Umwuzukuru wa Bob Marley agiye kuburana n’abapolisi baherutse kumuta muri yombi

Yanditswe na Dusabimana Aimable
Kuya 12 Gicurasi 2018 saa 06:26
Yasuwe :
0 0

Donisha Prendergast, umwe mu buzukuru ba nyakwigendera Bob Marley agiye kurega mu butabera abapolisi baherutse kumuta muri yombi akekwaho ubujura, ibyo we abona nko kuba bararebewe mu ndorerwamo y’uruhu rwirabura bagateshwa agaciro.

Uyu mukobwa na bagenzi be babiri Komi-Oluwa Olafimihan na Kelly Fyffe-Marshall,  bafatiwe mu gace ka Rialto mu cyumweru gishize bahamagarijwe polisi n’umuturanyi wari uketse ko bavuye kwiba mu rugo bari bacumbitsemo inzego zishinzwe umutekano zibamarana umwanya bahatwa ibibazo.

Prendergast ntiyishimiye icyo gikorwa n’uburyo we na bagenzi be bafashwe nta kibahamya ubujura bakekwagaho ndetse bagahamagarizwa na kajugujugu za polisi, ibyo we abona nk’ibyatewe no kuba ari abirabura ndetse bamwe muri bagenzi be bakemeza ko ubwoba bwari bwabatashye bakeka ko bashobora guhita baraswa.

Uyu mwuzukuru wa Bob Marley n’umwunganizi we mu mategeko bemeje ko bari gukusanya ibimenyetso ngo barege abapolisi bamufatanye n’inshuti ze ndetse n’umugore w’umuzungu wabahamagarije inzego zishinzwe umutekano avuga ko ari abajura.

Umuturanyi wabo wabaregeye polisi yavugaga ko yabasuhuje abapepera ndetse akamwenyura ariko ntibamwereke ikimenyetso na kimwe bigahita bituma akeka ko ari abajura nubwo babaga mu nzu nkodeshanyo y’ikigo cya Airbnb iri muri ako gace.

Prendergast yashyize amashusho y’uburyo bafashwe kuri Instagram ayaherekeza amagambo y’akababaro, ati “Iyo uhamagarije abantu polisi kuko bafite uruhu rwirabura, uba uri kubashyira mu kaga wirengagije byinshi. Uba uri gusubiza Isi inyuma.”

Yongeyeho ati “Kuzengurukwa na polisi ku bwo kuba umwirabura mu gace k’abazungu […] Abantu benshi bapfuye muri ubu buryo. Ibyo ni ukuri kwambaye ubusa.”

Umwunganizi wabo mu mategeko yabwiye itangazamakuru ko bakiri kwegeranya ibimenyetso ngo bamenye neza uburenganzira bwangijwe n’ibibarengera mu mategeko.

Yavuze ko nk’uko amategeko ya Leta ya California abigena uwabahamagarije polisi nta gihamya cy’icyaha yabonye akwiye gukorwaho iperereza, arongera ati “Bafite uburenganzira bwo guseka no kudaseka kandi ntibategetswe guseka ku itegeko ry’umugore w’umuzungu.”

Polisi ya Rialto yavuze ko hari ibimenyetso n’amashusho yafashwe agaragaza ko gufatwa k’umwuzukuru wa Bob Marley na bagenzi be bitakoranywe inabi cyangwa kubahuka kuko byari uburyo bw’ibiganiro gusa hatabayeho ikoreshwa ry’imbaraga.

Prendergast yabwiye CBC ko ibyo atabikozwa we kuko azi ko “habaho uburyo bwo kuganira neza hagati yabo, na polisi ikaba ifite uko ibifata ku giti cyayo.” Yavuze ko umwe mu bapolisi ukomoka muri Canada yababwiye amagambo asa nk’ayo kubacyurira.

Donisha Prentergast, umwuzukuru wa Bob Marley aherutse gutabwa muri yombi

Yongeyeho ati “Turashaka ibiganiro na Polisi ya Rialto, turashaka kugirana ibiganiro na Meya ndetse n’umurango muri rusange.”

Donisha Prendergast ni umukobwa wa Sharon Marley Prendergast uvuka kuri Rita Marley warezwe na Bob Marley ubwo bombi bashyingiranwaga. Uyu mukobwa yatawe muri yombi ubwo umunsi sekuru yibukirwaho wari wegereje kuko yunamirwa ku wa 11 Gicurasi.

Umunyamategeko wa Prentergast yavuze ko bagiye kurega abapolisi bamutaye muri yombi
Yatawe muri yombi iminsi Sekuru yibukirwaho yegereje

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza