Kim Kardashian yafatiweho imbunda n’abajura i Paris

Yanditswe na Munyengabe Murungi Sabin
Kuya 3 Ukwakira 2016 saa 08:25
57 38

Kim Kardashian, umugore wa Kanye West yafatiweho imbunda n’abantu babiri bari biyambitse nk’abapolisi bamusanze mu cyumba cya hoteli yari acumbitsemo mu Mujyi wa Paris.

Ibi byabaye ku mugoroba wo kuri uyu wa 2 Ukwakira 2016, umuvugizi wa Kim Kardashian yabwiye itangazamakuru ko uretse ihungabana yagize nta gikomere abo bajura bamusigiye.

BBC itangaza ko Polisi yo mu Mujyi wa Paris yemeje amakuru y’uko hari ubujura bwakorewe muri hotel Kim Kardashian acumbitsemo ariko ko nta kibazo ubuzima bwe bwagize. Iperereza ryatangiye ngo aba bantu bamenyekane.

Uyu mugore w’imyaka 35, ari mu Bufaransa aho yitabiriye icyumweru cyahariwe imideli cya Paris Fashion Week; yajyanye na nyina Kris Jenner ndetse na murumuna we Kendall Jenner.

Kanye West waririmbaga mu iserukiramuco rya Meadows mu Mujyi wa New York yahise ava ku rubyiniro akimenya inkuru y’uko umugore we yafatiweho imbunda. Yabwiye abitabiriye gitaramo ko ahagaritse igitaramo kuko ‘hari ibibazo umuryango we ugize’.

Abateguye iri serukiramuco bahise basohora itangazo bavuga ko Kanye West yatashye igitaramo kitarangiye kubera ibibazo byihutirwaga birebana n’umuryango.

Itangazo ryagiraga riti “Kubera ibibazo byihutirwa mu muryango, byabaye ngombwa ko Kanye West ahagarika kuririmba. Tumushimiye igitaramo cyiza yakoreye abafana be mu gusoza Meadows Festival. Ibitekerezo byacu biri kumwe na Kanye West n’umuryango we.”

Mu cyumweru gishize Kim Kardashian yibasiwe n’umugabo witwa Vitalii Sediuk washakaga kumusoma ku kibuno, umurinzi aritambika.

Sediuk yavuze ko yabikoze ari mu myigaragambyo yamagana Kim Kardashian kuko ngo yiyongeresheje ibibuno ‘umuco udakwiye kuranga abagore’.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE