Kwamamaza

Chorale de Kigali yateguye igitaramo izaririmbamo indirimbo ya Champions League

Yanditswe kuya 30-11-2016 saa 07:30' na Cyprien Niyomwungeri


Buri uko umwaka utashye, abaririmbyi ba Chorale de Kigali imaze imyaka 50 ibayeho, bategurira abakunda muzika yabo igitaramo cy’indirimbo zuje ubuhanga buhebuje zikabafasha gukomeza kwitegura Noheli bakeye ku mutima.

Iyi Korali imaze kuba ubukombe mu muziki cyane cyane uw’indirimbo zihimbaza Imana zanditse mu buryo bw’amanota aririmbwa n’abahanga, kuwa 18 Ukuboza 2016 saa kumi n’ebyiri z’umugoroba izataramira abakunzi bayo, ab’umuziki uririmbanye ubuhanga ndetse n’ab’umupira w’amaguru.

Iki gitarambo kizabera muri ‘Kigali Conference and Exhibition Village’, ahahoze ari Camp Kigali, mu ihema ryabereyemo inama ya Banki Nyafurika itsura amajyambere n’Inama mpuzamahanga yiga ku bukungu (WEF).

Ubuyobozi bwa Chorale de Kigali buvuga ko buri mwaka bazanira Abanyarwanda udushya ariko kuri iyi nshuro ari akataraboneka kuko barimo gutegura indirimbo z’uruvange by’umwihariko ku nshuro ya mbere bakaba bazaririmba indirimbo y’umupira w’amaguru.

Umuyobozi wa Chorale de Kigali, Alexis Nizeyimana, yabwiye IGIHE ko abazitabira igitaramo bazaririmbirwa indirimbo y’irushanwa rihuza amakipe yabaye aya mbere iwayo ku mugabane w’i Burayi, UEFA Champions League, iririmbwa mu ndimi eshatu arizo Igifaransa, Icyongereza n’Ikidage.

Yagize ati “Uyu mwaka dufite indirimbo z’uruvange zakunzwe mu bihe bya kera no kugera ubu, hari n’indirimbo zitari izaririmbiwe Imana zizwi mu bintu bitandukanye abantu bakunda, nk’umupira w’amaguru.

Umuyobozi wa Chorale de Kigali, Alexis Nizeyimana

Akomeza avuga ko uretse indirimbo ya UEFA Champions League yanditswe na Tony Britten mu 1992, ikaririmbwa na Orchestre ‘Royal Philharmonic’ yo mu Bwongereza, bazaririmba n’izindi zo mu ndimi zitandukanye, by’umwihariko bakazaririmba imwe mu ndirimbo zahimbwe n’abahanzi b’iyo korali iri ku rwego mpuzamahanga.

Ati “Tuzaririmba n’izahimbwe n’abahanzi ba Chorale de Kigali zo ku rwego rw’abahanga b’Abanyaburayi n’Abanyamerika, zirimo imwe izaririmbwa ku nshuro yayo ya mbere yitwa ‘The Voice of the Lord’.

Nizeyimana yasobanuye ko impamvu bakuye igitaramo cyabo aho cyari gisanzwe kibera muri Serena Hotel ari ukugirango abakunzi babo bose bazabashe kucyitabira dore ko aho cyashyizwe hafite ubushobozi bwo kwakira abantu barenga ibihumbi bibiri.

Yavuze ko abazitabira igitaramo cya Chorale de Kigali bazakomeza kuryoherwa n’umuziki nyuramatwi, utibagiwe n’umwiyereko w’abana batojwe.

Ati “Abazitabira bazaryoherwa n’umuziki mwiza w’Ikinyarwanda n’izindi ndimi, kandi uririmbanwe ubuhanga buranga Chorale de Kigali. Turasaba abantu bose kuza kudushyigikira nkuko bakomeje kubikora.”

Kwinjira muri iki gitaramo ni amafaranga y’u Rwanda ibihumbi icumi (10 000 Frw) mu myanya y’imbere na bitanu (5000 Frw) mu yindi myanya. Amatike azatangira kugurishirizwa ku Cyumweru tariki 4 Ukuboza 2016 mu isomero rya Cathedrale St Michel n’ahandi hazatangazwa nyuma.

Uburyo indirimbo ya UEFA Champions League iririmbitse

Chorale de Kigali imaze kuba ubukombe mu miririmbire ya gihanga
Chorale de Kigali ubwo yizihizaga yubile y'imyaka 50 ishinzwe

Kwamamaza

Kwamamaza
IZINDI NKURU WASOMA
Patmos Choir
2016-11-10 08:03:51
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved