Impumeko y’i Musanze ahagiye gutangirira Iwacu Muzika Festival (Amafoto na Video)

Yanditswe na Uwiduhaye Theos
Kuya 22 Kamena 2019 saa 01:27
Yasuwe :
0 0

Abaturage bo mu Karere ka Musanze mu Ntara y’Amajyaruguru bari mu mwuka udasanzwe aho bambariye gutaramana n’abahanzi benshi bakunda bahurijwe mu iserukiramuco rigiye kuhatangirizwa riri kuba ku nshuro ya mbere rya Iwacu Muzika Festival.

Iri serukiramuco ryiswe ‘Iwacu Muzika Festival 2019’ rizanyura mu ntara enye z’igihugu n’Umujyi wa Kigali rigiye guhuriramo abahanzi batandukanye b’ibikomerezwa mu muziki nyarwanda.

Abahanzi bitezwe barimo Nsengiyumva François wamamaye nka Igisupusupu, Orchestre Impala, Bruce Melodie, umuraperi Jay Polly, Jules Sentore, Allioni na Yverry ni bo basusurutsa abakunzi b’umuziki batuye hafi y’Ibirunga.

Bamwe mu baganiriye na IGIHE mbere y’uko igitaramo gitangira bavuze ko bishimiye kuba iri serukiramuco rigiye gutangirira iwabo.

Harindabayo Gilbert ati “Uriya muzehe ngo ni Nsengiyumva ni we nje kureba cyane ahubwo batinze gufungura ngo twinjire gusa nje gufana n’abandi bahanzi barimo Bruce Melodie.”

Nyiramahirwe Alphonsine we yavuze ko “Iki gitaramo nacyiteguye, biranshimishije kuba kigiye kubera hano i Musanze, nje kureba wa muhanzi waririmbye Mariya Jeanne. Niteze uburyohe bw’umuziki.”

Umunyamakuru wa IGIHE ubwo yatemberaga mu Mujyi wa Musanze yabonye abantu batandukanye bari kugana aho igitaramo kigiye kubera muri Stade Ubworoherane.

Ahagana saa tanu z’amanywa hanze ya Stade hari urujya n’uruza rw’abantu bari bakereye kwitabira igitaramo no guha ijisho abahanzi basanzwe bakunda cyane.

Abenshi bumvikanye bavuga bati ‘dutegereje kureba ‘Igisupusupu’ bavuga ko bategerezanyije amatsiko menshi y’uko yitwara ku rubyiniro.

Iki gitaramo cyari giteganyijwe gutangira saa saba z’amanywa ariko amasaha yigijwe inyuma ho gato kubera imvura yatangiye kujojoba mu kirere cy’I Musanze hafi n’imisozi miremire yo mu Birunga.

Kwinjira muri iki gitaramo ni ubuntu mu myanya isanzwe ndetse na 2 000 Frw mu y’icyubahiro.

Mu Mujyi wa Musanze rwagati mbere y'amasaha make ngo Iwacu Muzika Festival itangire
Abatwara moto na bo biteguye kujya gutaramana n'abahanzi bakunzwe mu muziki w'u Rwanda
Hafi ya Stade Ubworoherane ahagiye kubera igitaramo kuva mu masaha ya kare abantu banyuranagamo bagana kuri stade
Abakunzi ba muzika bari benshi
Iwacu Muzika Festival yatangirijwe mu Mujyi wa Musanze muri Stade Ubworoherane
Primus yahasesekaye kare! Nta muntu uza kwicwa n'icyaka
Nsengiyumva François wamamaye nka Igisupusupu agerageza umuduri we mbere yo gutaramira imbere y'imbaga y'ab'i Musanze
Abacuranzi bakoze ku mirya ya gitari bariteguye
Igisupusupu ari mu bahanzi bitezwe cyane

Amafoto: Muhizi Serge

Video: Hakizimana Alain


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza