Ingo ebyiri za R. Kelly zatewe n’abajura barazisahura

Yanditswe na Dusabimana Aimable
Kuya 8 Ukuboza 2017 saa 11:46
Yasuwe :
0 0

Ingo ebyiri z’umuhanzi R. Kelly uri mu bakomeye mu njyana ya R&B muri Leta Zunze Ubumwe za Amerika, zatewe n’abajura biba ibikoresho byose, umwe mu bahoze bamukorera arahigwa akekwaho gutegura uwo mugambi.

Robert Sylvester "R" Kelly wakunzwe na benshi mu ndirimbo za RnB, yakanyujijeho mu myaka yatambutse muri "I Believe", "Happy People”, "Africa", "All I Really Want", "All The Way" (feat. Kelly Rowland), "Anything Goes" (feat. Ty Dolla $ign) n’izindi nyinshi.

CNN yatangaje ko umugabo witwa Alfonso Walker wo muri Lawrenceville akurikiranwe n’inzego zishinzwe umutekano aryozwa kwiba mu ngo ebyiri za R. Kelly ziri mu Majyaruguru ashyira Uburasirazuba bwa Atlanta mu Mujyi wa Johns Creek.

Itangazo ryasohowe na Polisi ryavuze ko "Ku wa 26 Ugushyingo 2017, umukozi wo mu rugo wa R. Kelly yahamagaye ku biro bikuru bya Polisi y’Umujyi wa Johns Creek ko ubwo yari agiye gukora isuku mu rugo yasanze hasahuwe ndetse ibintu byateraguwe hejuru.

Inshuti za R. Kelly zahise zigira inama abo ku yindi nzu ikodeshwa na R. Kelly muri uyu mujyi ariko naho basanga hibwe ibikoresho byose."

Umuturanyi w’imwe mu nzu za R.Kelly zibwe yabwiye abashinzwe umutekano ko yabonye agatsiko k’abantu batwara ibikoresho byose babipakira mu modoka nyinshi bari bahazanye.

Inzego zishinzwe umutekano zavuze ko Walker uzwi nka "Doc" ari we ushakishwa aryozwa gutegura uwo mugambi nyuma yo kugirana amakimbirane na R. Kelly umaze amezi adakandagira mu ngo ze zibwe kuko ari mu rugendo rw’ibitaramo mu yindi mijyi.

R. Kelly yavuze ko ashimira inzego zishinzwe umutekano zikurikiranye ukekwaho gutera ingo ze akiba ibikoresho byose nubwo hatatangajwe agaciro kabyo.

Rumwe mu ngo za R. Kelly zatewe n’abantu bataramenyekana rwaherukaga kwinjirwamo na polisi mu Ukuboza umwaka ushize, uyu muhanzi yakekwagaho gutuzamo abangavu byakekwaga ko yafashe bugwate ndetse akabakoresha ubucakara bw’imibonano mpuzabitsina.

Icyo gihe yari yarezwe n’ababyeyi b’uwitwa Jocelyn Savage bavugaga ko bafite impungenge bitewe n’inkuru yari yatangajwe na Buzzfeed ishyira uyu muhanzi mu majwi gufatira abakobwa benshi bakiri bato ariko aza kubihakana.

R. Kelly yaherukaga kuvugwa mu nkuru zo gufatira abangavu mu ngo ze zatewe n'abajura

Reba indirimbo "I Believe I Can Fly" iri mu za R. Kelly zakunzwe mu myaka yo hambere


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza