Byinshi kuri Mtukudzi wo muri Zimbabwe uzaririmba muri Kigali Jazz Junction

Yanditswe na Uwiduhaye Theos
Kuya 6 Ukwakira 2018 saa 12:40
Yasuwe :
0 0

Umunya-Zimbabwe, Olivier Mtukudzi, yatumiwe gususurutsa abazitabira igitaramo ngarukakwezi cya Kigali Jazz Junction, kizaba kuwa 26 Ukwakira muri Serena Hotel i Kigali.

Ni ubwa mbere uyu mugabo w’imyaka 66 azaba ataramiye abanyarwanda.

Yatangiye gukora umuziki mu myaka isaga 30 ishize, yakoze ibihangano amagana byacengeye mu mitima ya benshi, ashyira hanze imizingo y’indirimbo irenga 60.

Yanahimbye injyana ye yihariye yitwa ‘Tuku Music’.

Mtukudzi yigaruriye benshi mu bakunda umuziki kubera ibihangano bye bikomoza kuri buri cyiciro cy’ubuzima. Harimo iby’ubutumwa bukumira ubusambanyi no kurwanya Sida, izigarurira benshi icyizere zikanabomora ibikomere, izivugira ikiremwamuntu n’ibyo kurwanya ubukene.

Yatangiye kwitoza umuziki akiri umwana muto, aho yiguriraga gitari agatangira kujya ayiyigisha kugeza igihe ayimenyeye.

Mtukudzi yamenyekanye cyane ku Isi hose n’iwabo muri Zimbabwe biturutse ku ndirimbo yakoze ikomoza ku cyorezo cya Sida yitwa ‘Todii’.

Uretse iyi, yanamenyekanye mu zindi zirimo iyitwa ‘Akoromoka Awa’, ‘Ndakuyambira’, ‘Mabasa’ n’izindi.

Uyu mugabo ni umwe mu bahanzi bakomeye badakozwa ibyo kuririmba no gutanga imbwirwaruhame kuri politiki, kuko mu myumvire ye yemeza ko afashe iki cyemezo yaba ashaka gucamo ibice abakunzi be.

Ati “Iyo utangiye kuvuga kuri politiki, uba wahindutse umunyapolitiki. Iyo uvuze ikintu kijyanye na politiki usa n’udahuza n’abo mutavuga rumwe. Kuvuga kuri politiki byagutandukanya n’abantu burundu. Tuvugira buri wese. Tugerageza komora ibikomere bya benshi”.

Kubera ubuhangange bwe n’uko afatwa muri Zimbabwe, yabaye umuvugizi mu gukangurira abantu kwirinda no kurwanya Sida, aho yagiye akorana n’ibigo bikomeye mpuzamahanga mu bijyanye n’ubuzima.

Aririmba mu rurimi rw’Igishona ruvugwa na benshi muri Zimbabwe, urwitwa Ndebele n’Icyongereza.

Mtukudzi afite abana batanu n’abuzukuru babiri. Babiri mu bana be nabo ni abahanzi. Umuhungu we Sam Mtukudzi waririmbaga ku giti cye yiswe n’impanuka muri Werurwe 2010.

Umunya-Zimbabwe, Olivier Mtukudzi yahimbye injyana ya Tuku Music
Azasusurutsa abazitabira igitaramo ngarukakwezi cya Kigali Jazz Junction cyo muri uku kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza