Eric Birasa agiye gutangiza uruganda nyuma y’imyaka umunani mu mideli

Yanditswe na Munyengabe Murungi Sabin
Kuya 25 Ukwakira 2016 saa 12:13
Yasuwe : XX
0

Eric Birasa, ni umwe mu bahanzi b’imideli bubashywe kandi babisaruramo amafaranga atubutse mu Rwanda, amaze kubibonamo uburambe n’ubumenyi mu gihe cy’imyaka irenga umunani amaze abikora by’umwuga.

Ni we washinze inzu y’imideli yitwa Ian Boutique mu mwaka wa 2008. Icyo gihe yari ifite intego yo kuzana mu Rwanda imideli mishya kandi igezweho mu bihugu bizwiho kurimba ku Isi.

Eric Birasa yambitse ibyamamare bitabarika mu Rwanda no hanze. Azwi cyane kandi nk’umwe mu bafite ubumenyi mu gutoza no kwigisha abanyamideli ndetse mu minsi yashize yagizwe Umuyobozi w’Ihuriro ry’Abanyamideli b’umwuga Premier Model Agency [PMA].

Mu myaka amaze mu by’imideli yatoje benshi mu banyamideli bakomeye mu Rwanda ndetse inzu yashinze ya Ian Boutique yamufashije kwambika ibyamamare birimo abaririmbyi bo mu Rwanda, abakobwa bitabiriye irushanwa rya Miss Rwanda mu myaka itatu ishize muri 2014, 2015 ndetse na 2016.

Ati “Mu myaka umunani maze muri uyu mwuga nambitse abantu benshi bazwi, nahereye hasi cyane nza kuzamuka ku buryo nko kwambika Ally Soudy mu bukwe bwe numvaga bikomeye cyane.”

Eric Birasa yavuze ko gukunda akazi ko guhanga no guhitiramo abantu imideli ibabereye byamuzamuye ku rwego rukomeye ndetse yambika benshi mu byamamare nyuma ya Ally Soudy.

Ati “Nambitse Urban Boyz mu bitaramo bitandukanye, Riderman mu bukwe bwe, abahanzi muri Salax Awards zitandukanye. Ikindi gikomeye cyanamfashije kurushaho kumenyekana ni uko nagiye nambika abakobwa mu itorwa rya Nyampinga kuva muri 2014 ndetse n’abanyamideli bakomeye mu birori bagiye bitabira.”

Imizi yo gushinga iduka ry’imideli…

Eric Birasa yavuze ko atigeze ahabwa ubumenyi mu by’imideli gusa yakoze ijoro n’amanywa ashakisha ibigezweho mu bindi bihugu kugira ngo abo yambika banyurwe ari nacyo avuga ko yubakiyeho mu iterambere rye.

Igitekerezo cyo gushinga inzu y’imideli yakigize nk’umuntu wakundaga kurimba ariko akifuza no kubikorera abandi. Mu mwaka wa 2008 nibwo yatangiye kubikora agamije kuvanamo inyungu ndetse biranamuhira ubu abikora nk’akazi gahoraho.

Ati “Mu buzima busanzwe njyewe nakundaga kwambara neza, igihe kigeze ntekereza uburyo nabikora nkambika abantu ariko nkabibonamo n’amafaranga hanyuma mu mwaka wa 2008 nibwo natangiye gukora aka kazi ndetse mbikore nk’ubucuruzi ari nabwo nagize ubushobozi bwo gushinga Ian Boutique.”

“Icyatumye ngira imbaraga cyane ndetse nkamenyekana ni uko nakoranye n’itangazamakuru, nagiye nambika abantu b’ibyamamare, uwo nambikaga azwi yampuzaga n’abandi ngira n’umugisha abanyamakuru baranyoboka menyekana gutyo.”

Imideli ye imyinshi ayivana mu mahanga mu bihugu bizwimo abantu barimba cyane. Avuga ko ari akazi kagoye guhitiramo abantu imideli ndetse biba ingorabahizi kurushaho iyo azanye imyambaro imuhenze cyane yagera mu gihugu akabangamirwa n’isoko rito n’ubushobozi budahagije bw’abakiriya be.

Ati “Icya mbere bisaba gusoma cyane no gukurikirana uko mu bindi bihugu bigenda no kumenya ibigezweho. Nkurikirana inzu zikomeye zambika abantu ku Isi nkamenya ibigezweho haba mu myambaro y’abagabo ndetse n’iy’abagore, ntabwo bingora kubimenya ahubwo ikigorana ni uko akenshi biba bihenze.”

Yongeyeho ati “Iyo utangiye business ntabwo uhita utangira kubara inyungu, natangiye bingoye cyane ndihangana nkomeza kubikora kuko nabikundaga, navuga ko mu myaka umunani maze nkora ibi bintu byo kwambika abantu ari bwo ntangiye kubona inyungu. Imbogamizi ikomeye cyane ni uko isoko ari rito, amafaranga ni make ku isoko mu gihe ibyo mvana hanze biba bihenze.”

Yerekeje amaso ku gushinga uruganda

Birasa yavuze ko inzu ye y’imideli yihaye icyerekezo gishya cyo gushinga uruganda ruto ruzajya rumufasha gukora imideli irimo ubuhanga bwerekana inkomoko y’ibyo bakora hagendewe ku kwihesha agaciro no guteza imbere gahunda ya ‘Made in Rwanda’.

Yagize ati “Politiki y’igihugu ubu iradushishikariza gukunda iby’iwacu binyuze muri gahunda ya ‘Made in Rwanda’, ubu icyerekezo mfite ni ugutangiza uruganda rukora imyenda y’iwacu. Nagenze mu bihugu byinshi ndeba uko bakora, ubu ndifuza kuzashaka ubushobozi ngatangiza uburyo buzajya butuma Abanyarwanda bambara imyenda yakorewe iwacu, byose ni ukwihangana no kugira intego nizeye ko bizashoboka.”

Mbere yo gutangiza uruganda ngo agiye gushakisha ubushobozi bwisumbuyeho ajye agura imideli igezweho ayigurishe bya burundu bitandukanye n’uko mu myaka yari amaze yabikoraga atiza abantu bakamuha amafaranga ubundi bakayimusubiza.

Mbere yo gushinga inzu y'imideli Birasa Eric yari umunyamideli

Ati “Ubusanzwe ngitangira nambikaga ibyamamare, abanyamideli, ba Nyampinga, abageni mu bukwe n’abandi bantu bafite ibirori. Ntabwo mbere nagurishaga imyenda, uraza tukakwambika ukishyura ubukode ukazadusubiza imyenda yacu, ubu rero ndashaka ko nazajya njya mu mahanga nkagura imyambaro igezweho, umudeli wose ugezweho mu mahanga nkawuzana i Kigali abafite ubushobozi bakaba babigura bikaba ibyabo burundu, hari abantu baba bifuza gutunga iyo myenda, ni bake ariko barahari.”

Abantu bazwi Eric Birasa amaze kwambika...


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE