frw ku muntu umwe na 25, 000 Frw ku bantu babiri.

Kuri iyi nshuro bizaba bitandukanye n’ibyabanje cyane ko ubu byamaze kujya mu maboko ya Sosiyete yitwa ‘Iby’iwacu’ ya Umulisa Fiona Cécile ikaba ariyo izabitegura ndetse ikanabikurikirana kuva bitangiye kugeza birangiye.

John Bunyeshuri watangije Kigali Fashion Week (uwa mbere ibumoso) hamwe n'abandi bafite aho bahuriye n'iki gikorwa ubwo bari bari mu kiganiro n'abanyamakuru
Umuyapanikazi Sayaka Akimoto uyobora Tokyo Africa Collection 2019 na Leo Sugo uhanga imideli nawe ukomoka muri iki gihugu bategerejwe muri iki gikorwa
Igikorwa cy'uyu mwaka cyatumiwemo abahanga mu by'imideli batandukanye ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza