Umucuranzi ukomeye muri Amerika yakumiriye abafana batoye Trump mu bitaramo bye

Yanditswe na Dusabimana Aimable
Kuya 16 Gicurasi 2017 saa 10:03
Yasuwe :
0 0

Todd Harry Rundgren, umucuranzi wo muri Leta Zunze Ubumwe za Amerika ufite amateka yo gukorana n’abahanzi bakanyujijeho mu muziki, yaburiye abatoye Trump ababuza kwitabira ibitaramo bye bitewe n’amagambo ahavugirwa.

Ni ibitaramo uyu muhanzi agwbda amurikiramo album nshyashya yise White Knight yakoranye n’abandi bahanzi barimo uwitwa Trent Reznor, Daryl Hall, Bettye LaVette, Robyn, Donald Fagen, Joes Walsh, Satriani, abakora umuziki wa Jazz n’abandi batandukanye.

Mu kiganiro Rundgren yagiranye n’ikinyamakuru Variety, yavuze ko abashyigikiye Donald Trump mu matora ya Perezida wa Leta Zunze Ubumwe za Amerika yabaye mu mpera z’umwaka ushize, badafite umwanya mu bitaramo akora mu abahagera byanze bikunze bagomba kwitegura kubangamirwa n’ibihavugirwa ahamya ko ’bidashobora kuryohera amatwi yabo na gato’.

Uyu muhanzi w’imyaka 68 y’amavuko abajijwe ku kuba na mbere hari abafana be basohotse mu gitaramo yakoreye i Los Angeles kubera amagambo asebya Trump yahavugiwe, yavuze ko nta mpungenge bimuteye kuba hari n’abamwangira icyo.

Ati "Iyo nza kugira ubushobozi, nari kuvuga nti ’Niba ushyigikira Trump, ntuze mu gitaramo cyanjye’, kuko ntuzahagirira ibihe byiza."

Avuga ku bagura amatike mu bindi bitaramo agikomeza gukora n’ibyo yakoze, yabahaye umuburo, aseka ati "Niba udashobora kwakira urwenya cyangwa ngo wemere ko wakosheje, nturi kumwe na twe dusigaye."

Indirimbo yitwa ’Tin Foil Hat’ iri mu zigize album uyu mukambwe agiye kumurikiramo album, yibasira mu buryo bweruye Perezida Trump, binyuze mu magambo yaririmbwemo, aho Rundgren n’umugabo witwa Donald Fagen washinze itsinda ryakanyujijeho mu muziki wa Rock na Jazz ryitwa Steely Dan, bavuga ko uyu muyobozi ’akoresha urubuga rwa Twitter nk’umwana w’umwangavu’ n’ibindi bitandukanye.

Todd Rundgren udashaka abatoye Trump ko bagera mu gitaramo cye

Todd Rundgren wabwiye abashyigikiye Trump kudakandagiza ikirenge mu bitaramo bye, ari mu rugendo rurerure yihaye rwo kuzenguruka Leta Zunze Ubumwe za Amerika amenyekanisha indirimbo ziri kuri album ye nshya. Amaze kunyura mu mijyi irimo St. Louis, Burnsville, Cleveland n’ahandi hatandukanye.

Donald Trump yatorewe kuba Perezida wa 45 wa Leta Zunze Ubumwe za Amerika tariki 9 Ugushyingo 2016 ahigitse Hillary Clinton bari bahanganye. Yarahiriye kuyobora icyo gihugu kiri mu by’ibikomerezwa ku Isi ku wa 20 Mutarama 2017.

Donald Trump agiye kumara amezi ane ayobora Leta Zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza