Kwamamaza

Kanye West yirukanye umugabo umaze imyaka ine arinda Kim Kardashian

Yanditswe kuya 4-11-2016 saa 10:05' na IGIHE


Umuraperi Kanye West yafashe umwanzuro wo kwirukana ku kazi Pascal Duvier wari umaze imyaka ine acunga umutekano w’umugore we Kim Kardashian.

Pascal Duvier yatangiye kugaragara mu ruhame arinze Kim Kardashian mu mwaka wa 2012 ndetse yamuherekezaga mu bihugu byose yajyagamo muri icyo gihe cyose gishize. Ni we wari umurinze mu kwezi gushize ubwo yari i Paris agaterwa n’abajura bitwaje imbunda.

Ikinyamakuru Entertainment Weekly cyatangaje ko Pascal Duvier yirukanwe nyuma y’ukwezi kumwe nyirabuja atewe n’amabandi ubwo yari yagiye i Paris mu bikorwa byo kumurika imideli. Mu byo yazize ngo harimo gushinjwa uburangare bwatumye Kim yibwa ibifite agaciro ka miliyoni zisaga esheshatu z’amadorali.

Inshuti ya hafi ya Kim Kardashian yabwiye iki kinyamakuru ko “Pascal yirukanwe hamwe n’itsinda ry’abandi bagabo barindaga umutekano w’uru rugo ndetse umwanzuro wafashwe na Kim Kardashian n’umugabo we Kanye West.”

Yongeyeho ati “Ni umwanzuro ukomeye muri iki gihe kuko bakundaga Pascal ariko nta yandi mahitamo yari asigaye.” Undi yabwiye ikinyamakuru Us Weekly ko mu byo uyu mugabo yazize harimo inkurikizi z’ibyabaye kuri Kim Kardashian mu Mujyi wa Paris.

Pascal w’imyaka 43 akomoka mu Budage, yari amaze imyaka ine arinda Kim Kardashian. Yahoze mu gisirikare cy’iki gihugu mbere y’uko ajya gutura muri Amerika, asanzwe afite ikompanyi ye ibarizwamo abasore b’ibigango barinda abantu b’ibyamamare, uyu yarinze igihe kinini Justin Timberlake na Christina Aguilera.

Yirukanwe nyuma y’igihe gito yagaragaye mu Mujyi wa New York arinze Kim Kardashian ndetse kuwa Gatatu yari yaherekeje uyu mugore mu birori byo kwizihiza isabukuru ya murumuna we Kendall. Icyo gihe Kim yari arinzwe n’abashinzwe umutekano batatu biyongera ku bandi barinda barumuna be.

Pascal yari he Kim Kardashian afatirwaho imbunda?

Kim Kardashian yatewe n’abajura ahagana saa cyenda zo mu rukerera rwo kuri uyu wa Mbere tariki ya 3 Ukwakira. Aba bajura bari batanu b’igitsinagabo, bamusanze mu cyumba babifashijwemo n’umuzamu bari baziritse amaboko yombi n’amapingu.

Kim Kardashian w’imyaka 35 basanze atari kumwe n’umurinzi we Pascal Duvier, uyu ngo yari yaherekeje Kendall Jenner mu kabyiniro.

Aba bajura bari bipfutse mu maso ndetse bari biyoberanyije mu mwambaro wa Polisi y’u Bufaransa. Bageze mu cyumba umwe yahise atunga imbuga ku mutwe wa Kim Kardashian, uyu mugore ngo yahise ‘asaba imbabazi avuga ko bamugirira impuhwe ntibamwice kuko afite abana babiri bato’.

Mu cyumba yari afitemo amafaranga yo kwifashisha n’imirimbo y’agaciro ifite agaciro ka miliyoni esheshatu z’amadolari [akabakaba 4,944,000,000frw], ibi byose abajura babikukumbye barabyandurukana.

Kim Kardashin kandi bamwibye impeta ihenze yambitswe n’umugabo we Kanye West, iyi ifite agaciro ka miliyoni enye z’amadolari ya Amerika. Mu byo bamwibye harimo telefone ebyiri zihenze, ngo hari imwe yari irimo amabanga menshi y’uyu mugore.

Pascal yari amaze imyaka ine arinda Kim Kardashian
Pascal Duvier yirukanwe ku kazi
Pascal Duvier yateruye umusore witwa Vitalii Sediuk ubwo yageragezaga gukora kuri Kim Kardashian ari i Paris mbere y'uko yibwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved