Morgan Freeman uheruka i Kigali arashinjwa gukorakora abagore abandi akabambika ubusa

Yanditswe na Munyengabe Murungi Sabin
Kuya 25 Gicurasi 2018 saa 10:16
Yasuwe :
0 0

Umusaza w’ikirangirire mu mwuga wa sinema, Morgan Freeman yashyizwe mu majwi n’abagore bagera ku munani ko yabakoreye ihohotera rishingiye ku gitsina mu bihe bitandukanye.

Morgan Freeman uri mu bahanga muri sinema bubashywe, amaze kumva ibyo bamushinja n’uburyo byasamiwe hejuru n’ibinyamakuru yahise asaba imbabazi.

Uyu musaza usanzwe akina filime akanaziyobora, amaze umwaka avuye mu Rwanda, yahageze kuwa 11 Gicurasi 2017 ahamara iminsi itanu. Yahafatiye amashusho ya filime mbarankuru ihuriyemo abantu bafite amateka yihariye ku mubumbe w’Isi barimo na Perezida Kagame.

Morgan yasabye imbabazi abumvise ibyo ashinjwa bakamufata nabi. Yarezwe byeruye n’abagore umunani gusa hari n’akandi gatsiko ka benshi bavuga ko na bo yabahohoteye mu buryo butandukanye.

Umwe mu bagore bari bamwungirije mu kuyobora no gutunganya filime iri mu zisekeje ya ‘Going in Style’, yabwiye CNN ko uyu musaza yamukoreye ihohoterwa mu gihe cy’amezi umunani.

Yavuze ko uyu musaza w’imyaka 80 yamukorakoye inshuro zitabarika ndetse ngo yanamwambitse ubusa mu bihe bitandukanye. Yashimangiye ko hari igihe Morgan yamutunguraga akazamura ingutiya kugira ngo arebe niba yambaye ikariso.

Morgan Freeman yahise avuga ko asabye imbabazi “umuntu wese waguwe nabi cyangwa wumvise ko yasuzuguwe. Umuntu wese unzi, uwo nakoranye na we aranzi kandi azi ko ndi umuntu udashobora kubangamira undi nabigambiriye.”

Yongeyeho ko kubangamira abagore “si umugambi nigeze ntegura.”

Morgan ni we muntu mushya muri Hollywood ushinjwa guhohotera abagore nyuma ya Harvey Weinstein watumye havuka ubukangurambaga bwa #MeToo buhuriyemo abahanganye n’abakorera igitsinagore ihohotera.

Uyu mugore ubuga ko yambikwaga ubusa na Morgan, yahishuye ko hari umukinnyi witwa Alan Arkin wigeze kwijujutira ihohoterwa bakorerwa n’uyu musaza ahari agira isoni cyane.

Yagize ati “Yabikomojeho amubwira[Morgan] ko akwiye kubihakarika ntazongere. Morgan yakozwe n’isoni ntiyagira icyo asubiza.”

Undi mugore wakoranye na Morgan kuri filime yitwa “Now You See Me” yasohotse mu 2013, yavuze ko abagore bose bari bazi neza ko “bakwiye kwirinda kwambara imyenda yo hejuru igaragaza amabere, kutambara imyenda yo hasi yerekana intege zabo mu gihe Morgan ari hafi.” Ibi babikoraga birinda ko yabambika ubusa byoroshye.

Morgan kandi ngo hari inshuro nyinshi yitsiritaga ku mabere y’abagore yakoreshaga muri filime abandi akabasaba ko batigisa ikibuno imbere ye

Morgan Freeman ashinjwa gukorakora abakobwa

CNN yavuganye n’abandi bantu benshi ibabaza ku myitwarire ya Morgan, bo bemeza ko ari umusaza mwiza kandi ukora akazi ke kinyamwuga ntawe abangamiye.

Morgan Freeman yavutse ku wa 1 Kamena 1937, ni umukinnyi wa filime ubimazemo imyaka irenga 52 ndetse akagira ubuhanga bukomeye mu kuzitunganya. Uyu mukambwe yatwaye igihembo cya Academy Award mu 2005 nka Best Supporting Actor muri filime Million Dollar Baby (2004). Anafite ibindi bihembo bikomeye birimo Golden Globe Award na Screen Actors Guild Award.

Ikuzo rye rikomezwa cyane n’ubuhanga agaragaza mu gukina mu myanya yose ahabwa muri filime yagaragayemo, azwi mu zakoze amateka zirimo iyitwa Street Smart (1987), Driving Miss Daisy (1989), The Shawshank Redemption (1994) and Invictus (2009) Glory (1989), Robin Hood: Prince of Thieves (1991), Seven (1995), Deep Impact (1998), The Sum of All Fears (2002), Bruce Almighty (2003), The Dark Knight Trilogy (2005–2012), The Lego Movie (2014), Lucy (2014).

Morgan aheruka i Kigali muri Gicurasi 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza