Taylor Swift mu buryohe bw’urukundo n’umusore ukibana n’ababyeyi

Yanditswe na Dusabimana Aimable
Kuya 18 Gicurasi 2017 saa 08:09
Yasuwe :
1 0

Umuririmbyi Taylor Alison Swift uri mu bahanzi binjiza akayabo muri Leta Zunze Ubumwe za Amerika, byahishuwe ko amaze igihe ari mu urukundo n’umusore uri kwigaragaza mu bakora umwuga wa sinema mu Bwongereza.

Taylor Swift ni umwe mu bahanzi b’igitsina gore batunze amafaranga menshi mu bakorera umuziki muri Leta Zunze Ubumwe za Amerika. aherutse gushyirwa n’ikinyamakuru Forbes ku mwanya wa mbere mu baherwe b’ibyamamare batarengeje imyaka 30 n’akayabo ka miliyoni 170 z’amadolari ya Amerika.

Uyu muhanzi wahiriwe mu rugendo rwe muri muzika yakunzwe cyane mu ndirimbo ziganjemo iza Pop na Country Music. Yavuzwe mu rukundo n’abasore benshi ariko bagatandukana bidateye kabiri, gusa muri iki gihe biravugwa ko umutima we wigaruriwe n’umusore w’Umwongereza witwa Joseph Matthew Alwyn.

The Sun yatangaje ko Taylor Swift ’hashize amezi’ ari mu rukundo na Joe Alwyn nubwo bitamenyekanye mbere. Batangiye umubano wabo ari ubushuti busanzwe nyuma ngo bageza ku bo mu miryango ibijyanye n’urukundo rwabashibutsemo.

Umwe mu bantu ba hafi b’aba bombi, yabwiye icyo kinyamakuru ati "Ntabwo bakundanye none cyangwa ngo babe bakundanaga mu ibanga, abo byagizweho ibanga ni itangazamakuru kuko twese, inshuti za hafi za Taylor na Joe, imiryango, twari tuzi neza ko bari kumwe kuva mu mezi ashize kandi bari baziranye kuva kera.

Yongeyeho ati "Nyuma y’ibitaramo bya 1989 [album yasohoye] n’uburyo Taylor yagarutsweho cyane, yize kurinda cyane umutekano w’amabanga y’ubuzima bwe bwite, abigenderaho no mu bihe bya mbere by’umubano we na Joe."

Yakomeje avuga umubano uri hagati ya Taylor Swift na Joe Alwyn uganisha ahakomeye kuko bamaze no kubigeza mu miryango yabo nubwo bombi batarabivugaho mu itangazamakuru. Bivugwa ko umukobwa yakodesheje inzu mu Bwongereza ndetse umusore akaba ari we mushyitsi ukunze kuhagera wenyine.

Taylor Swift w’imyaka 27 ari mu rukundo n’uyu musore nyuma yo gutandukana na Tom Hiddleston wakinnye muri filime izwi na benshi yitwa Thor. Mbere ye uyu mukobwa yagiranye ibihe byiza n’abandi basore barimo Calvin Harris na Harry Styles wo mu itsinda rya One Direction.

Joe Alwyn, umukunzi mushya wa Taylor Swift, afite imyaka 26, atuye mu Bwongereza aho abana n’ababyeyi. Yize mu mashuri akomeye yigisha ibijyanye no gukina filime mu Bwongereza. Yanyuze muri London’s Royal Central School of Speech and Drama ndetse na Bristol University.

Uyu musore azwi muri filime yitwa Billy Lynn’s Long Halftime Walk. Umwuga akora umaze kumuhuza n’ibindi byamamare by’i Hollywood birimo Kristen Stewart, Vin Diesel, Chris Tucker n’abandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza