Umutinganyi mu bakobwa 51 batoranywamo Miss America

Yanditswe na Munyengabe Murungi Sabin
Kuya 10 Nzeri 2016 saa 02:36
Yasuwe :
0 0

Imyaka 95 irihiritse irushanwa rya Miss America rikorwa, muri 2016 habaye amateka akomeye aho umwe mu bakobwa 51 bahatanye yavuze byeruye ko aryamana n’inkumi bahuje igitsina.

Umukobwa witwa Erin O’Flaherty ahagarariye Leta ya Missouri muri Miss America 2016. Yahishuye ko ‘ari umutinganyi ushaka kwegukana iri kamba bizwi neza ko ateye atya agakora amateka adasanzwe’.

Ku Mugabane w’u Burayi niho hamaze iminsi habera amarushanwa y’ubwiza abasore bihinduje ibitsina bahatana mu bakobwa. Ubugira kabiri, mu Bubiligi habonetse undi musore witwa Jessica Proost uherutse kwihinduza inkumi ubu uri mu bahatanira ikamba rya Nyampinga w’igihugu ndetse hari amahirwe ko ashobora kuzatorwa.

Ibaze bibaye mu Rwanda umukobwa witangaje byeruye ko ari umutinganyi ahataniye Miss Rwanda! Cyangwa nk’umusore ukomoka muri bene Kanyarwanda yihinduye inkumi ubwabyo byaca igikuba, abanyamasengesho bajya ku mavi, abandi bakabaza abakurambere; abirengejeho kwinjira mu bahatanira Miss Rwanda byakwitwa ko ishyano ryakojeje umurizo hasi.

Muri Miss America uwitwa Erin O’Flaherty yavuze ko ari umutinganyi wakuyeho agahu ndetse witeguye kwambikwa iri kamba akaba umuvugizi w’umuryango w’abatinganyi ku Mugabane wa Amerika.

Erin O’Flaherty yabwiye People Magazine ko bitoroshye kuba yakwegukana ikamba ariko kandi ngo yizeye ko azaboneka mu bakobwa bazakora ibidasanzwe mu ijoro ryo kuri uyu wa 11 Nzeri 2016 mu birori byo gutora Miss America bizabera muri Atlantic City.

Yaratutswe bikomeye abandi bake biganjemo abatinganyi bakamushyigikira ubwo yari akimara gutangaza ko ari umutinganyi. Ntibyamuciye intege kuko ngo “uyobowe n’ubwoba ntacyo yageraho mu buzima”.

Yongeyeho ko “byari bimuteye ubwoba bitari cyane ndetse ko yakiriye ibitekerezo byinshi bimuca intege n’ibindi bimutera imbaraga.”

Ibirori bya Miss America byatangiye gutambutswa kuri ABC kuva mu 1950 ariko byakozwe bwa mbere mu 1921. Mu myaka yose rimaze riba benshi bararyikomye cyane abandi bakarivugaho bitandukanye mu kurica intege no kugaragaza ibibi byaryo.

Mu bakobwa batowe muri Miss America akavugwaho bidasanzwe mu itangazamakuru, ni Vanessa Williams watowe mu 1983. Yari umwirabura wa mbere wahawe iri kamba ndetse by’umwihariko ntiyarigumanye kuko yaryambuwe bimaze kumenyekana ko yigeze kwifitoza yambaye ubusa amafoto agakoresha ku kinyamakuru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza