Suge Knight yakatiwe imyaka 28 azira kwica umuntu

Yanditswe na Uwiduhaye Theos
Kuya 7 Ukwakira 2018 saa 08:20
Yasuwe :
0 0

Suge Knight wamamaye mu njyana ya Hip Hop, ni umugabo wari kumwe na Tupac ubwo yaraswaga; yakatiwe imyaka 28 azira kugongesha umuntu imodoka bikaza kumuviramo urupfu.

Urubanza rw’uyu mugabo rwabaye kuri uyu wa Kane. Ashinjwa kuba yaragonze umuntu agakomeza akigendera ubwo hafatwaga amashusho ya filime yiswe ‘Straight Outta Compton’ bikaza kurangira uwo muntu apfuye.

Suge Knight w’imyaka 53 mu ntangiro z’uko kwezi byari byemejwe ko atazemererwa ubwunganizi mu rukiko muri uru rubanza ashinjwamo kwicamo umugabo yagonze mu 2015 witwa Terry Carter.

Amashusho yafashwe yerekanye imodoka yari itwawe na Suge Knight yinjiye muri Restaurant iri mu Mujyi wa Compton muri Leta ya California hafi y’ahari hari gufatirwa amashusho ya filime mu 2015.

Icyo gihe uwari ushinzwe umutekano muri iyo restaurant witwa Sloan yaje yegera imodoka ya Knight, ndetse nyuma haza kuza abandi bantu babiri bavugana nawe ariko ntiyayisohokamo.

Bitunguranye, imodoka yasubiye inyuma igonga wa musekirite yikubita hasi. Mu gihe yasubiraga inyuma ihita igera aho camera zitabasha gukurura.
Ya modoka yagarutse aho wa musekirite yari akiryamye camera zongera kuyifata imugonga bwa kabiri, ikomereza ku wundi mugabo wari uri hafi aho witwa Terry Carter ku bw’amahirwe make we nyuma aza gupfa.

Uyu Sloan we asigarana ubumuga.

Abo mu muryango w’uyu mugabo wapfuye, kuri uyu wa Kane bagaragaye mu rukiko basabira Knight ibihano bikakaye kuko yakoze icyaha yabigambiriye.

Ubusanzwe muri California icyaha cyo kwica umuntu ku bwende gihanishwa gufungwa imyaka 11 ariko Suge Knight we bagikubye kabiri kubera ibindi byaha yari asanzwe akurikiranyweho.

Iyi myaka 22, yahise yiyongeraho indi itanu y’ikindi cyaha gikomeye aregwa ndetse n’undi umwe w’uko iyo modoka yari arimo yari afitemo intwaro.

Marion Hugh "Suge" Knight Jr. ni umwe mu batunganya indirimbo bari bakomeye mu myaka isaga 20 ishize. Yari mu nshuti z’akadasohoka za Tupac ndetse umunsi uyu musore yapfiriyeho mu 1996 bari kumwe mu modoka.

Suge Knight yakatiwe igifungo cy'imyaka 28

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza