Jay D na Turahirwa bazaserukira u Rwanda mu mideli muri Tanzania na Nigeria

Yanditswe na Munyengabe Murungi Sabin
Kuya 17 Ugushyingo 2016 saa 05:48
Yasuwe :
0 0

Abanyamideli Jay D na Turahirwa Moise, batumiwe mu birori bikomeye by’imideli bizabera muri Nigeria, aba bombi banatoranyijwe mu bazitabira bakanagenerwa ibihembo muri Swahili Fashion Week izabera muri Tanzania.

Ntabanganyimana Jean de Dieu [uzwi nka Jay D] na mugenzi we Turahirwa Moise [uyobora Moshions House] bari mu banyamideli bakomeye mu Karere bazitabira iserukiramuco ry’imideli rya Nigeria Men’s Fashion rizamara iminsi itatu ribera mu Mujyi wa Lagos.

Aba bombi bazerekeza muri Nigeria kuwa 1 Ukuboza 2016, bazaba bitabiriye icyumweru cyahariwe imideli kizabera mu Mujyi wa Lagos. Jay D yabwiye IGIHE ko mbere yo kujya muri Nigeria hari ibindi bihembo batumiwemo bya Swahili Fashion Week Awards bizatangwa hasozwa iki cyumweru cy’imideli muri Tanzania.

Yagize ati “Ni ibintu byanshimishije cyane kwibona mu batumiwe muri ibi bihugu byombi, ibyo bikorwa byombi ni binini, bizahuza abanyamideli bakomeye muri Afurika, kubijyamo ni iby’agaciro gakomeye cyane, nzungukiramo byinshi.”

Yongeraho ati “Muri Nigeria nzajyana na Moise, badutumiye mu gikorwa cyitwa Nigeria Men’s Fashion, mbere y’aho hari ibindi bantumiyemo bizabera muri Tanzania, byo ni ibya Swahili Fashion Week, bazanatangamo ibihembo, ndi no mu bahatana mu cyiciro cya ‘East African Model of the Year’, gusa kubera uburyo byegeranye cyane sinzi niba nzabasha kujyayo.”

Muri Swahili Fashion Week Awards, Turahirwa na we ari mu bahataniye ibihembo mu cyiciro cya East African Designer of the Year. Ahanganye n’abanyamideli bakomeye muri Afurika y’Uburasirazuba.

Muri Nigeria, aba banyamideli bazahura n’abandi baturutse mu bihugu birenga mirongo itanu birimo ibyo muri Afurika, Amerika n’u Burayi.

Jay D na Turahirwa Moise kandi bari mu banyamideli batoranyijwe guhatanira ibihembo bya Abryanz Style&Fashion Awards bizatangirwa mu Mujyi wa Kampala kuwa 9 Ukuboza 2016 muri Kampala Serena Hotel.

Turahirwa ahatanye mu cyiciro kimwe muri ibi bihembo cya ‘Fashion Designer of the Year naho Ntabanganyimana Jean de Dieu [Jay D] akaba mu banyamideli bari kuzamuka neza mu Rwanda yatoranyijwe mu cyiciro ‘East African mising Model of the year’.

Jay D aritegura gubaserukira u Rwanda mu mideli muri Tanzania na Nigeria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza