Taylor Swift yasobanuye uko yakozwe mu ikariso n’umugabo bashyiditse mu rukiko

Yanditswe na IGIHE
Kuya 11 Kanama 2017 saa 08:42
Yasuwe :
0 0

Umuririmbyi Taylor Swift Alison yatanze ibimenyetso bishyigikira ikirego cye mu rukiko, asobanura byimbitse uko yasagariwe n’umugabo wamufashe ku kibuno mu gihe bifotozanyaga.

Ibi byabaye muri 2013 ubwo Taylor Swift n’umugabo w’umu-DJ witwa David Mueller bahuriraga mu gitaramo cyo mu ruhererekane rw’ibyo yise "Red Tour" mu Mujyi wa Denver, hakabaho umwanya wo kwifotozanya mbere y’uko uyu muhanzi aririmba.

Mu rubanza rw’aba bombi rukomeje kuba, Taylor Swift yasobanuye ibirambuye ku kirego cye ku wa Kane, tariki 10 Kanama 2017. Ikinyamakuru BBC cyatangaje ko ubwo yasubizaga ibibazo by’uburanira Mueller yashimangiye ibyo yamushinje avuga ko byamuteye umunabi atari yarigeze agira mu buzima.

Yagize ati "Byari ukumfata bya nyabyo, yahafashe igihe kirekire. Byakozwe ku bushake, namwumvise rwose afata ku kibuno imbere mu ikariso, yamfashe yarangije kugezamo ukuboko cyane, arabikomeza ari ko ngerageza kumwishikuza ariko yanga kurekura."

Uyu muhanzi yongeyeho ati "Ni ibintu by’agahomamunwa ntari narigeze mpura nabyo kuva nabaho."

Dj Mueller ushinjwa na Taylor Swift kumukorakora nta bwumvikane bwa bombi, yahoze akora kuri radiyo yitwa KYGO iri mu zumvwa cyane, yirukanywe nyuma y’iminsi ibiri ashyizwe mu majwi n’uyu muhanzi yiregura avuga ko uwakoze ibyo ashinjwa ari uwari umuyobozi we witwa Eddie Haskel.

Uyu mugabo ashinja Taylor Swift ko ibyo yamushinje we yita ibinyoma byambaye ubusa, byatumye atakaza akazi ke agasaba ko ahabwa indishyi z’akababaro za miliyoni eshatu z’amadolari.

Taylor Swift yanabajijwe impamvu niba koko uyu mugabo yaramukorakoye abamucungira umutekano batigeze bamuhagarika, asubiza agira ati "Nta muntu n’umwe wari witeguye ko ibintu nka biriya byabaho... Ntabwo byigeze bibaho mbere. Byari agahomamunwa biteye n’amayobera."

Uyu muhanzi yanavuze ko azi neza uwamufashe ari Dj Mueller atari abandi uwo mugabo ashyira mu majwi kuko ngo yamwiboneye ndetse ari we bifotoranyije kandi akaba abyibuka neza.

Abanyamategeko ba Taylor Swift n'umuvugizi we berekeza ahabera urubanza

Taylor Swift yatanze ubu buhamya nyuma y’umunsi umwe nyina na we avugiye mu rukiko ko yatewe agahinda n’ibyo umwana we yakorewe, avuga ko yashatse ’kuruka no kurira’ ubwo yamubonaga mu rwambariro ibyo bikimara kumubaho.

Hanze y'aho Taylor Swift aburanira haba hari umubare munini w'abafana be n'abanyamakuru
Urubanza rwa Taylor Swift na Dj Mueller rubera mu muhezo ku buryo nta bemererwa gufata amafoto imbere mu rukiko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza