Polisi yaburijemo igitaramo cya Teddy Afro utavuga rumwe n’ubutegetsi bwa Ethiopia

Yanditswe na IGIHE
Kuya 4 Nzeri 2017 saa 03:47
Yasuwe :
2 0

Inzego zishinzwe umutekano muri Ethiopia zaburijemo igitaramo cy’umuhanzi Tewodros Kassahun [Teddy Afro] uri mu bantu bazwi batavuga rumwe n’ubutegetsi bw’igihugu.

BBC yatangaje ko igitaramo cya Teddy Afro cyari icyo kumurika album ya gatanu yise ‘Ethiopia’. Iki gitaramo cyari mu bitegerejwe n’umubare munini muri iki gihugu biturutse ahanini ku ndirimbo zigize iyi album y’umwihariko.

Abashinzwe umutekano muri Ethiopia barimo polisi n’inzego zita ku nyungu rusange z’abaturage mu Mujyi wa Addis Ababa zageze aho igitaramo cyagombaga kubera mbere y’amasaha make zihita zitegeka abari bahawe akazi ko gutunganya ibyuma by’umuziki ko babizinga bagataha.

Umujyanama wa Teddy Afro yabwiye BBC ko inzego zishinzwe umutekano zitarabamenyesha impamvu nyayo yatumye ziburizamo iki gitaramo cyagombaga kuba kuri iki Cyumweru tariki ya 3 Nzeri 2017.

Album ya Gatanu ya Teddy Afro igizwe n’indirimbo 15, yayisohoye muri Gicurasi 2017. Kuva yajya hanze iri imbere mu zaguzwe cyane muri iki gihugu ndetse niyo iyoboye izikunzwe cyane ku rubuga rwa Billboard World Albums.

Iyi album ya Teddy Afro igizwe n’indirimbo zakorogoshoye bamwe mu banyapolitike n’abategetsi ba Ethiopia. Yaririmbye avuga cyane ku bumwe bw’abaturage ba Ethiopia, ubwisanzure n’izindi ngingo bamwe batinya kuvuga byeruye muri iki gihugu. Teddy Afro kandi yanakomoje ku mwami w’abami Emperor Tewodros II kuri album ye.

Teddy Afro wakunzwe mu ndirimbo ’Lambadina’ amaze imyaka igera ku icyenda asa n’uhanganye n’ubutegetsi bwa Ethiopia ariko mu buryo buziguye. Umwuka mubi hagati ye n’abategetsi watangiye gututumba mu mwaka wa 2008 ubwo yafungwaga aryozwa kugonga umuntu we akavuga ko ari icyaha leta yamuhimbiye kugira ngo imufunge.

Yazamuye umujinya kuri benshi mu banyapolitike mu mwaka wa 2005 ubwo yakoraga album yibasira mu buryo bweruye abayobozi bamwe mbere y’amatora yabaye muri Ethiopia icyo gihe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza