Umuraperi DMX yongeye gutabwa muri yombi

Yanditswe na IGIHE
Kuya 14 Nyakanga 2017 saa 08:26
Yasuwe :
0 0

Umuraperi Earl Simmons[DMX] yatawe muri yombi akurikiranyweho ibyaba birimo amanyanga no kunyereza imisoro ya leta, yafashwe kuri uyu wa Kane tariki ya 13 Nyakanga 2017.

DMX yaherukaga gufungwa muri Kamena 2015, yari akurikiranyweho ibyaha bitandukanye birimo kwanga gutanga indezo nkana ku bana be 12 muri 15 yabyaye.

Icyo gihe, DMX yafunguwe nyuma y’amezi abiri atararangiza igifungo yari yakatiwe n’urukiko, gusa bemeye kumurekura nyuma y’uko ubutabera bwafashe ku ngufu imwe mu mitungo ye kugira ngo abana babone indezo.

Uyu muhanzi wari umaze iminsi yitabwaho kubera ikibazo cy’ubuzima yagize ku bwo gukoresha ibiyobyabwenge yongeye gufungwa azira kwanga gutanga imisoro nkana. Yafatiwe mu Mujyi wa New York ndetse kuri uyu wa Gatanu agomba kwitaba urukiko rwo muri Manhattan.

NBC yatangaje ko uyu muhanzi yishyuzwa amadolari miliyoni imwe n’ibihumbi magana arindwi yanyereje mu misoro ya leta nk’uko byagaragaje n’ikirego yashyiriweho biturutse muri raporo yakozwe n’ikigo Internal Revenue Service.

Aya mafaranga DMX ngo yayanyereje hagati y’umwaka wa 2002 na 2005 mu gihe guhera mu 1998 na 2003 yagurishije kopi zitabarika za album "It’s Dark and Hell is Hot", iyi yamaze ibyumweru birenga ijana iri imbere mu zakunzwe muri Amerika icyo gihe.

Mu mwaka wa 2010 kugeza muri 2015 DMX ngo yinjije miliyoni 2,3 z’amadolari ariko ntiyigeze amenyekanisha inyungu yabonye mu kigo gishinzwe iby’imisoro n’amahoro muri Amerika.

Uyu muhanzi yakozweho iperereza baza kuvumbura ko yashyiraga amafaranga yungutse kuri konti z’abandi bantu barimo abashinzwe kureberera inyungu ze na bamwe mu muryango we.

Uyu muraperi amaze gufungwa inshuro zigera muri 15

Earl Simmons uzwi nka DMX si ubwa mbere afunzwe kuko amaze gutabwa muri yombi ndetse agafungwa inshuro zibarirwa muri 15. Akenshi atabwa muri yombi azira gukoresha ibiyobyabwenge, kutubahiriza amategeko y’umuhanda, urugomo n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza