Zari yacyuriye Diamond ko inzu acyuramo abandi bagore ari we wayimwubakiye

Yanditswe na Dusabimana Aimable
Kuya 3 Nyakanga 2018 saa 12:02
Yasuwe :
0 0

Zari Hassan yatangaje ko afite akababaro aterwa n’amakuru yumva ko Diamond asigaye atahana abagore batabarika mu rugo yamwubakiye bagikundana by’umwihariko bikarushaho kumutera intimba kubera ko bari baremeranyije kuyirereramo urubyaro rwabo.

Urukundo rw’aba bombi rwageze ku ndunduro ku wa 14 Gashyantare 2018, ku munsi wahariwe abakundana [Saint Valentin]. Icyo gihe, Zari yavuze ko yasize Diamond ku bwo kunanirwa kwihanganira ibibazo no gucibwa inyuma. Batandukanye bamaze kubyarana kabiri.

Mu kiganiro Zari yagiranye n’ikinyamakuru Mwanaspoti cyo muri Tanzania, yavuze ko ubwo Diamond yamuteraga inda ya Tiffah yahise afata umwanzuro wo kujya gutura muri Tanzania akamufasha kubaka inzu y’umuturirwa afite mu gace kitwa Mandale azi ko bazayibanamo.

Yagize ati “Natakaje amafaranga menshi cyane ngira ngo mufashe kurangiza imirimo yo kuyubaka nzi ngo ruzaba ari urugo rwacu. Nanamufashije kugura ibikoresho byose by’imbere mu nzu muri Afurika y’Epfo tubigura muri Sandton.”

Icyo kinyamakuru cyatangaje ko inzu ya Diamond bivugwa ko yubakiwe na Zari ibarirwa agaciro ka miliyoni Tsh 400 [angana na 153,000,000 Frw] mu gihe ibikoresho by’imbere bifite agaciro ka milyoni Tsh 70 [angana na 26,000,000 Frw].

Zari yavuze ko ababazwa no kumva ko Diamond iyo nzu yayihinduye urugo rw’abandi bagore batabarika nyamara bari barayubakiye kuba urugo rw’umuryango ruzarererwamo abana babyaranye kugeza bakuze.

Yagize ati “Ubwo nahuraga na Nassib [Diamond] nta bitekerezo na bike yari afite ku hazaza he gusa nafashe umwanzuro wo kumwicaza turahategura. Nibuka imishinga myinshi twakoranye ye bwite nyuma akanyihinduka. Birababaza.”

Zari yatanye na Diamond amuziza kujarajara mu bagore

Nubwo Zari avuga ko yahemukiwe na Diamond mu biganiro bitandukanye yagiye agirana n’itangazamakuru yemeje ko adateganya kuzamujyana mu nkiko baburanira kurera abana babyaranye cyangwa kumusaba indezo yabo.

Ubwo aheruka kuganira n’ikindi kinyamakuru cyitwa Mpasho yavuze ko yumva ari inshingano z’ababyeyi bombi kwita ku bana ba ashimangira ko atabona impamvu n’imwe yo kuba yajyana mu rukiko Diamond kugira ngo yite ku bana be.

Abana ba Diamond basigaye bareranwa n'abandi Zari yabyaye kuri nyakwigendera Ssemwanga
Zari niwe usigaye arera abana yabyaranye na Diamond
Zari yigambye ko yubakiye Diamond inzu asigaye acyuramo abandi bagore

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza