Ubukwe bwa Meghan n’igikomangoma cy’u Bwongereza buzitabirwa n’abasaga ibihumbi ijana

Yanditswe na IGIHE
Kuya 30 Werurwe 2018 saa 09:10
Yasuwe :
0 0

Icyamamare Rachel Meghan Markle n’igikomangoma cy’u Bwongereza Henry ‘Harry’ baritegura gukora ubukwe bw’agatangaza buzabera hirya gato y’Umujyi wa Londres.

Meghan Markle yamenyekanye cyane muri filime y’uruhererekane yitwa ’Suits : Avocats sur mesure’ aho ari umukinnyi w’ibanze Rachel Zane. Yabaye intumwa y’Ishami rya Loni ryita ku bagore, UN Women n’umuryango World Vision Canada.

Ubukwe bwa Meghan Markle na Harry buzataha ku itariki ya 19 Gicurasi 2018. Umuhango wo kwambikana impeta no kwishimira isezerano ryabo bombi uri mu bikorwa bikomeye bizaranga umwaka wa 2018 ku batuye mu Bwongereza.

Inzego zishinzwe umutekano zatangiye gukaza ingamba z’uburyo zizakoresha mu gucunga umutekano w’abazataha ubu bukwe. Ubu, hasohotse itangazo rivuga ko ubukwe bwa Meghan Markle na Harry buzitabirwa n’abantu bazaba baturutse imihanda yose yo ku Isi basaga ibihumbi ijana.

Ubukwe buzabera ahitwa Windsor. Mu ngengero z’inyubako abageni bazasezeraniramo hitezwe ikivunge cy’abakerarugendo n’abaturage bo mu Bwongereza bazaba baje kureba ubu bukwe bw’umwihariko. Polisi yo muri district ya Thames Valley yatangaje ko yafashe ingamba zikaze mu kwirinda abagizi ba nabi bashobora kuzadobya ibi birori.

Muri iri tangazo hari aho bagira bati “Ibi birori byitezweho gukurura abantu barenga 100.000 bo ku Isi yose, aba bose bitezwe i Windsor.” Ni mu birometero bisaga 30 uvuye mu Burengerazuba bwa Londres.

Mu gukaza umutekano, polisi yavuze ko imodoka zose zizagana muri aka gace zizasakwa hifashishijwe ikoranabuhanga ndetse ibyapa biranga ibinyabiziga bizanyuzwa mu mashini zabugenewe kugira ngo hamenyekane buri mushoferi wese uzagana muri aka gace.

Ubukwe buzatangira saa sita z’aamnywa[12H00], abageni bazasezeranira muri chapelle yitiriwe Mutagatifu George muri Windsor. Nibamara guhana isezerano, ahagana saa saba z’amanywa[13H00], Harry [w’imyaka 33] na Meghan[ wa 36] bazazengurutswa umujyi biyereka abaturage.

Meghan Markle w’imyaka 36 yavukiye i Los Angeles muri California. Amaze igihe akundana n’igikomangoma Harry, umwuzukuru w’Umwamikazi Elizabeth II akaba n’uwa gatanu ku rutonde rw’abaragwa b’ingoma y’u Bwongereza.

Ubukwe bwa Rachel Meghan Markle na ‘Harry’ buzataha kuwa 19 Gicurasi 2018

Igikomangoma Harry ni bucura mu muryango w’Igikomangoma Charles Philip Arthur George n’Igikomangomakazi muri Wales, Diana Frances. Yavutse ari uwa gatatu mu basimbura Umwamikazi Elizabeth II nyuma ya se na mukuru we William, ubu ni uwa gatatu kuko umuryango wiyongereyemo abishywa be George na Charlotte.

Rachel Meghan Markle yambitswe impeta y’urukundo n’igikomangoma Henry ‘Harry’ of Wales mu Ugushyingo 2017. Impeta Markle yambitswe iriho diyama ebyiri zari iz’umubyeyi wa Harry, Igikomangomakazi Diana.

Aba bageni bazasezeranira mu rusengero rwa St George muri Windsor ahabereye
ubukwe bwa se wa Harry, Charles na Camilla mu 2005. Umuryango w’i Bwami uzishingira ibintu byose muri ubu bukwe birimo umuziki, imitako izakoreshwa ndetse n’ibijyanye no kwakira abashyitsi.

Ubukwe bwa ‘Harry’ n'umukinnyi wa filime Meghan Markle bwitezwemo abasaga ibihumbi ijana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza