Umuraperi wavuzweho gukundana na Rihanna yafungiwe guteza imidugararo mu gitaramo cye

Yanditswe na Dusabimana Aimable
Kuya 15 Gicurasi 2017 saa 04:35
Yasuwe :
0 0

Umuraperi Jacques Webster, Jr. [Travis Scott] wavuzweho kugirana ibihe byiza n’umuririmbyi Rihanna, yatawe muri yombi nyuma yo gukora igitaramo akagumura abacyitabiriye bagakomeretsa abashinzwe umutekano.

Uyu musore ni umwe mu bakora umuziki mu njyana ya Hip Hop muri Leta Zunze Ubumwe za Amerika, azwiho kuba yaragiranye ibihe byiza na Rihanna ariko umubano wabo nturambe. Muri iki gihe Travis Scott akundana n’umuvandimwe wa Kim Kardashian witwa Kylie Jenner.

Travis Scott akomeje kugarukwaho cyane annyegwa na benshi mu bakoresha imbuga nkoranyambaga bamenye amakuru y’uko yafungiwe mu gitaramo cye, azira guteza imvururu ’abantu benshi’ bagakomerekera mu mubyigano w’abashakaga kumusanga ku rubyiniro mu gitaramo yari yakoreye muri Leta ya Arkansas iri mu majyepfo ya USA.

Umuvugizi wa Polisi mu gace ka Rogers aho uyu muraperi yafatiwe, yabwiye People Magazine ko Travis Scott yafashwe kubera guteza imyivumbagatanyo, urugomo n’ubushukanyi bwatumye uburenganzira bw’umwana bubangamirwa.

Ati "Mu gitaramo, Webster yakanguriye abaturage kumusanga ku rubyiniro bagaca ku bashinzwe umutekano, mu muvundo w’aberekezagayo, abenshi bakomerekeyemo, harimo n’umwe mu bakozi b’ikigo cyari cyishyuriwe gucunga umutekano mu bafana, ndetse n’umwe mu bagize ishami rya polisi ryari rihari."

Ntabwo ari ku nshuro ya mbere Travis Scott afungirwa guteza imidugararo mu gitaramo cye

TMZ yatangaje ko Travis Scott yatawe muri yombi akiva ku rubyiniro, aza kurekurwa saa tanu n’igice mu ijoro ariko ngo azitaba inkiko zo mu Mujyi wa Arkansas ku byaha aregwa.

Ntabwo ari ku nshuro ya mbere uyu musore atabwa muri yombi azira guteza umuvundo mu bafana be, kuko no muri 2015 yarafunzwe anacibwa amande aryozwa kugumura abitabiriye igitaramo yakoreye ahitwa Lollapalooza mu Mujyi wa Los Angeles.

Mu minsi ishize na bwo ku mbuga nkoranyambaga hakwirakwiye amashusho ya Travis Scott abwira umwana wari witabiriye igitaramo cye gusimbuka ahantu harehare ku rubyiniro, bimuviramo kuvunika amaguru.

Umuraperi Travis Scott
Travis Scott muri 2015 yavuzweho kugirana ibihe byiza na Rihanna ariko umubano wabo ntiwaramba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza