Koffi Olomide ashaka gusubira muri Kenya aho yakubitiye umugore bigateza induru

Yanditswe na Dusabimana Aimable
Kuya 16 Mata 2018 saa 04:05
Yasuwe :
0 0

Umuhanzi w’icyamamare muri Afurika, Koffi Olomide yabwiwe n’ubuyobozi bwa Kenya ko ari umushyitsi udakenewe ku bataka bwaho mu gihe cyose atarasaba imbabazi ku cyaha yakoze cyo gukubitira umugore ku kibuga cy’indege ubwo aheruka muri icyo gihugu.

Koffi Olomide araryozwa igikorwa cyavugishije benshi yakoze mu 2016, ubwo yari agiye gukorera igitaramo muri Kenya. Mu buryo bwatunguye benshi, Koffi Olomide agisohoka mu kibuga cy’indege cyitiriwe Jomo Kenyatta ku wa 22 Nyakanga 2016.

Icyo gihe, yagaragaye atera imigeri umwe mu bagore bamubyinira, amashusho ye akwirakwizwa ku mbuga nkoranyambaga anengwa mu buryo bukomeye ndetse arahambirizwa asubizwa iwabo muri Congo.

Uyu muhanzi ukunze kwiyita Grand Mopao cyangwa Mopao Mokonzi, ku wa Gatanu w’icyumweru gishize yasohoye amashusho yemeza ko agiye gusubira muri Kenya kuhataramira, ibintu bitigeze byakirwa na bamwe mu batuye muri icyo gihugu ndetse Minisiteri y’abinjira n’abasohoka ikamwamagana.

Umuvugizi wa Minisiteri Ishinzwe abinjira n’abasohoka muri Kenya, yabwiye Citizen ko nyuma y’imyitwarire yagaragaye kuri Koffi Olomide agomba kwandika asaba gukurirwaho sitati yo kuba mu batifuzwa ku butaka bw’icyo gihugu.

Yagize ati “Inshingano ziri kuri Koffi Olomide, agomba gusaba ko isura afite nk’umushyitsi utifuzwa ihindurwa. Ntabwo inshingano zabyo zituriho. Ibyo natabikora ngo ahinduze sitati afite hano, naba akigera ku butaka bwa Kenya azongera yurizwe indege yamuzanye. Ibyo ni amategeko mpuzamahanga.”

Koffi Olomide ategerejwe kuririmbira muri Kenya ku wa 24 Mata 2018. Yatumiwe mu nama ya Guverineri w’ahitwa Kakamega, Wycliffe Oparanya, mu nama yitwa Devolution Conference.

Ni umunyadushya mu kurwana n’abagore ndetse hari ibindi birego yagiye ashyirirwaho ku bwo gukubita ababyinnyi be n’abagore abahora ubusa.

Ubwo aheruka muri Kenya, Koffi Olomide yakubitiye umubyinnyi we ku kibuga cy’indege

Kubikorera muri Kenya byamugizeho ingaruka zikomeye, abaturage bashoje urugamba ku mbuga nkoranyambaga basaba leta kumuhambiriza ndetse irabikora. Yabanje gufungirwa ku kibuga cy’indege i Nairobi bucyeye yirukanwa muri iki gihugu, yageze iwabo leta imufunga iminsi ibiri muri Gereza nkuru ya Makala mu Mujyi wa Kinshasa.

Koffi Olomide w’imyaka 61 y’amavuko akora umuziki uzwi nka “soukous” , yamamaye mu minsi yashize mu ndirimbo ‘Selfie’ iri guca ibintu muri Afurika. Uyu muhanzi azwi ku mazina arimo "Shakespeare of Zaire", "Grand Mopao", "Mokonzi", "Tcha Tcho king", "Nkolo Lupemba" , "Sarkozy" n’andi menshi.

Koffi Olomide ushaka gusubira muri Kenya yabwiwe ko ashobora kongera guhambirizwa kubera umugore yahakubitiye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza