Justin Bieber yakubise umufana amuca umunwa

Yanditswe na Munyengabe Murungi Sabin
Kuya 23 Ugushyingo 2016 saa 11:05
Yasuwe :
0 0

Umuhanzi ukomoka muri Canada, Justin Bieber yakubise umufana ingumi amukomeretsa umunwa ubwo yari i Barcelonna aho yakoreye igitaramo gikomeye mu ijoro ryo kuri uyu wa 22 Ugushyingo 2016.

Justin Bieber amaze iminsi azenguruka mu bihugu byo ku Mugabane w’u Burayi akora ibitaramo mu rugendo yise ‘Purpose World Tour’. Kuri uyu wa Kabiri yaririmbiye kuri Stade Palau Sant Jordi muri Espagne gusa yahavuye ateje imvururu nyuma yo gukubita umufana we akamusiga avirirana.

Daily Mail yatangaje ko Justin Bieber yageze kuri stade Palau Sant Jordi atwawe n’umushoferi, mbere y’uko yinjira ahabereye igitaramo imodoka yagendaga gake ku buryo yasuhuzaga abafana. Umusore umwe yegereye iyi modoka anyuza ukuboko mu idirishya akora kuri uyu muhanzi undi aho kumwishimira amutera ingumi mu maso imukomeretsa umunwa.

Umushoferi wa Justin Bieber w’imyaka 22 yahise akandagira umuriro bahava byihuse kuko hari hahise haba imvururu z’abafana biganjemo urubyiruko rw’abasore n’inkumi bashakaga kwihorera nyuma y’uko mugenzi wabo yakomerekejwe.

Justin Bieber ari muri Espagne azahava yerekeze mu Bwongereza aho azakorera ibitaramo bibiri mu Mujyi wa London kuri O2 kuwa 28-29 Ugushyingo 2016.

Muri ibi bitaramo ari gukorera i Burayi, Justin Bieber yagiye avugwaho inkuru z’ibibazo n’umwiryane n’abafana; mu byumweru bishize yabwiye abafana be i Londres ko ‘bakwiye guceceka bakamutega amatwi igihe arimo kuvuga’, ab’i Manchester na bo yarababwiye ngo ‘baceceke’ bibabaza benshi babifashe nko kubasuzugura.

Ubwo yari yagiye kuririmbira muri Prague, umufana yacunze Justin Bieber afata ipantaro ashaka kuyimanura ngo amwambike ubusa gusa abamucungira umutekano bahise batabara.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza