Umujinya ukomeye kuri Chameleone wahawe akato muri Uganda

Yanditswe na Munyengabe Murungi Sabin
Kuya 9 Ugushyingo 2016 saa 08:30
Yasuwe : XX
91 54

Umuririmbyi Joseph Mayanja [Jose Chameleone] yongeye kugarukwaho mu itangazamakuru avugwa mu bibazo n’ubushyamirane biturutse ku nshyi yakubise umwe mu ba Dj bakomeye muri Uganda bimushyira mu bibazo bikomeye cyane.

Indirimbo za Chameleone zahagaritswe mu tubyiniro, utubari n’inzu z’imyidagaduro muri Uganda nyuma y’uko mu minsi yashize yagiye mu kabyiniro ahondagura umwe mu basore bavanga imiziki amuziza ko ‘ngo yanze gucuranga indirimbo ze’.

Chimp Reports itangaza ko Chameleone yahise afatirwa ibihano bikarishye birimo guhagarika ibihangano bye no kutazongera kubicuranga mu nzu z’imyidagaduro kugeza igihe azasabira imbabazi ishyirahamwe ry’abavanga imiziki muri Uganda.

Mu byumweru bibiri bishize Chameleone yagiye mu kabyiniro kitwa Club Play akubita Dj Bryan nyuma y’intonganya zavutse hagati y’aba bombi. Uyu muhanzi ngo yabwiye Dj Bryan ko akwiye ‘kuzirikana gucuranga indirimbo ze’ undi na we amubwira ko acuranga iby’abanywi bifuza; umujinya wasagutse Chameleone ahita amufata mu ijosi amutera imigeri n’inshyi.

Ubu bushyamirane bwakurikiwe n’uko ishyirahamwe ry’abavanga imiziki muri Uganda ryahise ryanzura ko ibihangano bya Chameleone bigomba guhabwa akato, iki cyemezo cyaje gisanga icyari giherutse gufatwa n’akabyiniro kitwa Club Guvnor ko uyu muhanzi atemerewe kuzongera kuhakandagiza ikirenge kuko iteka iyo ahaje arwana n’abakiriya.

Televiziyo nshya ya Trace Mziki [ishami rya Trace Urban rikorera muri Afurika y’Uburasirazuba] na yo yafashe umwanzuro ko ibihangano bya Chameleone bitazongera gutambutswa kuko yakubise umu Dj.

Chameleone wakunzwe mu ndirimbo “Wale Wale” akibona iryo tangazo kuri Instagram ya Trace Mziki yahise yikoma iki gitangazamakuru n’ubuyobozi bwacyo avuga ko ‘kibiba amacakubiri mu bahanzi ba Afurika kandi cyagakwiye guhuza uyu mugabane biciye mu buhanzi’.

Yanditse kuri Facebook amagambo yuzuyemo umujinya avuga ko imyaka irenga 16 amaze aririmba agikunzwe ndetse ko ibyo yagezeho byose atabikesha impuhwe z’abameze nka Trace Mziki ahubwo ko bituruka mu baturage biyumva mu byo aririmba.

Umwiryane na Televiziyo ya Trace Mziki

Yagize ati “Igisebo kuri Trace Mziki, murakwirakwiza urwangano aho gutanga urugero muhuza Afurika biciye mu muziki. Ubunyamwuga ntabwo ari gutya bugaragara, maze imyaka 16 ndiho atari ku bw’impuhwe cyangwa ikindi. Ni abafana banjye n’Imana yampaye igikundiro.”

“Umuntu uri gukora iyamamaza bikorwa hano ntabwo ari kubahesha agaciro nka Trace, twebwe abakora umuziki twatekerezaga ko mugiye kutuzamura none mutangiye kutuzanamo amacakubiri n’ibindi bitandukanye. Twishimiye kuza kwanyu ariko niba iyi ari yo nzira, ngiye gusubira ku ishuri nige neza hanyuma nze nshake akazi.”

Yongeyeho ko Televiziyo ya Trace Mziki idateze kuzatera imbere no kumenyekana mu gihe idashaka gukorana n’abahanzi bashije ikibanza cy’umuziki Afurika ifite muri iki gihe.

Ati “Ntaho mwagera niba mudashaka gukorana n’abakinnyi b’imena, twakoreye uru ruganda[rw’umuziki] turanaruzamura duhereye ku busa. Iyo tudakora nka Afurika y’Uburasirazuba yihuje ntabwo mwari gutekereza gushaka isoko muri iki gice.”

Chameleone yanavuze ko Trace Mziki nititonda izasenyuka bidatinze ndetse yikomeye ubuyobozi bwayo ko atazigera na rimwe apfukama imbere yabo asaba ko bacuranga ibihangano bye.

Utubyiniro Cahmeleone ajyamo twose aba yifuza ko bacuranga indirimbo ze gusa Dj yabyanga bakarwana. Iyi foto igaragaza Chameleone ubwo aheruka kuza i Kigali, hano yari mu kabyiniro kitwa Plus 250
Trace Mziki yasibiye amayira Chameleone
Radio zikomeye na zo zatangiye gufata umwanzuro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE