Ishavu ryinshi Sheebah Karungi ahura n’umufana we ugiye kwicwa na kanseri

Yanditswe na Munyengabe Murungi Sabin
Kuya 3 Nzeri 2016 saa 01:19
Yasuwe :
0 0

Umuhanzi Sheebah Karungi yabonanye n’umufana we ubura ibyumweru bibiri ngo ashiremo umwuka kubera ubukana bw’indwara ya kanseri imaze igihe yaramuzahaje.

Sheebak Karungu [wiyita Queen Sheebah] ni umwe mu bakobwa bari ku isonga mu bakunzwe kandi bahenze muri Uganda. Sheebah aherutse gukorana indirimbo na Kitoko Bibarwa bise ‘I Am In Love’.

Muri iyi minsi akunzwe cyane mu ndirimbo “Malidadi “, “Go Down Low ft Pallaso”, “Otubatisa ft Irene Ntale” n’izindi. Muri Nyakanga 2016 yaririmbiye kuri Kivu Serena Hotel muri Summer Beach Fest.

Sheebah Karungi yari umuhanzi w’imena mu birori by’urwenya ‘Comedy Store’ byateguwe na Alex Muhangi, byabereye kuri Diners Lounge muri Bukoto. Muri iki gitaramo yararirimbye yishimirwa na benshi, cyari igitaramo gishyushye kandi cyari kirimo ibyishimo byinshi ku bafana.

Igitaramo cyajemo ubukonje ndetse Sheebah Karungi n’abafana bamwe basuka amarira ku bw’ubuhamya bwatanzwe na Alice Nankinga waje muri iki gitaramo ikuba gahu aharanira ko ibyumweru bibiri asigaje ku Isi bishira abonye uyu muhanzi.

Muri iki gitaramo hari benshi mu bahanzi baharawe muri iki gihe muri Uganda nka Godi Godi, Jaja Bruce, Little Joe, Dorah Nakaga, Amooti Omubalanguzi n’abandi. Sheebah yishimiwe kurusha bose mu ndirimbo ze nka ‘Wadawa’, ‘Nkwatako’, ‘Twesana’, ‘Tunywe’, ‘Otubatisa’, ‘Farmer’ na ‘Omulembe’.

Chimpreports itangaza ko ibyari ibyishimo byahindutse amarira uyu mukobwa amaze kuririmba agasanganirwa n’umufana witwa Alice Nankinga warijije benshi avuga ko ‘yazanwe no kureba Sheebah mu gihe yitegura urupfu’.

Alice Nankinga yahoberanye na Sheebah bombi bararira

Sheebah amaze kuririmba, uyu mufana yamusanze ku rubyiniro avuga ko hari icyo yifuza kumubwira undi na we atega amatwi. Yari inkuru ishengura umutima, ati “Sheebah ndagukunda cyane. Nari ndi mu rugo mu kanya kashize bakuru banjye bambwira ko uri hano. Nahise nza kuko nahoze nifuza guhura na we.”

Yongeyeho ati “Nivuje kanseri mu minsi yashize hanyuma muganga ambwira ko nsigaje ibyumweru bibiri byo kubaho. Naje hano muri iri joro kugira ngo mpure na we mbere y’uko mpfa.”

Uyu mukobwa w’imyaka 20 arwaye kanseri yo muri nyababyeyi, anafite ibibyimba bibiri binini mu nda ari nabyo bimutera ububabare bukabije. Sheebah yamubajije icyo yifuza ko yamufasha undi ati "Ntabwo nsaba ibikomeye, ndirimbira Nkwatako unansigire ikoti."

Sheebah yahise yiyambura ikoti yari yambaye ariha umufana we bahita bahoberana. Ikiniga cyafashe uyu muhanzi araturika ararira ndetse na benshi mu bafana batangira gusuka amarira.

Yakoze mu mifuka avanamo amafaranga yose yari afite ayaha Alice Nankinga ari nabwo abandi bafana batangiye kujugunya inoti ku rubyiniro mu kumushakira ubufasha bwa nyuma ngo barebe ko barokora ubuzima bwe.

Sheebah yaririmbye ‘Nkwatako’ arimo kurira, akiyisoza abafana baririmbye indirimbo ihimbaza Imana yitwa ‘I know who I am’ ya Sinachi.

Abitabiriye igitaramo bakozwe ku mutima na Alice Nankinga wavuze ko abura igihe gito agapfa
Alice Nankinga ubwo yabwiraga Sheebah ubuhamya bwe
Sheebah yananiwe kwihangana asuka amarira
Sheebah Karung, Alice Nankinga na Alex Muhangi bifatanyije mu isengesho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza