Nyampinga mushya w’u Buyapani yateje impagarara kubera ubwoko

Yanditswe na Munyengabe Murungi Sabin
Kuya 7 Nzeri 2016 saa 08:05
Yasuwe :
0 0

Umukobwa witwa Priyanka Yoshikawa yegukanye ikamba rya Nyampinga w’u Buyapani 2016 , ni na we uzahagararira iki gihugu mu irushanwa rya Miss Universe 2016, benshi bamwinubiye kuko afite inkomoko zitandukanye.

Priyanka Yoshikawa afite inkomoko ebyiri, se ni Umuhinde naho nyina akaba ari Umuyapanikazi. Yambitswe ikamba rya Nyampinga w’u Buyapani mu ijoro ryo kuwa Mbere tariki ya 5 Nzeri 2016.

Itorwa rya Priyanka Yoshikawa ryakurikiwe n’iteranamagambo hagati y’abakurikirana bya hafi amatora ya ba Nyampinga muri iki gihugu. Uyu mukobwa ntiyishimiwe na gato kuko ari umu-métisse ndetse ko adakwiye guserukira igihugu ku rwego rw’Isi.

Ni ku nshuro ya kabiri mu Buyapani hatowe Nyampinga ufite inkomoko ebyiri ndetse bigateza impagarara mu baturage. Muri 2015, Ariana Miyamoto yegukanye ikamba rya Nyampinga w’u Buyapani nabwo ntibyishimirwa n’abatari bake.

Uyu yabaye umukobwa wa mbere waciye agahigo ko kuba Nyampinga wa mbere ufite inkomoko nyinshi waserukiye iki gihugu mu marushanwa mpuzamahanga y’ubwiza. Miyamoto avuka kuri nyina w’Umuyapanikazi na se w’umwirabura w’Umunyamerika ukomoka muri Afurika.

Priyanka Yoshikawa w'imyaka 22 yagizwe Nyampinga mushya w'u Buyapani

RFI itangazo ko Miss Priyanka Yoshikawa w’imyaka 22 akimara gutorwa yavuze ko agiye guhangana n’ikibazo cy’itotezwa rikorerwa abimukira n’abafite inkomoko z’uruvange mu Buyapani.

Yagize ati “Ubwo naje mu Buyapani abantu bamfataga nk’aho nari mfite indwara zandura ku buryo bakekaga ko nibankoraho nshobora kubanduza.”

Gutsinda kwe hari abo byashimishije gusa umubare munini ni abababajwe no gutorwa kwe. Benshi baribaza niba umuntu ufite amaraso y’uruvange yahagararira u Buyapani mu marushanwa mpuzamahanga nka Miss Universe.

Gushakana hagati y’abadahuje inkomoko mu Buyapani bikorwa n’abantu babarirwa ku ntoki, kugeza ubu abana 2% gusa ni bo bavuka buri mwaka bakomotse ku babyeyi badahuje inkomoko.

Priyanka Yoshikawa ntiyishimiwe na benshi mu Buyapani
Ni umu-métisse
Miss Japan 2015, Ariana Miyamoto na we ntiyigeze yishimirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza