Dj Avicii yiyahuye akoresheje icupa

Yanditswe na Dusabimana Aimable
Kuya 3 Gicurasi 2018 saa 03:25
Yasuwe :
0 0

Nyuma y’ibyumweru bibiri Dj Avicii apfuye, hasohotse ubuhamya bwa bamwe mu babonye ibikomere byari ku murambo we, bemeza ko yiyahuye yikebesheje icupa.

Avicii ukomoka muri Suède yari akomeye ku Isi mu kuvanga umuziki mu njyana ya ‘danse électronique’ no kugirana imikoranire n’abahanzi bafite impano bagakorana ibihangano binogeye amatwi.

Yamenyekanye cyane biturutse ku ndirimbo nka ‘Wake me up’, ‘Hey Brother’ n’indi yaherukaga gusohora yitwa ‘Lonely Together’.

Dj Avicii yapfuye afite imyaka 28, yasanzwe muri hoteli imwe yo mu Mujyi wa Muscat, Umurwa Mukuru wa Oman ku wa Gatanu, tariki ya 20 Mata 2018.

Ikinyamakuru TMZ cyasohoye amakuru mashya ku rupfu rwe, byemezwa ko yishwe no gutakaza amaraso menshi yikatishije ikirahuri bishoboka ko yakuye ku icupa arimennye.

Umwe mu bahamije ayo makuru yavuze ko yikatishije ikirahuri mu bujana. Abandi babiri bavuga ko yakase imitsi y’ijosi rye ari nabyo byatumye atakaza amaraso menshi kugeza ku rupfu rwe.

Iperereza ryakozwe na polisi ku rupfu rwa Avicii ryagaragaje ko nta bimenyetso bigaragaza ko yaba yaragiriwe nabi.

Umuryango wa Avicii waherukaga gusohora itangazo rikubiyemo amagambo ahishura ko yiyahuye. Bavuze ko batewe intimba n’urupfu rwe, bashimangira ko yari amaze igihe kirekire “ashaka kubona amahoro.”

Avicii yatangiye umwuga wo kuvanga umuziki mu 2008 ubwo yatsindaga irushanwa ryakoreshejwe na Pete Tong. Yabonetse mu bahatanira Grammy Awards mu myaka ibiri, yagize indirimbo icyenda zazaga mu 10 za mbere zikunzwe mu Bwongereza, harimo ebyiri zaje ku mwanya wa mbere.

Bamwe mu babonye umurambo wa Avicii bavuze ko yiyahuye akoresheje ikirahuri cy'icupa

Yari afite ibibazo by’ubuzima yari amaranye igihe bitewe n’imiti yongera imbaraga yakoreshaga kugira ngo abashe gukora ibitaramo bye, ibintu byateraga impungenge benshi mu nshuti ze.

Mu 2016, yatangaje ko ahagaritse ibyo bikorwa. Icyo gihe yagize ati “Ndabizi ko ndi umunyamahirwe kuzenguruka Isi mbacurangira gusa mfite igihe gito cyane cy’ubuzima bw’umuntu ndiwe nyuma y’ubuhanzi.”

Dj Avicii yakoze indirimbo zanyuze abakunda umuziki wa 'electronic dance'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza